Abe̱i 31 - ŊMALƐ KRƆŊKRƆŊ LƐ

Ŋaa ni awo Maŋtsɛ ko

¹ Gbalɛ wiemɔi ni Maŋtsɛ Lemuel nyɛ kɛtsɔse lɛ nɛ.

² Ao mibi! Ao mimusuŋbi! Ao mishiwoi abi,

³ kaafite ohewalɛ yɛ yei ahe, ni kaanyiɛ maŋtsɛmɛi afitemɔ gbɛi lɛ anɔ.

⁴ Oo, Lemuel, esaaa maŋtsɛmɛi akɛ amɛnu wain; aloo nɔyelɔi akɛ amɛaadi dãa ni wa sɛɛ.

⁵ Kɛji amɛnu lɛ amɛhiɛ aaakpa mla nɔ, ni amɛaatsɔ̃ nɔnalɔi fɛɛ asane hiɛ amɛbu shi.

⁶ Okɛ dãa ni wa ahã mɔ ni hiɛ heɔ akpãtã, ni okɛ wain ahã mɛi ni amɛwerɛ eho amɛhe lɛ;

⁷ hã amɛnu koni amɛhĩɛ akpa amɛhia nɔ, ni amɛkakai amɛhaomɔ lɛ dɔŋŋ.

⁸ Wiemɔ ohã mumuii ni nyɛɛɛ awie lɛ; ni ofã mɛi fɛɛ ni nyɛɛɛ amɛhe amɛfã lɛ ahe.

⁹ Wiemɔ ni okojo ohã amɛ yɛ jalɛ naa; ye ohiafoi kɛ mɛi ni efi amɛ lɛ asane ohã amɛ.

Yoo kpakpa

¹⁰ Yoo kpakpa lɛ namɔ aaana? Ejara wa aahu fe tɛ̃ŋlɛ̃o.

¹¹ Ewu kɛ ehiɛ fɔ̃ɔ enɔ; ni lɛ wu lɛ, sɛɛnamɔ ko ebɔŋ lɛ.

¹² Yoo lɛ, ewalabeiaŋ fɛɛ lɛ, ejurɔ efeɔ ewu lɛ; shi jeee efɔŋ.

¹³ Ebɔɔ toohetsɔi kɛ odonti he mɔdɛŋ; ekɛ enine tsuɔ nii kɛ tsuijurɔ.

¹⁴ Etamɔ jarayeli lɛji ni yaa shɔŋŋ yaŋɔɔ niyenii kɛbaa.

¹⁵ Be ni je tsɛreko po lɛ, eteɔ shi ni efeɔ niyenii ehãa eshĩaŋbii, ni etsɔ̃ɔ eweyei lɛ amɛgbɛnaa nitsumɔ.

¹⁶ Ekwɛɔ shikpɔŋ ni hi ni eheɔ, ni ejɛɔ eninenaa nitsumɔ mli efeɔ abɔɔ.

¹⁷ Emiaa, ni etsuɔ nii kɛ ehewalɛ fɛɛ.

¹⁸ Ekwɛɔ jogbaŋŋ dani eheɔ jarayeli nii ni sɛɛnamɔ yɔɔ he; ekane tete gbooo nyɔɔŋ.

¹⁹ Ekɛ enine mɔɔ odonti mlijiemɔ tso mli, ni ekɛ enine nɔŋŋ hiɛɔ akeke lɛ ni ekɛloɔ mama.

²⁰ Egbeleɔ edɛŋ ehãa nɔnalɔ, ni ekpãa enine mli ehãa ohiafo.

²¹ Esheee snoo gbeyei yɛ eshĩaŋbii lɛ ahewɔ, ejaakɛ shĩaŋbii lɛ fɛɛ bumɔɔ mama tsuji fɛɛfɛji.

²² Eloɔ saanɔboi ehãa ehe; klala fɛɛfɛo kɛ afaseo mama ji ehe bo.

²³ Ayoɔ ewu yɛ koi shi, kɛji ekɛ maŋ onukpai tara shi lɛ.

²⁴ Ekpɛɔ klala atadei kɛ hɛfiinɔ, ni ehɔ̃ɔ ehãa guɔyelɔ.

²⁵ Ehewulamɔ mli ehewalɛ kɛ ehiɛnyam yɔɔ; ni eŋmɔɔ be ni baaba lɛ.

²⁶ Ewieɔ nilee wiemɔ, ni etsɔseɔ mɔ kɛ mlihilɛ wiemɔ.

²⁷ Ekwɛɔ eshĩaŋbii lɛ ayaa kɛ baa jogbaŋŋ, ni efeee hejɔ̃ kwraa.

²⁸ Ebii teɔ shi ni amɛjɔɔ lɛ daa; ni ewu hu kafoɔ lɛ.

²⁹ Ewu kɛɔ lɛ akɛ, “Yei pii ebɔ mɔdɛŋ moŋ, shi bo lɛ ota amɛ fɛɛ amɛnɔ!”

³⁰ Hiɛnyam lɛ lakamɔ ni; ni hefɛo hu, yakayakanɔ ni; shi yoo ni sheɔ Yehowa gbeyei lɛ, aaakafo lɛ.

³¹ Nyɛŋɔa eninenaa nitsumɔi lɛ eko nyɛhãa lɛ, ni hã enitsumɔi lɛ ajie eyi yɛ koii lɛ ashi.