Abe̱i 5 - ŊMALƐ KRƆŊKRƆŊ LƐ

Gbãlãfitemɔ he kɔkɔbɔɔ

¹ Mibi, bo minilee lɛ toi, ni oka otoi ohã miniiashishinumɔ;

² koni ole sanesɛɛkɔmɔ, ni odaaŋ wiemɔi aaajie onilee kpo.

³ Ejaakɛ yoo ni bɛ jeŋba lɛ, enaa ŋɔɔ tamɔ wo, ni edaaŋ shamɔɔ fe eŋmɔmi.

⁴ Ni naagbee mli lɛ ejoɔ tamɔ taatso; enaaba tamɔ klante kɛ enaa nta.

⁵ Enyiɛ gbele gbɛ, ni ebaakpala bo kɛya gbohiiaje.

⁶ Enyiɛɛɛ wala gbɛ, hewɔ lɛ eduɔ gbɛ ni eleee.

⁷ No hewɔ lɛ, agbɛnɛ, mibi, bo mi toi, ni kaashi miwiemɔi lɛ asɛɛ.

⁸ Tsi ohe kɛje nɛkɛ yoo he kwraa. Kaabɛŋkɛ ewe lɛ shinaa lɛ naa tete.

⁹ Kɛjeee nakai lɛ obulɛ baalaaje, ni yiwalɔi aaafo owala sɛɛ;

¹⁰ asaŋ nii ni okɛ ohewalɛ tsu lɛ gbɔi baaye amɛtɔrɔ; ni nibii ni ogbo deŋme yɛ amɛhe lɛ aaaya mɔkpɔŋ ko we.

¹¹ Ni onaagbee mli lɛ, be ni ohewolo kɛ ogbɔmɔtso hiɛ ekpãtã lɛ obaakɛ̃mɔ.

¹² No be mli oookɛɛ akɛ, “Mɛɛ hewɔ kwraa minyɛ tsɔsemɔ, ni mikpoo kamɔ̃ kɛjɛ mitsui mli tɔ̃ɔ nɛɛ?

¹³ Mibooo mitsɔ̃ɔlɔi atoi, ni mikaaa mitoi mihãaa mɛi ni tsɔ̃ɔ mi nii lɛ.

¹⁴ Shwɛ shrao ni mihiɛ akpãtã kwraa yɛ asafo lɛ mli.”

¹⁵ Ye oŋa anɔkwa, ni oŋɔ suɔmɔ ohã lɛ ekoome pɛ tamɔ bɔ ni mɔ nuɔ lɛ diɛŋtsɛ egbɛ mli nu lɛ.

¹⁶ Ejaakɛ bii ni okɛ yei krokomɛi aaafɔ lɛ, onaŋ amɛhe sɛɛ.

¹⁷ Obii lɛ adara yɛ bo diɛŋtsɛ owe, koni amɛye amɛbua bo diɛŋtsɛ, shi jeee mɛi kpɔ̃ji.

¹⁸ No hewɔ lɛ, na oŋa he miishɛɛ koni omii ashɛ oblahiiaŋ yoo ni oyakpee lɛ he.

¹⁹ Ehe fɛo tamɔ ofrote, ni ehe yɛ akɔnɔ tamɔ yɔɔ; ehe akɔnɔ lɛ ashɛje omii be fɛɛ be; hã ni esuɔmɔ aŋɔ bo nom.

²⁰ Shi mibi, mɛɛba yoo ni bɛ jeŋba he feɔ bo akɔnɔ, ni oloɔ yoo mɔkpɔŋ atuu?

²¹ Ejaakɛ Yehowa lɛ, enaa nɔ fɛɛ nɔ ni afeɔ, ni eekwɛ oyaa kɛ obaa fɛɛ.

²² Mɔ fɔŋ lɛ enifɔji anii lɛ nɔŋŋ duɔ lɛ tamɔ tsɔne, ni eshai ni efeɔ lɛ nɔŋŋ fimɔɔ lɛ tamɔ kpãa.

²³ Egboɔ ejaakɛ ebɛ tsɔsemɔ, ni ekwashiafeemɔ babaoo hewɔ lɛ ehiɛ kpãtãa.