Bɔfoi 4 - ŊMALƐ KRƆŊKRƆŊ LƐ

Petro kɛ Yohane yɛ akwaashɔŋ lɛ hiɛ

¹ Shi be ni amɛkɛ maŋ lɛ wieɔ lɛ, osɔfoi lɛ kɛ Sɔlemɔ we lɛ asafoiatsɛ lɛ kɛ Sadukifoi lɛ bashwie amɛnɔ,

² ejaakɛ efee amɛ mlifu akɛ amɛmiitsɔ̃ɔ maŋ lɛ nii, ni amɛmiijaje amɛmiitsɔ̃ɔ akɛ Yesu ete shi kɛjɛ gbohii ateŋ.

³ Ni amɛmɔmɔ amɛ, ni amɛyawo amɛ tsuŋ kɛyashi jetsɛremɔ, ejaakɛ je ena etã.

⁴ Shi mɛi ni nu lɛ ateŋ mɛi pii he ye, ni hii lɛ ayibɔ bashɛ aaafee akpei enumɔ.

⁵ Shi enɔ jetsɛremɔ lɛ amɛlumɛi lɛ kɛ maŋ onukpai lɛ kɛ mlatsɔɔlɔi lɛ babua amɛhe naa yɛ Yerusalɛm,

⁶ kɛ Osɔfonukpa Ana, kɛ Kaiafa kɛ Yohane kɛ Aleksandro kɛ mɛi abɔ ni jɛ osɔfonukpa lɛ weku lɛ mli lɛ;

⁷ ni amɛyaŋɔ Petro kɛ Yohane amɛbadamɔ amɛhiɛ, ni amɛbi amɛ akɛ, “Mɛɛ hewalɛ nyɛkɛfee enɛ, aloo mɛɛ gbɛi mli nyɛfee yɛ?”

⁸ Kɛkɛ ni Petro ni Mumɔ Krɔŋkrɔŋ eyi lɛ obɔ̃ lɛ kɛɛ amɛ akɛ, “Maŋ mli lumɛi kɛ onukpai,

⁹ kɛji akɛ wɔ miiye sane ŋmɛnɛ gbi nɛɛ yɛ ejurɔ ni afee nɛkɛ helatsɛ nɛɛ hewɔ akɛ namɔ nɔ atsɔ̃ atsa lɛ lɛ,

¹⁰ no lɛ nyɛ fɛɛ kɛ Israel maŋ muu lɛ fɛɛ ana ale akɛ, Yesu Kristo, Nazarenyo lɛ, ni nyɛsɛŋ ni Nyɔŋmɔ tee lɛ shi kɛjɛ gbohii ateŋ lɛ, lɛ egbɛi mli nuu nɛɛ damɔ nyɛhiɛ ni ehe ewa lɛ nɛɛ.

¹¹ Lɛ nɔŋŋ ji mɔ ni ŋmalɛi lɛ wie yɛ ehe akɛ, ‘Tɛ lɛ ni nyɛ ni nyɛ ji tsutswalɔi lɛ gbe ehe guɔ lɛ, no ebatsɔ̃ koŋtɛ nɛɛ.’

¹² Ejaakɛ yiwalaheremɔ bɛ mɔ kroko mli; ni asaŋ gbɛi kroko hu bɛ ŋwɛi shishi ni akɛhã gbɔmɛi ni sa akɛ atsɔ̃ nɔ ahere wɔyiwala.”

¹³ Agbɛnɛ be ni amɛna Petro kɛ Yohane ekãa lɛ, ni amɛyoo akɛ jeee woloŋlelɔi kɛ nilelɔi komɛi ji amɛ lɛ, efee amɛhiɛ yaa, ni amɛkɔ sɛɛ akɛ amɛkɛ Yesu ehi shi.

¹⁴ Ni asaŋ akɛni amɛna gbɔmɔ ni atsa lɛ lɛ kɛ amɛ damɔ shi hewɔ lɛ, amɛnaaa nɔ ko amɛkɛɛ.

¹⁵ Shi amɛfã amɛ akɛ amɛje gwabɔɔ lɛ mli amɛje kpo fioo, ni amɛtee ajina

¹⁶ amɛkɛɛ, “Te wɔɔfee gbɔmɛi nɛɛ tɛŋŋ? Ejaakɛ okadi ni yɔɔ naakpɛɛ ni atsɔ̃ amɛnɔ afee lɛ yɛ faŋŋ yɛ mɛi fɛɛ ni yɔɔ Yerusalɛm lɛ ahiɛ, ni wɔnyɛŋ wɔtso.

¹⁷ Shi kɛ̃lɛ bɔ ni afee ni ekahehee tuutu ko dɔŋŋ yɛ mɛi lɛ ateŋ hewɔ lɛ, nyɛhãa wɔwoa amɛhe gbeyei, koni amɛkawie yɛ nɛkɛ gbɛi nɛɛ mli amɛmiitsɔ̃ɔ mɔ ko mɔ ko dɔŋŋ.”

¹⁸ Ni amɛtsɛ amɛ kɛba, ni amɛwo amɛ kitã akɛ amɛkatsi tã ni amɛkatsɔ̃ɔ nii yɛ Yesu gbɛi mli kwraa dɔŋŋ.

¹⁹ Shi Petro kɛ Yohane here nɔ ni amɛkɛɛ amɛ akɛ, “Kɛ eja gbɛ yɛ Nyɔŋmɔ hiɛ akɛ abo nyɛ moŋ toi fe Nyɔŋmɔ lɛ, nyɛkojoa.

²⁰ Ejaakɛ wɔ lɛ wɔnyɛŋ akɛ ja wɔwie nii ni wɔna kɛ nii ni wɔnu lɛ.”

²¹ Shi be ni gwabɔɔ lɛ saa wo amɛhe gbeyei lɛ, amɛŋmɛɛ amɛhe, ejaakɛ amɛnaaa bɔ ni amɛaafee ni amɛpiŋ amɛ yɛ maŋ lɛ hewɔ, ejaakɛ mɛi fɛɛ miiwo Nyɔŋmɔ hiɛ nyam yɛ nɔ ni afee lɛ hewɔ;

²² ejaakɛ gbɔmɔ ni atsa lɛ naakpɛɛ tsamɔ nɛɛ eye fe afii nyɔŋmai ejwɛ.

Heyelɔi lɛ sɔle ni awo amɛ ekãa

²³ Shi be ni aŋmɛɛ amɛhe lɛ, amɛba amɛnyɛmimɛi lɛ aŋɔɔ, ni amɛbagba nibii fɛɛ ni osɔfonukpai lɛ kɛ maŋ onukpai lɛ kɛɛ amɛ lɛ.

²⁴ Be ni amɛnu lɛ, amɛkɛ jwɛŋmɔ kome hole amɛgbei anɔ amɛhã Nyɔŋmɔ ni amɛkɛɛ, “Nuŋtsɔ, bo ni oji Nyɔŋmɔ ni fee ŋwɛi kɛ shikpɔŋ kɛ ŋshɔ kɛ nii fiaa ni yɔɔ amɛmli,

²⁵ bo mɔ ni otsɔ̃ Mumɔ Krɔŋkrɔŋ lɛ nɔ owie yɛ wɔtsɛ David, otsulɔ lɛ, naa okɛɛ akɛ, ‘Mɛɛba jeŋmaji lɛ feɔ hoo, ni maji lɛ hu jwɛŋɔ yakanii?

²⁶ Shikpɔŋ nɔ maŋtsɛmɛi lɛ ete shi edamɔ shi, ni lumɛi lɛ hu anaa ebakpe shi ewo Nuŋtsɔ lɛ kɛ mɔ ni efɔ lɛ mu lɛ!’

²⁷ “Lɛɛlɛŋ, Herode kɛ Pontio Pilato kɛ jeŋmaji lɛ kɛ Israel maji lɛ hu ebabua amɛhe naa yɛ maŋ nɛɛŋ amɛwo otsulɔ Krɔŋkrɔŋ Yesu, mɔ ni ofɔ lɛ mu lɛ,

²⁸ koni amɛfee nii abɔ ni onine kɛ oyiŋtoo lɛ eto efɔ shi akɛ afee lɛ.

²⁹ Ni agbɛnɛ hu, Nuŋtsɔ, kwɛmɔ amɛmɔhegbeyei ni amɛwoɔ lɛ, ni ohã otsuji lɛ kɛ ekãa pii ajaje owiemɔ lɛ,

³⁰ ni okpã onine mli ni ohã atsatsaa mɛi, ni atsɔ̃ otsulɔ krɔŋkrɔŋ Yesu lɛ gbɛi nɔ afee okadii kɛ naakpɛɛnii.”

³¹ Ni be ni amɛsɔle nɛkɛ lɛ, he ni amɛnaa ebakpe shi yɛ lɛ hoso, ni Mumɔ Krɔŋkrɔŋ yimɔ amɛ fɛɛ obɔ̃bɔ̃; ni amɛkɛ ekãa jaje Nyɔŋmɔ wiemɔ lɛ.

Heyelɔi lɛ fee amɛnii fɛɛ kwasafonii

³² Shi mɛi babaoo lɛ ni heɔ yeɔ lɛ fɛɛ hiɛ tsui koome kɛ susuma koome, ni amɛteŋ mɔ ko mɔ ko tsɛɛɛ enii ni eyɔɔ lɛ amli eko akɛ lɛ diɛŋtsɛ enɔ, shi eyɛ hã amɛ fɛɛ.

³³ Ni hewalɛ kpeteŋkple bɔfoi lɛ kɛye Nuŋtsɔ Yesu shitee lɛ he odase, ni dromɔ kpeteŋkple yɛ amɛ fɛɛ amɛnɔ.

³⁴ Ni mɔ ko mɔ ko bɛ amɛteŋ ni efiɔ lɛ; ejaakɛ mɛi abɔ ni yɔɔ shikpɔji loo shĩai lɛ hɔ̃ɔhɔ̃ɔ amɛ ni amɛkɛ nii ni ahɔ̃ɔ lɛ ayinii lɛ ba,

³⁵ amɛkɛbashwie bɔfoi lɛ anajianaa, ni ajaa ahãa mɔ fɛɛ mɔ bɔ ni hiaa lɛ.

³⁶ Ni Yose, mɔ ni bɔfoi lɛ wo lɛ Barnaba (eshishi ji: Miishɛjemɔ bi) lɛ, ni ji Levinyo ni esɛɛ jɛ Kipro lɛ,

³⁷ yɛ shikpɔŋ, ni ehɔ̃ɔ, ni ekɛ shika lɛ ba ni ekɛbashwie bɔfoi lɛ anajianaa.