Abe̱i 30 - ŊMALƐ KRƆŊKRƆŊ LƐ

Agur Abɛi

¹ Yake bi Agur abɛi nɛ. Nɛkɛ nuu nɛɛ kɛɛ Itiel kɛ Ukal akɛ,

² “Lɛɛlɛŋ, mifaŋ kooloo; mijeee gbɔmɔ, ni mibɛ gbɔmɔ jwɛŋmɔ hu.

³ Mikaseko nilee, ni asaŋ mileee Mɔ Krɔŋkrɔŋ lɛ he nɔ ko.

⁴ Namɔ ekwɔ kɛtee ŋwɛi, ni esaa ekpeleke shi? Namɔ ebua kɔɔyɔɔ naa yɛ ekɔkɔŋ dã? Namɔ efi nu yɛ emama mli dã? Namɔ ŋɔ shikpɔŋ lɛ koji lɛ emamɔ shi? Te egbɛi hu? Ni mɛni ji ebi lɛ hu gbɛi? Bɛ ole?

⁵ Nyɔŋmɔ wiemɔ fɛɛ wiemɔ lɛ, anɔkwale ni; Nyɔŋmɔ ji tsɛŋ kɛhã mɛi ni baa lɛ abo lɛ.

⁶ Kaaŋɔ nɔ ko ofata ewiemɔi lɛ ahe, kɛjeee nakai lɛ, eeekã ohiɛ, ni oootsɔ̃ amalelɔ.”

Abɛi krokomɛi hu

⁷ Naa Nyɔŋmɔ, bo odɛ̃ŋ mibiɔ nibii enyɔ yɛ; kaakãmã mi dani migbo.

⁸ Hã mi kɛ kutumpɔo kɛ nablaba teŋ ajekɛ. Kaahã miye ohia lɛ, asaŋ kaahã mina nii hu. Lɛɛ mi kɛ niyenii pɛ ni ehĩa mi,

⁹ koni mikatɔ tsɔ̃, ni mikwa bo, ni mikɛɛ akɛ, “Namɔ ji Yehowa”. Ni kaahã miye ohia, ni miyaju, ni mikɛgbe miNyɔŋmɔ lɛ gbɛi he guɔ.

¹⁰ Kaaye tsulɔ ko he osheku ohã enuŋtsɔ, koni tsulɔ lɛ akabalomɔ bo, ni ebu bo fɔ.

¹¹ Mɛi komɛi yɛ ni amɛlomɔɔ amɛtsɛmɛi, ni amɛjɔɔɔ amɛnyɛmɛi hu.

¹² Mɛi komɛi yɛ ni amɛbuɔ amɛhe akɛ amɛ lɛ, amɛhe tse; tsɛbelɛ, amɛhe ewo muji kpɔtɔɔ.

¹³ Mɛi komɛi yɛ ni woɔ amɛhe nɔ; lɛɛlɛŋ amɛsusuɔ akɛ gbɔmɛi wuji ji amɛ.

¹⁴ Mɛi komɛi yɛ ni amɛnyanyɔji lɛ klantei ni; amɛnyanyɔji lɛ kaklai ni; ni amɛkɛtserɛɔ ohiafoi amli kɛjeɔ shikpɔŋ lɛ nɔ; amɛkɛtserɛɔ mɛi ni efi amɛ lɛ kɛjeɔ gbɔmɛi ateŋ.

¹⁵ Shiti yɛ biyei enyɔ, atsɛɔ amɛ akɛ, “Hã mi, Hã mi”. Nibii etɛ̃ etɔɔɔ amɛ, ni nɔ ni ji ejwɛ tete kplokaaa amɛ.

¹⁶ Nibii ejwɛ komɛi yɛ ni amɛtɔrɔko dã; nomɛi ji gbohiiaje kɛ musu ni fɔɔɔ, kɛ shikpɔŋ gbiŋ ni etɔɔɔ nu, kɛ la ni esraŋ nɔ.

¹⁷ Mɔ ni yeɔ etsɛ he fɛo ni egbeɔ enyɛ tsɔsemɔ he guɔ lɛ, kwãakwãalabitei aaafãmɔ ehiŋmɛii, ni akpaŋai aaaye eloo.

¹⁸ Nibii etɛ̃ yɛ ni feɔ mi naakpɛɛ tsɔ̃, ni nɔ ni ji ejwɛ lɛ minuuu shishi;

¹⁹ nomɛi ji, okropɔŋ filikimɔ yɛ ŋwɛi, kɛ onufu nyiɛmɔ yɛ tɛsaa nɔ, kɛ meele nyiɛmɔ yɛ ŋshɔ hiɛ, kɛ bɔ ni feɔ ni suɔmɔ baa nuu kɛ yoo teŋ.

²⁰ Nɛkɛ pɛ yoo ajwamãŋ yɔɔ; eyeɔ nii ni etsumɔɔ enaa, ni ekɛɔ akɛ, “Mifeko efɔŋ ko.”

²¹ Nibii etɛ̃ hãa shikpɔŋ hosoɔ, ni nɔ ni ji ejwɛ lɛ, enyɛɛɛ mli emɔ,

²² Nomɛi ji, nyɔŋ ni etsɔ̃ maŋtsɛ; kɛ buulu ni eye nii etɔ;

²³ kɛ yoo ni akpoo lɛ, ni ena wu; kɛ tsulɔyoo ni etsɔ̃ enuŋtsɔ ŋa.

²⁴ Nibii ejwɛ yɛ shikpɔŋ lɛ nɔ ni amɛdaraaa; shi amɛle nii pam.

²⁵ Amɛ ji tsatsubii; amɛ lɛ kooloi bibii ni he waaa ni, shi kɛ̃lɛ amɛtaoɔ amɛniyenii amɛtoɔ yɛ latsaa be mli.

²⁶ Afutuɔkɔi hu kooloi ni he waaa ni, kɛ̃lɛ amɛfeɔ amɛtsui yɛ tɛsai amli.

²⁷ Baalabii hu amɛbɛ maŋtsɛ nɛ, shi kɛ̃lɛ amɛfãa yɛ amɛnɔkwɔlɛi anaa.

²⁸ Ooonyɛ okɛ onine amɔ tsunyɛ nɛ, shi kɛ̃lɛ maŋtsɛmɛi amɔjiaŋ ehiɔ.

²⁹ Nibii etɛ̃ yɛ ni amɛfamɔɔ amɛnaji abladeiaŋ; ni nɔ ni ji ejwɛ lɛ, enyiɛmɔ yɛ fɛo.

³⁰ Nomɛi ji jata, ni ji kooloi ateŋ ekãalɔ fe fɛɛ, ni etsɔ̃ɔɔ esɛɛ ehãaa mɔ ko mɔ ko

³¹ kɛ wuɔnuu saase, kɛ too kpakpo kɛ maŋtsɛ ni nyiɛ ewebii ahiɛ abladeiaŋ.

³² Kɛji ofee buuluianii, ni owo ohe nɔ, aloo ojwɛŋ jwɛŋmɔ fɔŋ lɛ, okɛ onine ato onaabu.

³³ Ejaakɛ kɛji osha fufɔ yɛ tɔ mli lɛ, onaa butru; kɛji oka gugɔ̃ atswɛrɛ lɛ lá jeɔ; ni kɛji owo mɔ ko mli la lɛ bei baa.