Abe̱i 10 - ŊMALƐ KRƆŊKRƆŊ LƐ

Solomon Abɛi

¹ Bi nilelɔ hãa etsɛ naa miishɛɛ; shi bi kwashia lɛ, ehãa enyɛ tsui yeɔ.

² Efɔŋfeemɔ mli ninamɔ lɛ ehe bɛ sɛɛnamɔ; shi jalɛ hereɔ mɔ yiwala yɛ gbele dɛŋ.

³ Yehowa hãaa hɔmɔ aye jalɔi; shi nɔ ni efɔŋfeelɔi shweɔ akɛ amɛna lɛ, etswaa yɛ amɛdɛŋ.

⁴ Mɔ ni nijiaŋ ŋɔɔ lɛ lɛ, ohia hiaa lɛ, shi mɔ ni nine kãaa shi lɛ etsɔ̃ɔ niiatsɛ.

⁵ Bi ni buaa ŋmãa naa yɛ nikpamɔ be mli lɛ, bi nilelɔ ni; shi bi ni wɔɔ yɛ nikpamɔ be mli lɛ, bi ni woɔ mɔ hiɛgbele ni.

⁶ Ajɔɔ mɛi ni feɔ jalɛ nii, shi efɔŋfeelɔi kɛ amɛdaaŋ wiemɔ haa amɛyitsoŋwalɛ nɔ.

⁷ Kɛ akai jalɔ lɛ, ajɔɔ lɛ; shi efɔŋfeelɔ lɛ atsiŋ egbɛi tã ajɔŋ lɛ.

⁸ Nilelɔ kpɛlɛ̃ɔ kãmɔ; shi kwashia naafuutsɛ hiɛ kpãtãa.

⁹ Anɔkwayelɔ hiɔ shi shweshweeshwe, shi mɔ ni bɛ jeŋba lɛ, aaayoo lɛ.

¹⁰ Mɔ ni bɛɔ mɔ hiŋmɛi lɛ ewoɔ bei; shi mɔ ni kɛ ekãa kãa mɔ lɛ hãa toiŋjɔlɛ baa.

¹¹ Jalɔ daaŋ wiemɔ lɛ, wala nubu ni; shi efɔŋfeelɔ daaŋ wiemɔ haa yitsoŋwalɛ nɔ.

¹² Nyɛɛ teɔ bei shi; shi suɔmɔ haa tɔ̃mɔi fɛɛ anɔ.

¹³ Niiashishinulɔ daaŋ anaa nilee yɛ; shi mɔ ni bɛ jwɛŋmɔ lɛ kpãa kã ekotosɛɛ.

¹⁴ Nilelɔ tiaa nilee, shi kwashia daaŋ wiemɔ lɛ ekɛ hiɛkpãtãmɔ baa.

¹⁵ Niiatsɛ nii ji emɔ̃ɔ ni wa lɛ, shi ohia kpãtãa ohiafo hiɛ.

¹⁶ Jalɛ nitsumɔ he nyɔmɔwoo lɛ wala ni, efɔŋfeemɔ he sɛɛnamɔ ji esha.

¹⁷ Mɔ ni boɔ tsɔsemɔ toi lɛ, enyiɛɔ gbɛ ni kɛ mɔ yaa wala mli nɔ; shi mɔ ni kwaa kãmɔ lɛ, eduɔ gbɛ.

¹⁸ Mɔ ni kɛ nyɛɛ teɔ lɛ, amalelɔ ni; mɔ ni yeɔ mɔ he osheku lɛ, kwashia ji lɛ.

¹⁹ Wiemɔ babaoo yɔɔ nɛɛ tɔ̃mɔ kpaaa yɛ mli; shi mɔ ni le enaabu mli mɔmɔ lɛ, nilelɔ ni.

²⁰ Jalɔ lilɛi lɛ, etamɔ jwiɛtɛi krɔŋŋ; shi mɔ fɔŋ jwɛŋmɔ lɛ sɛɛnamɔ ko bɛ he.

²¹ Jalɔ naabu lɛɔ mɛi babaoo, shi kwashia lɛ, jwɛŋmɔ ni ebɛ hewɔ lɛ egboɔ.

²² Yehowa jɔɔmɔ lɛ, no feɔ mɔ niiatsɛ; shi odeŋmegbomɔ nyɛŋ ekɛ nɔ ko afata he.

²³ Kwashia lɛ efɔŋfeemɔ feɔ lɛ miishɛɛ, shi mɔ ni yɔɔ jwɛŋmɔ lɛ, nilee feɔ lɛ miishɛɛ.

²⁴ Nɔ ni mɔ fɔŋ sheɔ lɛ, no nɔŋŋ baaba enɔ; shi jalɔ lɛ enine aaashɛ etaomɔnii anɔ.

²⁵ Kɛ ahum tswa pɛ, mɔ fɔŋ yi etã, shi jalɔ hiɔ shi shweshweeshwe kɛyaa naanɔ tɔ̃ɔ.

²⁶ Bɔ ni ashiŋ feɔ nyanyɔji ni lasu feɔ hiŋmɛi lɛ, nakai anihaolɔ feɔ mɛi ni tsu lɛ lɛ.

²⁷ Yehowa gbeyeishemɔ hãa wala sɛɛ tsɛɔ; shi mɛi fɔ̃ji afii lɛ, aaafo nɔ.

²⁸ Jalɔi ahiɛnɔkãmɔ lɛ baafee miishɛɛ; shi mɛi fɔ̃ji agbɛkwɛmɔ lɛ baafee yaka.

²⁹ Yehowa ji mɔɔ ni wa hã mɔ ni baa ejeŋ jogbaŋŋ, shi eji hiɛkpãtãmɔ hã efɔŋfeelɔ.

³⁰ Jalɔ lɛ eeehi shi shweshweeshwe; shi mɔ fɔŋ lɛ ehiŋ shikpɔŋ lɛ nɔ.

³¹ Jalɔi alilɛi wieɔ nilee wiemɔi; shi kutumpɔo lilɛi lɛ, aaafo ashɛ afɔ̃.

³² Jalɔi anaabu le nɔ ni sa wiemɔ; shi mɔ fɔŋ wieɔ kutumpɔo wiemɔ.