Bɔfoi 3 - ŊMALƐ KRƆŊKRƆŊ LƐ

Nuu obubuafo lɛ tsamɔ

¹ Gbi ko gbɛkɛ ŋmɛji etɛ̃ ni ji sɔlemɔ be lɛ, Petro kɛ Yohane tsa mlu kɛtee Sɔlemɔ we lɛ.

² Ni nuu ko yɛ ni ji obubuafo kɛjɛ enyɛ musuŋ, ni awoɔ lɛ daa abataa Sɔlemɔ we lɛ shinaa ni atsɛɔ lɛ “Shinaa Fɛɛfɛo” lɛ naa, koni ebala nii yɛ mɛi ni yaa Sɔlemɔ we lɛ adɛ̃.

³ Ni be ni ena Petro kɛ Yohane boteɔ Sɔlemɔ we lɛ, eba amɛ nɔ ko.

⁴ Shi Petro kɛ Yohane fɛɛ kwɛ lɛ gãa, ni Petro kɛɛ lɛ akɛ, “Kwɛmɔ wɔhiɛ!”

⁵ Ni edɔ ehiŋmɛii eto amɛnɔ, ehiɛ kã nɔ akɛ ebaana nɔ ko yɛ amɛdɛ̃.

⁶ Shi Petro kɛɛ, “Jwiɛtɛi kɛ shika lɛ mibɛ eko; shi nɔ ni miyɔɔ lɛ, no mikɛhãa bo nɛɛ, Yɛ Yesu Kristo, Nazarenyo lɛ, gbɛi mli lɛ, tee shi ni onyiɛ.”

⁷ Ni emɔ̃ eninejurɔ mli ni ewo enɔ edamɔ shi; ni amrɔ lɛ nɔŋŋ lɛ enaji kɛ enanetalɔi lɛ amli wa lɛ;

⁸ ni ehuru edamɔ shi ni ebɔ̃i nyiɛmɔ, ni ekɛ amɛ nyiɛ kɛbote Sɔlemɔ we lɛ kɛ tuumɔ kɛ Nyɔŋmɔ yijiemɔ.

⁹ Ni maŋ muu lɛ fɛɛ na lɛ ni enyiɛ ni eejie Nyɔŋmɔ yi;

¹⁰ ni be ni amɛyoo lɛ akɛ lɛ ji mɔ ni ta Sɔlemɔ We “Shinaa Fɛɛfɛo” lɛ naa ebalaa nii lɛ, amɛhe jɔ̃ amɛhe ni amɛnaa kpɛ amɛhe babaoo yɛ nɔ ni afee ahã lɛ lɛ hewɔ.

Petro shiɛmɔ yɛ Solomon Ablanaa lɛ nɔ

¹¹ Shi akɛni obubuafo ni atsa lɛ lɛ kpɛtɛ Petro kɛ Yohane hewɔ lɛ, maŋ lɛ fɛɛ jo foi kutuu kɛba amɛŋɔɔ yɛ ablanaa ni atsɛɔ lɛ “Solomon Ablanaa” lɛ nɔ ni amɛhe ejɔ̃ amɛhe.

¹² Be ni Petro na enɛ lɛ, ekɛɛ maŋ lɛ akɛ, “Nyɛ Israelhii, mɛɛba nyɛhiɛ feɔ nyɛ yaa yɛ enɛ hewɔ, aloo mɛɛba nyɛkwɛɔ wɔ gãa nɛkɛ, tamɔ nɔ ni wɔ diɛŋtsɛ wɔhewalɛ loo wɔNyɔŋmɔjamɔ wɔkɛhã nuu nɛɛ nyiɛɔ nɛɛ?

¹³ Abraham kɛ Isak kɛ Yakob Nyɔŋmɔ lɛ ni ji wɔtsɛmɛi aNyɔŋmɔ lɛ ewo etsulɔ Yesu hiɛ nyam, Yesu mɔ ni nyɛjie lɛ nyɛhã ni nyɛkwa lɛ yɛ Pontio Pilato hiɛ, be ni lɛ lɛ ekpɛ mli akɛ eeeŋmɛɛ ehe lɛ.

¹⁴ Shi nyɛ lɛ, nyɛkwa Mɔ Krɔŋkrɔŋ kɛ Jalɔ lɛ, ni nyɛkpa fai akɛ akɛ gbɔmɔ awuyelɔ moŋ ake nyɛ,

¹⁵ ni Wala Lumɔ lɛ, nyɛgbe lɛ; shi Nyɔŋmɔ tee lɛ shi kɛjɛ gbohii ateŋ, ni no he odasefoi ji wɔ.

¹⁶ Ni egbɛi lɛ nɔ hemɔkɛyeli naa, ni egbɛi lɛ tsa nuu nɛɛ ni nyɛnaa ni nyɛle lɛ; ni enɔ hemɔkɛyeli lɛ ehã efee kpiŋtiŋkpliŋŋ yɛ nyɛ fɛɛ nyɛhiɛ nɛɛ.

¹⁷ “Ni agbɛnɛ, anyɛmimɛi, mile akɛ leee ni nyɛleee hewɔ ni nyɛfee, tamɔ nyɛnukpai lɛ nɔŋŋ;

¹⁸ shi nii ni Nyɔŋmɔ ekɛɛ eto momo yɛ egbalɔi lɛ fɛɛ anaa akɛ eKristo lɛ aaana amanehulu lɛ, ehã eba mli nakai.

¹⁹ No hewɔ lɛ, nyɛtsakea nyɛtsui ni nyɛkua nyɛsɛɛ, koni agbe nyɛhe eshai lɛ,

²⁰ bɔ ni afee ni mumɔŋ hewalɛwoo ko ajɛ Nuŋtsɔ lɛ hiɛ aba, ni eeetsu Yesu Kristo mɔ ni ejie eto ehã nyɛ momo lɛ;

²¹ mɔ ni sa akɛ ŋwɛi aŋɔ lɛ kɛyashi be ni aaato nibii fɛɛ ni Nyɔŋmɔ ewie he yɛ egbalɔi krɔŋkrɔŋi lɛ anaa kɛjɛ teteete lɛ gbɛjianɔ.

²² Ejaakɛ Mose kɛɛ akɛ, ‘Nuŋtsɔ, nyɛNyɔŋmɔ lɛ, aaatee gbalɔ ko ni tamɔ mi shi kɛaajɛ nyɛnyɛmimɛi lɛ ateŋ ahã nyɛ; nyɛboa lɛ toi yɛ nibii fɛɛ ni eeewie etsɔ̃ɔ nyɛ lɛ mli.

²³ Ni aaaba mli akɛ, mɔ fɛɛ mɔ ni boŋ nakai gbalɔ lɛ toi lɛ, aaakpãtã ehiɛ kwraa kɛaaje mɛi lɛ ateŋ!’

²⁴ Ni asaŋ gbalɔi fɛɛ hu ni wie kɛjɛ Samuel kɛ mɛi ni nyiɛ esɛɛ lɛ nɔ lɛ, amɛtsi nɛkɛ gbii nɛɛ atã amɛto.

²⁵ Nyɛ ji gbalɔi lɛ kɛ kpãŋmɔ lɛ bii, kpãŋmɔ ni Nyɔŋmɔ kɛ wɔtsɛmɛi lɛ kpãŋ, be ni ekɛɛ Abraham akɛ, ‘Ni oshwei mli aaajɔɔ shikpɔŋ lɛ nɔ wekui fɛɛ yɛ’ lɛ.

²⁶ Ni Nyɔŋmɔ tee etsulɔ Yesu lɛ shi lɛ, nyɛ tsutsu nyɛŋɔɔ etsu lɛ ni ebajɔɔ nyɛ ni ekpale nyɛteŋ mɔ fɛɛ mɔ kɛjɛ enifɔɔji anii lɛ ahe.”