Abe̱i 18 - ŊMALƐ KRƆŊKRƆŊ LƐ

¹ Mɔ ni tseɔ ehe kɛjeɔ mɛi ahe lɛ, lɛ pɛ enɔ mli efoɔ; ni jalɛ sane ko bɛ ni abaawie ni ebaaŋɔ nɔ.

² Kwashia naaa mɛi ashishinumɔ he miishɛɛ, fe akɛ eeewie nɔ ni etsui kɛɔ lɛ kɛkɛ.

³ Be ni efɔŋfeemɔ baa lɛ, heguɔgbee hu miiba.

⁴ Gbɔmɔ daaŋ wiemɔ lɛ nubu ni mli kwɔ ni; nilee hu tamɔ nuhiŋmɛi ni tueɔ.

⁵ Ehiii akɛ akwɛ efɔŋfeelɔ hiɛ ni abu lɛ bem, aloo atsɔ̃ jalɔ sane hiɛ abu shi.

⁶ Kwashia daaŋ wiemɔ woɔ bei; ni ewiemɔ hãa ayiɔ lɛ.

⁷ Kwashia daaŋ wiemɔ kpãtãa ehiɛ, ni ewiemɔ nɔŋŋ duɔ lɛ tamɔ tsɔne.

⁸ Ablɛbiwielɔ wiemɔ ŋɔɔ tamɔ dɔkɔdɔkɔnii; ekpelekeɔ shi kɛyaa gbɔmɔ musuŋ tɔ̃ɔ.

⁹ Mɔ ni kɛ enitsumɔ shashaoɔ shi lɛ, nifitelɔ nyɛmi ni.

¹⁰ Mɔɔ ni wa ji Yehowa gbɛi lɛ, ni no mli jalɔ shaa foi kɛyaa, ni ehiɔ shi shweshweeshwe.

¹¹ Niiatsɛ nii ni eyɔɔ lɛ ji emɔɔ ni wa; ni etamɔ gbogbo grɔŋŋ ni buɔ ehe?

¹² Henɔwomɔ tsɔ̃ɔ hiɛkpãtãmɔ hiɛ; shi heshibaa tsɔ̃ɔ hiɛnyam hiɛ.

¹³ Bo sane toi jogbaŋŋ dani ohã hetoo, kɛjee nakai lɛ, obaafee kwashia kɛ buulu.

¹⁴ Gbɔmɔ mli ekãa hãa enyɛɔ hela naa edamɔɔ; shi mumɔ ni egbɔjɔ lɛ, mɛni no aaanyɛ etsu?

¹⁵ Jwɛŋmɔ ni hiɛ kã shi naa nilee; ni nilelɔ toi tiuɔ nilee sɛɛgbɛ.

¹⁶ Gbɔmɔ dɛŋ nikee jeɔ gbɛ hãa lɛ; ni ekɛ lɛ yaa mɛi wuji ahiɛ.

¹⁷ Mɔ klɛŋklɛŋ ni jajeɔ esane lɛ, efeɔ tamɔ nɔ ni lɛ esane ja; shi kɛ mɔ ni ekɛna lɛ ba ni ebabɔi lɛ sanebimɔ lɛ, no dani akpaa lɛ shi.

¹⁸ Oshikifɔ̃ɔ hãa bei sɛɛ foɔ, ni ebuɔ atɛŋ ehãa kãkãlɔi ni peleɔ nɔ ko he.

¹⁹ Kɛ ofee onyɛmi ekpakpa lɛ, etsɔ̃ɔ tamɔ maŋ ni wa ehãa bo; shi kɛji okɛ lɛ be lɛ, etsɔ̃ɔ tamɔ agbo sɛɛ adabãŋ ehãa bo.

²⁰ Gbɔmɔ daaŋ wiemɔ woɔ yibii hãa lɛ; ni edaaŋ wiemɔ hãa etɔɔ.

²¹ Gbele kɛ wala yɛ gbɔmɔ lilɛi dɛŋ; amɛteŋ nɔ ni gbɔmɔ sumɔɔ lɛ no eŋɔɔ.

²² Mɔ fɛɛ mɔ ni naa ŋa lɛ, ena nɔ kpakpa, ni ehiɛ baa nyam yɛ Yehowa hiɛ.

²³ Ohiafo lɛ fai ekpaa kɛ naajɔlɛ; shi niiatsɛ lɛ ewieɔ kpɛŋkpɛŋ.

²⁴ Nanemɛi komɛi yɛ ni amɛfeɔ amɛnii oookɛɛ nanemɛi ji amɛ; shi naanyo krɔŋŋ lɛ ekpɛtɛɔ mɔ gbãgbãlii fe nyɛmi tete.