Abe̱i 20 - ŊMALƐ KRƆŊKRƆŊ LƐ

¹ Wain lɛ hefɛoyelɔ ni, ni dãa ni wa lɛ hoofeelɔ ni; ni mɔ fɛɛ mɔ ni dãa hãa eduɔ gbɛ lɛ, eleee nii.

² Maŋtsɛ mlifu ni naawa lɛ etamɔ jata huumɔ; mɔ ni woɔ maŋtsɛ mlifu lɛ, ewala ŋmɛɔ lɛ.

³ Eji hiɛ nyam kɛhã nuu kɛji enyaaa bei he; shi kwashia fɛɛ kwashia lɛ, bei ebeɔ.

⁴ Hejɔ̃lɔ ni huuu yɛ humɔ be mli lɛ, nikpamɔ be mli lɛ enaŋ nɔ ko ekpa.

⁵ Adesa yiŋtoo mlikwɔ tamɔ nubu, shi nilelɔ jieɔ yiŋtoi lɛ kpo.

⁶ Mɛi babaoo tsɛɔ amɛhe anɔkwafoi; shi anɔkwafo lɛ namɔ yoɔ lɛ?

⁷ Gbɔmɔ ni ji jalɔ ni eye emuu lɛ ajɔɔ eshwiei.

⁸ Maŋtsɛ ni taa kojomɔ sɛi nɔ lɛ, enaa efɔŋ fɛɛ efɔŋ.

⁹ Namɔ aaanyɛ akɛɛ akɛ, “Mi lɛ, mitsuu mitsui he, ni esha ko be mihe?”

¹⁰ Nsɛnitɛi srɔtoi kɛ susumɔ nii srɔtoi lɛ Yehowa miihi fɛɛ.

¹¹ Gbekɛbii tete hãa akɛ amɛnifeemɔnii yoɔ amɛ, nifeemɔnii lɛ he tse jio, eja jio.

¹² Toi ni nuɔ nii kɛ hiŋmɛi ni naa nii lɛ, Yehowa ji mɔ ni fee enyɔ lɛ fɛɛ.

¹³ Wɔ akaŋɔɔ onaa, kɛjeee nakai lɛ obaaye ohia. Gbelemɔ ohiŋmɛii, ni ooona nii oye otɔ.

¹⁴ Nihelɔ kɛɔ akɛ nɔ ni eheɔ lɛ, “Ehiii, ehiii!” Shi kɛji eyi gbɛ pɛ, eeshwã akɛ ena lɛ ofoo.

¹⁵ Shika kɛ ojarawatɛi babaoo yɛ; shi nilee wiemɔ lɛ tɛ̃ŋlɛ̃o ni.

¹⁶ Mɔ ni damɔɔ gbɔ sɛɛ lɛ, hã ekɛ etade ato bo awaba; ni mɔ ni damɔɔ maŋsɛɛnyo sɛɛ lɛ, hã ekɛ lɛ diɛŋtsɛ ehe ato awaba.

¹⁷ Ŋmaa ni akɛ kutumpɔo na lɛ eŋɔɔ; shi kɛfee sɛɛ lɛ daaŋ yiɔ tɔ kɛ ŋmlitsa.

¹⁸ Ŋaawoo akɛtoɔ yiŋ, ni nilee akɛwuɔ ta.

¹⁹ Sanetãlɔ lɛ, ejieɔ teemɔŋ saji akpo; no hewɔ lɛ, okɛ naa blɛblɛtsɛ akabɔ.

²⁰ Mɔ ni lomɔɔ etsɛ loo enyɛ lɛ, ewala sɛɛ foɔ tamɔ kane ni agbe yɛ duŋ kpii mli.

²¹ Gboshinii ni ana lɛ gidigidi yɛ shishijee mli lɛ, jɔɔmɔ baaa nɔ yɛ naagbee mli.

²² Kaakɛɛ akɛ, “Matɔ efɔŋ he owele.” Mɛɛ Yehowa, ni eeeye ebua bo.

²³ Nsɛnitɛi ni shɛɛɛ lɛ Yehowa miihi. Shishiumɔ nsɛnii ehiii.

²⁴ Gbɔmɔ nanefaamɔi lɛ Yehowa dɛŋ eyɔɔ; te aaafee tɛŋŋ ni eeele nɔ ni yɔɔ egbɛ nɔ hu?

²⁵ Eji tsɔne hã gbɔmɔ akɛ eeesha ehe ekɛɛ akɛ, “Nɔ krɔŋkrɔŋ ni! Ni shiwoo lɛ sɛɛ lɛ kpaako dani ejwɛŋɔ he” ni naashiwoo sɛɛ dani ejwɛŋ he.

²⁶ Maŋtsɛ nilelɔ shaa efɔŋfeelɔi amli, ni ekɛ shwiili nane tsɔ̃ɔ amɛnɔ kɛgbɛlɛɔ amɛ.

²⁷ Gbɔmɔ mumɔ ni yɔɔ emli lɛ, Yehowa kane ni; ni ekpaa gbɔmɔ mligbɛ fɛɛ ekwɛɔ.

²⁸ Anɔkwayeli baa maŋtsɛ yi, ni jalɛ saneyeli hãa emaŋtsɛ sɛi maa shi shiŋŋ.

²⁹ Oblahii anunyam ji amɛhewalɛ; shi hiimeji ahefɛo ji amɛyiteŋ waŋ lɛ.

³⁰ Yii pilamɔ fala lɛ etsumɔɔ esha; ni kpãa yii hu tsuɔ tsui mli fɛɛ.