Abe̱i 9 - ŊMALƐ KRƆŊKRƆŊ LƐ

Nilee kɛ kwashiafeemɔ

¹ Nilee ema etsu kɛ ehe akulashiŋi kpawo.

² Egbe elɛɛ kooloi; efutu ewain lɛ, ni eŋmɛ ekpɔlɔ̃ lɛ hu.

³ Etsu etsuji yei lɛ kɛtee maŋ lɛ mli hei grɔŋŋi fe fɛɛ lɛ, ni amɛyatsɛ mɛi akɛ,

⁴ “Mɔ ni jwɛŋmɔ esako lɛ, ebatsɔ̃ biɛ,” ni mɔ ni bɛ jwɛŋmɔ lɛ, ekɛɔ lɛ akɛ,

⁵ “Ba ni obaye miniyenii lɛ eko ni obanu wain ni mifutu lɛ eko.

⁶ Kaaŋɔ ohe obɔ kwashia he, koni oyi ana wala; ni dii sanesɛɛkɔmɔ sɛɛ.”

⁷ Mɔ ni jajeɔ hefɛoyelɔ jeŋba lɛ, enaa jɛmɔ; ni mɔ ni kãa yiwalɔ lɛ, enaa pilamɔ.

⁸ Hɛfɛoyelɔ lɛ kɛ okã ehiɛ lɛ, ebaanyɛ bo; shi nilelɔ lɛ kɛji okã ehiɛ lɛ, ebaasumɔ bo.

⁹ Tsɔ̃ɔmɔ nilelɔ nii, ni eeele nii efata nɔ ni ele momo lɛ he; tsɔ̃ɔmɔ jalɔ nii, ni enilee aaafa.

¹⁰ Yehowa gbeyeishemɔ ji nilee shishijee; ni Mɔ Krɔŋkrɔŋ lɛ lee ji sanesɛɛkɔmɔ.

¹¹ Ejaakɛ minɔ baatsɔ̃ ni ogbii baafa; ni owala afii lɛ asɛɛ baatsɛ.

¹² Kɛ ole nii lɛ, ole ohã ohe; shi kɛ hefɛoyelɔ ji bo lɛ, bo okome obaatere.

¹³ Yoo kwashia lɛ, naawalɔ ni, ebɛ jwɛŋmɔ, ni ehiɛgbele tɔ ejwa.

¹⁴ Etaa shi yɛ lɛ diɛŋtsɛ eshinaa shi; etaa hei grɔŋŋi lɛ yɛ maŋ lɛ mli;

¹⁵ ni etsɛɔ mɛi ni hoɔ ni amɛnyiɛ amɛ diɛŋtsɛ amɛgbɛ nɔ tɛ̃ɛ lɛ.

¹⁶ Ekɛɔ akɛ, “Mɔ ni jwɛŋmɔ esako lɛ, eba biɛ,” ni mɔ ni bɛ jwɛŋmɔ lɛ ekɛɔ lɛ akɛ,

¹⁷ “Nu ni ayaju lɛ, enumɔ ŋɔɔ. Ni aboloo ni ateɔ ayeɔ lɛ eyɛ akɔnɔ.”

¹⁸ Mɛi ni ekpeɔ kɛyaa ewe lɛ leee akɛ mɛi fɛɛ ni yaa jɛi lɛ gboiɔ; amɛleee akɛ mɛi ni akpee kɛtee jɛi momo lɛ gbohiiaje tɔ̃ɔ amɛyɔɔ lɛ.