Abe̱i 24 - ŊMALƐ KRƆŊKRƆŊ LƐ

- 19 -

¹ Ohiɛ akakɔ̃ gbɔmɛi fɔ̃ji anɔ, ni okashwe hu akɛ okɛ amɛ aaabɔ naanyo tete.

² Ejaakɛ be fɛɛ be lɛ yiwalɛ nifeemɔi ahe ŋaa amɛjwɛŋmɔ toɔ, ni amɛwieɔ wiemɔi gbohii.

- 20 -

³ Nilee akɛmaa tsu, ni niiashishinumɔ akɛhãa emaa shi.

⁴ Ni nilee akɛhãa piai amli yimɔɔ kɛ nii fɛɛ ni jara wa ni yɔɔ fɛo.

- 21 -

⁵ Nuu nilelɔ lɛ ehe wa fe nuu kakabãŋ; ni nuu ni le nii lɛ efe nuu ni he wa.

⁶ Ejaakɛ ŋaa akɛwuɔ ta, ni ŋaawolɔi pii aŋaawoo akɛyeɔ kunim.

- 22 -

⁷ Nilee mli kwɔ tsɔ̃ hã kwashia, hewɔ lɛ etswaaa esɛŋ yɛ koi shi.

- 23 -

⁸ Mɔ ni toɔ efɔŋfeemɔ he ŋaa lɛ, lɛ atsɛɔ lɛ ablofo.

⁹ Mɔ buulufeemɔ he ŋaatoo lɛ esha ni; ni hefɛoyelɔ hu gbɔmɛi miihi.

- 24 -

¹⁰ Kɛji otɔ biti yɛ haomɔ gbi nɔ lɛ, no tsɔ̃ɔ akɛ ohewalɛ faaa.

- 25 -

¹¹ Mɛi ni aakpala amɛ ayagbe amɛ yakatswaa lɛ, heremɔ amɛyiwala; ni mɛi hu ni miididãa, ni akɛ amɛmiiya gbeehe lɛ, okaku ohiɛ ofɔ̃ amɛnɔ.

¹² Kɛji okɛɛ akɛ, “Wɔleee enɛ wɔto” lɛ, ani mɔ ni naa tsuiaŋnii lɛ, mɔ ni buɔ osusuma he lɛ, eleee, eleee akɛ ole oto lo? Ani ewooo mɔ fɛɛ mɔ nyɔmɔ yɛ enitsumɔ naa?

- 26 -

¹³ Mibi, ye wo ejaakɛ ehi, ni bɔ ni wo ni tsereɔ kɔikɔi kɛjɛɔ wo agbaku mli ŋɔɔ onaa lɛ, nakai nɔŋŋ nilee ŋɔɔ osusuma diɛŋtsɛ naa.

¹⁴ Kɛ ona nilee lɛ aaahi aha bo wɔsɛɛ, ni ohiɛnɔkãmɔ efeŋ yaka.

- 27 -

¹⁵ Gbɔmɔ fɔŋ, kaawo jalɔ shihilɛhe lɛ he ka, ni kaahao ehejɔɔmɔhe lɛ hu.

¹⁶ Ejaakɛ jalɔ gbeɔ shi shii kpawo, ni eteɔ shi ekoŋŋ; shi efɔŋfeelɔ lɛ amanehulu butuɔ lɛ kwrakwra.

- 28 -

¹⁷ Kɛji ohenyɛlɔ gbee shi lɛ, kaanya, ni kɛji etɛ lɛ, omli akafili bo.

¹⁸ No lɛ, Yehowa aaana, ni eeedɔ lɛ, ni ebaafo emli ni efu lɛ lɛ sɛɛ.

- 29 -

¹⁹ Kaawo otsui he la yɛ efɔŋfeelɔi ahewɔ, ni ohiɛ akakɔ̃ mɛi fɔ̃ji anɔ.

²⁰ Nɔ kpakpa ko bɛ hã mɔ fɔŋ wɔsɛɛ, ni efɔŋfeelɔi akane lɛ hu aaagbe.

- 30 -

²¹ Mibi, she Yehowa gbeyei, kɛ maŋtsɛ hu; ni kaatse amɛteŋ mɔ ko hiɛ atua.

²² Ejaakɛ amɛaanyɛ amɛkpãtã ohiɛ trukaa; ni namɔ le nɔ hiɛkpãtãmɔ ni aaajɛ amɛyi enyɔ lɛ fɛɛ amɛdɛŋ lɛ?

Nilee wiemɔi krokomɛi hu nɛ

²³ Nilelɔi awiemɔi lɛ ekomɛi hu nɛ. Hiɛaŋkwɛmɔ yɛ kojomɔ mli lɛ, ehiii.

²⁴ Mɔ ni kɛɔ efɔŋfeelɔ akɛ, “Oye bem” lɛ, mɛi aaalomɔ lɛ; majimaji aaanyaŋe lɛ.

²⁵ Mɛi ni kãa efɔŋfeelɔ lɛ aaana miishɛɛ; ni jɔɔmɔ kpakpa aaaba amɛnɔ.

²⁶ Mɔ ni hãa hetoo ni ja lɛ, ohe suɔlɔ ni.

²⁷ Too onitsumɔ he gbɛjianɔ jogbaŋŋ, feemɔ oŋmɔshinii fɛɛ kralo, no sɛɛ dani obɔi otsu maa.

²⁸ Kaaye odase oshi onaanyo yakatswaa, ni okɛ onaabu hu akashishiu mɔ ko.

²⁹ Kaakɛɛ akɛ, “Bɔ ni efee mi lɛ, nakai mafee lɛ mato najiaŋ, nɔ ni efee mi lɛ, mawo lɛ he nyɔmɔ.”

³⁰ Mitsɔ̃ anihaolɔ ko ŋmɔ he, kɛ mɔ ni bɛ yitsoŋ waintrom he;

³¹ shi, naa, ŋmɔ lɛ mli fɛɛ etsi kɛ ŋmeii; ni sɔnsrɔ̃ sɔŋŋ eha shikpɔŋ lɛ hiɛ; ni ŋmɔ lɛ he lɛ gbogbo lɛ ekumɔ eshwie shi.

³² Kɛkɛ ni mikwɛ gãa, ni mijwɛŋ he jogbaŋŋ. Mikwɛ, ni mikase nɔ ko kɛjɛ mli.

³³ Mawɔ fioo, majie mihiɛsɛɛ fioo, makota miniji fioo;

³⁴ be mli ni owɔɔ lɛ, ohia aaabanina bo tamɔ ojotswalɔ; ni fimɔ hu aaaba tamɔ nuu ni hiɛ tsɛŋ.