Bɔfoi 12 - ŊMALƐ KRƆŊKRƆŊ LƐ

Agbe Yakobo ni awo Petro tsuŋ

¹ Nakai bei lɛ amli nɔŋŋ lɛ, maŋtsɛ Herode kpã enine mli eta Kristo asafo lɛ he koni efee asafo lɛ mli bii lɛ ateŋ mɛi komɛi efɔŋ.

² Ni ekɛ klante gbe Yohane nyɛmi Yakobo.

³ Ni be ni ena akɛ eŋɔɔ Yudafoi lɛ anaa lɛ, etee nɔ ni emɔ Petro hu. Shi akpiti Gbii lɛ amli ni.

⁴ Ni be ni emɔ lɛ lɛ, ewo lɛ tsuŋ, ni etu lɛ ewo asraafoi akui ejwɛ ni mɛi ejwɛɛjwɛ yɔɔ mli dɛŋ ni amɛbu ehe; ni esusu akɛ Hehoo lɛ sɛɛ lɛ eeejie lɛ etsɔ̃ɔ maŋ lɛ.

⁵ Be mli ni atsi Petro naa yɛ tsu lɛ mli fɛɛ lɛ, asafo lɛ hiɛ sɔlemɔ mli kɛ lɛ hãmɔ waa diɛŋtsɛ yɛ Nyɔŋmɔ hiɛ.

Bɔfo ko jie Petro

⁶ Shi gbi ni Herode taoɔ akɛ ekɛ Petro aba maŋ lɛ hiɛ lɛ, nakai nyɔɔŋ lɛ mli nɔŋŋ lɛ, ekã asraafoi enyɔ teŋ eewɔ, ni awo lɛ kɔsɔŋkɔsɔi enyɔ, ni bulɔi hu damɔ shinaa lɛ naa amɛmiibu tsu lɛ he.

⁷ Ni naa, Nuŋtsɔ lɛ bɔfo ko badamɔ emasɛi, ni la kpɛ yɛ tsu lɛ mli ni egba Petro ŋmawu ma ni etsiɛ lɛ ekɛɛ, “Tee shi mramra!” Ni ekɔsɔŋkɔsɔi lɛ kpɔlɔ yɛ eniji.

⁸ Ni bɔfo lɛ kɛɛ lɛ akɛ, “Miamɔ ni owo otokotai lɛ!” Ni efee nakai. Ni ekɛɛ lɛ akɛ, “Kɛ obo lɛ akete ohe ni onyiɛ misɛɛ.”

⁹ Ni enyiɛ esɛɛ kɛje kpo, ni eleee akɛ nɔ ni bɔfo lɛ feɔ lɛ yɛ mli, shi efeɔ lɛ akɛ nii enaa.

¹⁰ Shi be ni amɛho klɛŋklɛŋ bulɔi lɛ kɛ mɛi ni ji enyɔ lɛ ahe lɛ, amɛshɛ dade agbo ni kã kɛyaa maŋ lɛ mli lɛ he, ni lɛ diɛŋtsɛ egbele ehe ehã amɛ, ni amɛje kpo ni amɛfo blohu kome mli, ni amrɔ lɛ bɔfo lɛ shi lɛ.

¹¹ Ni be ni Petro hiɛ tserɛ lɛ lɛ, ekɛɛ, “Kpaako mina mile krɛdɛɛ akɛ Nuŋtsɔ lɛ etsu ebɔfo lɛ kɛba, ni ebajie mi yɛ Herode dɛŋ kɛ nɔ ni Yudafoi lɛ amaŋ lɛ kwɛɔ gbɛ lɛ fɛɛ mli.”

¹² Ni be ni eyɔse enɛ lɛ, eba Yohane ni atsɛɔ lɛ Marko hu lɛ nyɛ Maria we lɛ, he ni mɛi pii anaa ebakpe shi ni amɛsɔleɔ yɛ lɛ.

¹³ Ni be ni Petro shi agbo lɛ, oblayoo ko ni atsɛɔ lɛ Roda lɛ ba toiboo;

¹⁴ ni be ni eyoo Petro gbee lɛ, miishɛɛ sɔŋŋ naa lɛ egbeleee agbo lɛ, shi moŋ ejo foi kɛtee tsu lɛ mli eyakɛɛ akɛ Petro damɔ agbo lɛ sɛɛ.

¹⁵ Shi amɛkɛɛ lɛ akɛ, “Oye sɛkɛ!” Shi ema nɔ mi akɛ eyɛ mli nakai. Kɛkɛ ni amɛkɛɛ, “Belɛ ebɔfo ni.”

¹⁶ Shi Petro kã he eeshi; ni be ni amɛgbele lɛ, amɛna lɛ, ni amɛnaa kpɛ amɛhe.

¹⁷ Shi efɔ̃ amɛ nine akɛ amɛfee dioo, ni egba amɛ bɔ ni Nuŋtsɔ lɛ fee ni ejie lɛ yɛ tsu lɛ mli lɛ; ni ekɛɛ, “Nyɛyaa ni nyɛyagbaa Yakobo kɛ nyɛmimɛi lɛ nɛkɛ nibii nɛɛ.” Ni eje jɛi etee he kroko.

¹⁸ Shi be ni je tsɛre lɛ, yoyoromɔ ni asraafoi lɛ yoyoro yɛ le ni amɛleee nɔ ni eba Petro nɔ lɛ hewɔ lɛ, jeee hiɛ nɛ.

¹⁹ Agbɛnɛ be ni Herode taoɔ lɛ ni enaaa lɛ lɛ, ekojo bulɔi lɛ ni efã akɛ ayagbe amɛ. Ni Herode je Yudea etee Kaisarea ni eyahi jɛi.

Herode gbele

²⁰ Shi Herode mli efu Tirobii kɛ Sidonbii lɛ naakpa; no hewɔ lɛ, amɛkɛ jwɛŋmɔ kome ba eŋɔɔ, ni amɛbatao maŋtsɛ lɛ piafonyo ni gbɛi ji Blasto lɛ hiɛgbɛ ni amɛyakpa hejɔlɛ he fai, ejaakɛ maŋtsɛ lɛ shikpɔŋ lɛ nɔ amɛnaa amɛniyenii kɛjɛɔ.

²¹ Gbi ni ato ko nɔ lɛ Herode wo emaŋtsɛ atade lɛ ni eyata kojomɔ sɛ̃i lɛ nɔ, ni ekɛ maŋ lɛ wie.

²² Ni mɛi lɛ bolɔ akɛ, “Nyɔŋmɔ gbee nɛ, shi jeee gbɔmɔ gbee ni.”

²³ Ni amrɔ lɛ nɔŋŋ lɛ, Nuŋtsɔ lɛ bɔfo tswa lɛ nɔ, ejaakɛ ekɛ anunyam lɛ hãaa Nyɔŋmɔ, ni gɔgɔmii ye lɛ, ni egbo.

²⁴ Agbɛnɛ Nyɔŋmɔ wiemɔ lɛ ni egbɛ eshwã eshwere.

²⁵ Be ni Barnaba kɛ Saul egbe amɛsɔ̃ɔmɔ lɛ naa lɛ, amɛku amɛsɛɛ kɛjɛ Yerusalɛm ni amɛŋɔ Yohane, mɔ ni atsɛɔ lɛ Marko hu lɛ, amɛfata amɛhe.