Bɔfoi 17 - ŊMALƐ KRƆŊKRƆŊ LƐ

Paulo kɛ Sila yɛ Tesalonika

¹ Paulo kɛ Sila tsɔ̃ Amfipoli kɛ Apolonia, ni amɛba Tesalonika, he ni Yudafoi akpeehe ko yɔɔ lɛ.

² Ni Paulo tee amɛŋɔɔ tamɔ bɔ ni efɔɔ feemɔ lɛ, ni ekɛ amɛ yayiyii yɛ ŋmalɛi lɛ ahe hejɔɔmɔ gbii etɛ̃ sɔŋŋ,

³ ni etsɔ̃ɔ mli ni ekɛ ŋmalɛi lɛ amli saji tsɔ̃ɔ naa akɛ ja Kristo lɛ na amanehulu ni ete shi kɛjɛ gbohii ateŋ; ni esaa ekɛɛ, “Yesu nɛɛ, mɔ he sane ni mijajeɔ mitsɔ̃ɔ nyɛ lɛ, lɛ ji Kristo lɛ.”

⁴ Ni amɛteŋ mɛi komɛi he ye, ni amɛkɛ amɛhe kpɛtɛ Paulo kɛ Sila he; nakai nɔŋŋ Helabii Nyɔŋmɔ gbeyeishelɔi lɛ ateŋ mɛi babaoo kɛ yei hiɛnaanɔbii lɛ hu pii fee.

⁵ Shi efee Yudafoi krokomɛi lɛ atãŋ, ni amɛyakpala niiahetswialɔi lɛ ateŋ hii fɔ̃ji komɛi amɛfata amɛhe, ni be ni amɛfee asafo yuu lɛ, amɛwo maŋ lɛ mli hirihiri; ni amɛyatua Yason we lɛ amɛmiitao akɛ amɛkpala Paulo kɛ Sila amɛyahã maŋ lɛ.

⁶ Shi be ni amɛnaaa amɛ lɛ, amɛkpala Yason kɛ nyɛmimɛi lɛ ateŋ mɛi komɛi kɛtee maŋ lɛ onukpai lɛ ahiɛ ni amɛbolɔ akɛ, “Mɛnɛɛmɛi ni amɛtsɔ̃ jeŋ hiɛ ebu shi lɛ eba biɛ nɛɛ hu,

⁷ ni Yason ehere amɛ yɛ eshĩa; ni amɛ fɛɛ amɛkuɔ Kaisare mla lɛ nɔ, ni amɛkɛɔ akɛ maŋtsɛ kroko yɛ ni ji Yesu ko.”

⁸ Ni amɛhã maŋbii lɛ kɛ maŋ lɛ mli onukpai lɛ fɛɛ ejijaa kɛ nɛkɛ wiemɔi nɛɛ.

⁹ Ni be ni amɛhe sɛɛdaamɔnii yɛ Yason kɛ mɛi krokomɛi lɛ adɛŋ lɛ, amɛŋmɛɛ amɛhe.

Paulo kɛ Sila yɛ Beroia

¹⁰ Ni amrɔ̃ lɛ nyɛmimɛi lɛ jie Paulo kɛ Sila gbɛ nyɔɔŋ kɛtee Beroia. Ni be ni amɛshɛ jɛi lɛ, amɛyabote Yudafoi lɛ akpeehe lɛ mli.

¹¹ Shi mɛnɛɛmɛi asu hi fe mɛi ni yɔɔ Tesalonika lɛ, ni amɛ lɛ amɛhere wiemɔ lɛ kɛ amɛtsui fɛɛ, ni daa gbi lɛ amɛkpaa ŋmalɛi lɛ amli amɛkwɛɔ akɛ nibii nɛɛ yɛ mli nakai lo.

¹² Hewɔ lɛ amɛteŋ mɛi pii he ye, Helayei ni yɔɔ gbɛi kɛ hii hu pii.

¹³ Shi be ni Yudafoi ni yɔɔ Tesalonika lɛ nu akɛ Paulo eyajaje Nyɔŋmɔ wiemɔ lɛ yɛ Beroia hu lɛ, amɛba jɛi hu ni amɛbawo mɛi lɛ ayiŋ ni amɛhã amɛ jijaa.

¹⁴ Kɛkɛ ni amrɔ lɛ nyɛmimɛi lɛ yajie Paulo gbɛ ni eya ŋshɔnaagbɛ; shi Sila kɛ Timoteo hi Beroia.

¹⁵ Mɛi ni yajie Paulo gbɛ lɛ kɛ lɛ tee Atene tɔ̃ɔ; ni be ni eshɛ amɛ akɛ Sila kɛ Timoteo aba eŋɔɔ oya lɛ, amɛyi mli amɛtee.

Paulo yɛ Atene

¹⁶ Be ni Paulo mɛɔ Sila kɛ Timoteo yɛ Atene lɛ, ena akɛ eji maŋ ni eyi obɔ̃ kɛ amãgãi sɔŋŋ, ni ehao lɛ.

¹⁷ No hewɔ lɛ, ekɛ Yudafoi ni yɔɔ kpeehe lɛ kɛ Helafoi Nyɔŋmɔ gbeyeishelɔi lɛ kɛ mɛi ni kɛ lɛ kpeɔ daa gbi yɛ jara lɛ nɔ lɛ yiyii.

¹⁸ Shi nilelɔi ni ji Epikuromɛi kɛ Stoamɛi lɛ ateŋ mɛi komɛi kɛ lɛ taa naa ni mɛi komɛi kɛɛ, “Mɛni po naafuutsɛ nɛɛ taoɔ ekɛɛ?” Ni mɛi komɛi hu kɛɛ, “Etamɔ mɔ ni jajeɔ maŋsɛɛ jemawɔji ahe sane etsɔ̃ɔ.” Amɛkɛɛ enɛ ejaakɛ ejaje Yesu kɛ shitee lɛ he Sanekpakpa lɛ etsɔ̃ɔ amɛ.

¹⁹ Ni amɛŋɔ lɛ kɛtee Areopago (kojomɔhe) lɛ, ni amɛkɛɛ, “Ani ooohã wɔle nɔ tsɔ̃ɔmɔ hee ni owie he nɛɛ?

²⁰ Ejaakɛ ohã wɔtoii enu maŋsɛɛ saji; hewɔ lɛ wɔmiitao shishi wɔle.”

²¹ Shi Atenebii fɛɛ kɛ gbɔi ni yɔɔ jɛi lɛ, nɔ ni eshwɛ amɛ pɛ ji sane hee ko gbaa kɛ sane toiboo.

²² Ni Paulo yadamɔ Areopago lɛ teŋ ni ekɛɛ, “Ataamɛi Atenebii, miyoo yɛ nibii fɛɛ mli akɛ nyɛjaa wɔji pɛpɛɛpɛ.

²³ Ejaakɛ be ni mihoɔ ni mikwɛ nii ni nyɛjaa lɛ, mina afɔleshãa latɛ ko hu ni aŋma yɛ nɔ akɛ, ‘Nyɔŋmɔ ni aleee lɛ nɔŋ.’ No hewɔ lɛ, mɔ ni nyɛleee lɛ ni kɛ̃ lɛ nyɛjaa lɛ lɛ, lɛ nɔŋŋ ehe sane mijajeɔ mitsɔ̃ɔ nyɛ nɛɛ.

²⁴ Nyɔŋmɔ ni bɔ je lɛ kɛ emli nibii fɛɛ lɛ, lɛ ji ŋwɛi kɛ shikpɔŋ nuŋtsɔ lɛ; ehiii Sɔlemɔtsui ni akɛ niji ma amli,

²⁵ ni asaŋ akɛ gbɔmɛi aniji jaaa lɛ tamɔ mɔ ko ni nɔ ko fiɔ lɛ; lɛ moŋ edɛŋ wala kɛ mumɔ kɛ nii fɛɛ jɛɔ hãa gbɔmɛi fɛɛ;

²⁶ ni lá kome ekɛbɔ gbɔmɛi adesai fɛɛ, ni amɛhi shikpɔŋ lɛ fɛɛ nɔ, ni yinɔi ni eto lɛ kɛ amɛshihilɛhei lɛ ahusui lɛ ekpɛ mli eto momo,

²⁷ koni amɛtao Nyɔŋmɔ sɛɛgbɛ, akɛ aleenɔ, kɛ amɛgbugbuu shi lɛ, amɛaana lɛ lo; tsɛbelɛ ekɛ wɔteŋ mɔ ko mɔ ko teŋ jɛkɛɛɛ.

²⁸ Ejaakɛ, ‘Emli nɔŋŋ wɔhiɛ kãmɔ ni wɔtsiɔ wɔhe ni wɔyɔɔ yɛ;’ tamɔ bɔ ni nyɛ diɛŋtsɛ nyɛlalatsɛmɛi lɛ ekomɛi hu ekɛɛ lɛ akɛ, ‘Shi lɛ nɔŋŋ eshwiei ji wɔ hu.’

²⁹ Shi kɛ Nyɔŋmɔ shwiei ji wɔ lɛ, esaaa akɛ wɔsusuɔ akɛ Nyɔŋmɔ su lɛ tamɔ shika loo jwiɛtɛi loo tɛ ko ni gbɔmɔ kɛ eŋaa kɛ ejwɛŋmɔ fee.

³⁰ No hewɔ lɛ, bei ni aleee lɛ Nyɔŋmɔ eku ehiɛ efɔ̃ nɔ, shi agbɛnɛ lɛ eewo gbɔmɛi fɛɛ ni yɔɔ he fɛɛ he kitã akɛ amɛtsake amɛtsui,

³¹ ejaakɛ eto gbi ko, no nɔ ni ebaatsɔ̃ nuu ni eto lɛ nɔ ekojo jeŋ muu lɛ fɛɛ yɛ jalɛ naa; ni ekɛ shi ni etee lɛ kɛjɛ gbohii ateŋ lɛ maa enɛ nɔ mi ehãa mɔ fɛɛ mɔ.”

³² Shi be ni amɛnu gbohiiashitee he lɛ, mɛi komɛi ye ehe fɛo, ni mɛi komɛi hu kɛɛ, “Wɔɔsaa wɔbo owiemɔ nɛɛ toi ekoŋŋ.”

³³ No hewɔ lɛ, Paulo shi amɛ.

³⁴ Shi hii komɛi kɛ amɛhe kpɛtɛ ehe ni amɛhe amɛye; amɛteŋ mɛi komɛi ji Dionisio, Areopagonyo lɛ, kɛ yoo ko ni atsɛɔ lɛ Damari lɛ, kɛ mɛi krokomɛi ni fata amɛhe.