Abe̱i 23 - ŊMALƐ KRƆŊKRƆŊ LƐ

- 6 -

¹ Kɛ ota shi, ni okɛ lumɔ ko baaye nii lɛ, jwɛŋmɔ mɔ hiɛ ni ota lɛ he jogbaŋŋ.

² Kɛ oji mɔ ni yeɔ ŋmaa lɛ, kaaye pii, tse nɔ.

³ Kaaha edɔkɔdɔkɔnii lɛ miitsɛ̃ onaa, ejaakɛ niyenii ni lakaa mɔ ni.

- 7 -

⁴ Kaagbo deŋme yɛ ninamɔ he; Okɛ jwɛŋmɔ ato he.

⁵ Ohiŋmɛi ni aaagba nɔ pɛ etee; ejaakɛ ekwɛ̃ɔ fiji oya, ni efilikiɔ tamɔ okropɔŋ kɛyaa ŋwɛi.

- 8 -

⁶ Kaaye kpɛkpɛɛlɔ dɛŋ nii, ni kaaha edɔkɔdɔkɔnii lɛ miiba otsine.

⁷ Ejaakɛ etamɔ mɔ ko ni buɔ nɔ fɛɛ nɔ he akɔntaa yɛ eyitsoŋ. Ekɛɔ bo akɛ, “Ye ni onu!” Shi jeee kɛ etsui mli fɛɛ.

⁸ Atrɔmai abɔ ni oye lɛ oooshwe oshwie, ni owiemɔi dɔkɔbii lɛ aaafee yaka.

- 9 -

⁹ Kaawie ni kwashia nu; ejaakɛ eeegbe onilee wiemɔi lɛ ahe guɔ.

- 10 -

¹⁰ Kaatsi blema husu nɔ̃ okadi hu kɛtee sɛɛ, ni kaaŋɔ awusãi ashikpɔŋ yɛ amɛdɛ̃.

¹¹ Ejaakɛ amɛkpɔ̃lɔ lɛ hewalɔ ni; ni ekɛ bo baaye ehã amɛ.

- 11 -

¹² Okɛ ojwɛŋmɔ afɔ̃ tsɔsemɔ nɔ, ni obo nilee wiemɔi atoi.

- 12 -

¹³ Kaatsi gbekɛ tsɔsemɔ naa, ejaakɛ kɛ oyi lɛ kɛ kpãa lɛ egboŋ.

¹⁴ Bo lɛ okɛ kpãa ayi lɛ, ni ooohere eyiwala.

- 13 -

¹⁵ Mibi, kɛji ooona jwɛŋmɔ lɛ, mi hu mitsui aaanyɔ mimli.

¹⁶ Kɛji wiemɔi ni ja miije onaa lɛ, mi hu mimli aaafli mi.

- 14 -

¹⁷ Kaahã ohiɛ miikɔ̃ eshafeelɔi anɔ; shi moŋ kã he oshe Yehowa gbeyei daa nɛɛ.

¹⁸ Ejaakɛ eyɛ mli lɛɛlɛŋ akɛ wɔsɛɛ ko yɛ, ni ohiɛnɔkãmɔ lɛ efeŋ yaka.

- 15 -

¹⁹ Mibi, bo lɛ, bo toi, koni ole nii, ni oba ojeŋ jogbaŋŋ.

²⁰ Okɛ ohe akabɔ dãatɔlɔi loo ŋmaayelɔi ahe.

²¹ Ejaakɛ dãatɔlɔi kɛ ŋmaayelɔi lɛ amɛaaye ohia, ni wɔdɔiwɔlɔi aaabu mama shwɛishwɛi.

- 16 -

²² Bo otsɛ ni fɔ bo lɛ toi, ni kaagbe onyɛ he guɔ kɛji egbɔ lɛ.

²³ Tse shika ohe anɔkwale kɛ nilee kɛ tsɔsemɔ kɛ niiashishinumɔ, ni okahɔ̃ɔ eko eko.

²⁴ Jalɔ tsɛ aaanya babaoo, ni mɔ ni fɔɔ bi nilelɔ lɛ aaana ebi lɛ he miishɛɛ.

²⁵ Hã otsɛ kɛ onyɛ mii ashɛ amɛhe, ni hã onyɛ ni fɔ bo lɛ anya.

- 17 -

²⁶ Mibi ŋɔɔ otsui ohã mi, ni okɔ minane.

²⁷ Ejaakɛ yoo ni bɛ jeŋba lɛ bu kwɔŋkwɔŋ ni, ni mɔ kroko ŋa lɛ bu kplokotoo ni.

²⁸ Ewoɔ ka tamɔ ojotswalɔ, ni ehãa mɛi ni yeee anɔkwa ayi faa yɛ gbɔmɛi ateŋ.

- 18 -

²⁹ Namɔ naa nɔ? Namɔ yeɔ awerɛho? Namɔ naa bei? Namɔ naa sane? Namɔ naa pilamɔ yakatswaa? Namɔ hiŋmɛii tsuɔ faa?

³⁰ Mɛi nɛɛ ji mɛi ni tsɛɔ yɛ wain he lɛ; mɛi ni yaa yasaa amɛnaa wain ni afutu mli lɛ.

³¹ Kaakwɛ wain bɔ ni etsu faa lɛ, bɔ ni ehiɛ yɔɔ fɛo yɛ kpulu lɛ mli lɛ, bɔ ni eyaa kpoo lɛ.

³² Kɛfee sɛɛ lɛ, ekɔ̃ɔ mɔ tamɔ onufu, ni efɛ̃ɔ mɔ tamɔ blikã.

³³ Kɛkɛ lɛ ohiŋmɛii ebɔi naakpɛɛ nibii namɔ, ni wiemɔi gbohii aaaje onaa.

³⁴ Kɛkɛ lɛ ooofee tamɔ mɔ ko ni kã ŋshɔ teŋ, loo tamɔ mɔ ko ni kã aŋmala nɔ yɛ ŋshɔ hiɛ.

³⁵ Kɛfee sɛɛ lɛ nɔ ni oookɛɛ ji, “Amɛtswia mi nii, shi ewaaa mihe; amɛyi mi, shi minuuu he. Mɛɛbe mihiɛ aaatsɛ̃? Mibaya ekoŋŋ.”