Abe̱i 26 - ŊMALƐ KRƆŊKRƆŊ LƐ

¹ Snoo enɛɛɛ yɛ latsa be mli, ni nu enɛɛɛ yɛ nikpamɔ beiaŋ, nakai hiɛnyam esaaa kwashia.

² Bɔ ni aflimata filikiɔ ni nyɔŋmɔbitɛte filikiɔ lɛ, nakai yaka loomɔ mɔɔɔ mɔ.

³ Kpelebi sa okpɔŋɔ, ni manyoflɛ sa teji, ni kpãa sa kwashia kotosɛɛ.

⁴ Kaakwɛ kwashia sanebimɔ ni ohã lɛ nakai hetoo, no lɛ oootsɔ̃ tamɔ lɛ.

⁵ Kwɛmɔ kwashia sanebimɔ ni oha lɛ hetoo, koni ekabu ehe nilelɔ.

⁶ Mɔ ni kɛ shɛɛ tsuɔ kwashia lɛ, eetɔ̃tɔ̃ lɛ diɛŋtsɛ enane, ni eetao sane ehã ehe.

⁷ Bɔ ni obubuafo naji tsotsoroɔ ehe ni hewalɛ bɛ mli lɛ, nakai nɔŋŋ kwashia daaŋ abɛ yɔɔ efolo.

⁸ Mɔ ni woɔ kwashia hiɛ nyam lɛ, etamɔ mɔ ko ni ekɔ tɛ ewo akromia mli.

⁹ Bɔ ni ŋmei tso yɔɔ yɛ dãatɔlɔ dɛŋ lɛ, nakai abɛ yɔɔ yɛ kwashia daaŋ.

¹⁰ Mɔ ni bɔɔ kwashia loo dãatɔlɔ ni miiho apaa lɛ, etamɔ gãitsɛ̃lɔ ni miipila mɔ fɛɛ mɔ kɛkɛ.

¹¹ Kwashia ni kuɔ esɛɛ eyafeɔ ebuuluianii ekoŋŋ lɛ, etamɔ gbee ni kuɔ esɛɛ kɛyaa eshwee he.

¹² Hiɛnɔkãmɔ yɛ ha kwashia fe gbɔmɔ ni buɔ ehe nilelɔ yɛ lɛ diɛŋtsɛ ehiɛ.

¹³ Anihaolɔ ji mɔ ni kɛɔ akɛ, “Jata yɛ gbɛ lɛ nɔ; jata yɛ blohui lɛ amli.”

¹⁴ Bɔ ni shinaa tsɔ̃mɔɔ yɛ esɛɛ sai anɔ pɛ lɛ, nakai anihaolɔ hetsɔ̃ɔmɔ yɔɔ yɛ esaa mli.

¹⁵ Anihaolɔ kɛ enine woɔ kã mli, shi ewaa ehãa lɛ akɛ, ekɛ enine lɛ aaawo edaaŋ tete.

¹⁶ Anihaolɔ buɔ ehe nilelɔ yɛ lɛ diɛŋtsɛ ehiɛ, fe nilelɔi kpawo ni hãa sane hetoo ni ja.

¹⁷ Mɔ ni kɛ ehe woɔ bei ni kɔɔɔ ehe eko mli lɛ, etamɔ mɔ ko ni mɔɔ gbee gbɔ ni miiho toi mli.

^18-19 Mɔ ni shishiuɔ enaanyo, ni ekɛɔ lɛ akɛ, “Shwɛmɔ kɛkɛ mikɛ bo shwɛɔ” lɛ, etamɔ sɛkɛyelɔ ni kɛ latsei kɛ gãii kɛ gbele shwɛɔ.

²⁰ Kɛji lai tã lɛ, la gboɔ; ni kɛji ablɛbiwielɔ bɛ lɛ bei sɛɛ foɔ.

²¹ Bɔ ni ŋai hãaa lasrɛmi agbo, ni lai hãaa la agbo lɛ, nakai nɔŋŋ beilɔ hãa bei mli waa.

²² Ablɛbiwielɔ wiemɔ tamɔ dɔkɔdɔkɔnii ni ŋɔɔ jogbaŋŋ ni wɔsumɔɔ akɛ wɔye wɔwo wɔmusuŋ obɔ̃.

²³ Naa dɔkɔbii wiemɔ ni jɛɛɛ tsuijurɔ mli lɛ, etamɔ ŋɛsuko ni akɛ jwiɛtɛi ekpa he.

²⁴ Nyɛlɔ kɛ enaabu saa ewiemɔ he, shi etsuiŋ lɛ, eelaka mɔ.

²⁵ Kɛji eewie dɔkɔbii lɛ, kaahe lɛ oye, ejaakɛ yiŋtoi fɔ̃ji eyi etsui mli obɔ̃.

²⁶ Ekɛ emɔnyɛɛ teɔ nɛ, shi aaajie egbɔmɔ fɔŋ lɛ kpo atsɔ̃ɔ yɛ asafo hiɛ kɛ̃.

²⁷ Mɔ ni kɛ yiŋtoo fɔŋ tsaa bu lɛ, lɛ nɔŋŋ eeegbee mli; ni mɔ ni kɛ yiŋsha kokloɔ tɛ lɛ, lɛ nɔŋŋ enɔ tɛ lɛ aaaku sɛɛ agbee.

²⁸ Kɛji oonyɛ mɔ ko lɛ, no owieɔ omaleɔ ehe efɔŋ; ni mɔ yiteŋ mluwoo lɛ ekɛ shigbeemɔ baa.