5 Mose 6 - ŊMALƐ KRƆŊKRƆŊ LƐ

Kitã Wulu lɛ

¹ “Agbɛnɛ kitãi lɛ kɛ akpɔi lɛ kɛ mlai lɛ ni Yehowa, nyɛNyɔŋmɔ lɛ, fã akɛ mitsɔ̃ɔ nyɛ lɛ nɛ, koni nyɛyaye nɔ yɛ shikpɔŋ ni nyɛyaa ni nyɛyaŋɔ lɛ nɔ.

² Nyɛ kɛ nyɛshwiei awala gbii abɔ fɛɛ mli lɛ, esa akɛ nyɛshe Yehowa, nyɛNyɔŋmɔ lɛ, gbeyei ni nyɛye akpɔi kɛ kitãi ni miwoɔ nyɛ nɛɛ fɛɛ nɔ, koni nyɛwala sɛɛ atsɛ.

³ No hewɔ lɛ, Israelbii, nyɛboa toi, ni nyɛjwɛŋa nɔ, ni nyɛyea nɔ koni ahi ahã nyɛ, koni nyɛshwere yɛ shikpɔŋ kpakpa ni baa nii lɛ nɔ tamɔ bɔ ni Yehowa, nyɛtsɛmɛi lɛ aNyɔŋmɔ lɛ, ewo nyɛ shi lɛ.

⁴ “Bo toi, Israel! Yehowa, wɔNyɔŋmɔ lɛ, lɛ ekoome ji Yehowa.

⁵ Suɔmɔ Yehowa, wɔNyɔŋmɔ lɛ, kɛ otsui fɛɛ kɛ omumɔ fɛɛ kɛ onyɛmɔ fɛɛ.

⁶ Nɛkɛ wiemɔi nɛɛ ni miwoɔ bo he kitã ŋmɛnɛ gbi nɛɛ akã otsui nɔ,

⁷ ni otsɔ̃ɔ obii fitsofitso. Owie he be mli ni ota shi yɛ oshĩaŋ; owie he be mli ni onyiɛ gbɛteŋ; owie he be mli ni ojɔɔ ohe kɛ be mli ni otsuɔ nii.

⁸ Asaŋ okɛfi onineshi kɛ ohiɛŋtso nɔ hu akɛ hekaimɔ okadi,

⁹ Oŋma yɛ oshĩa lɛ shinaatsei lɛ kɛ agboi lɛ ahe hu.”

Toigbele he kɔkɔbɔɔ

¹⁰ “Kɛji Yehowa, nyɛNyɔŋmɔ lɛ, kɛ nyɛ yashɛ shikpɔŋ lɛ ni ewo nyɛtsɛmɛi, Abraham kɛ Isak kɛ Yakob, he shi akɛ ekɛbaahã nyɛ lɛ nɔ, shikpɔŋ kɛ enɔ maji wuji fɛɛfɛji ni jeee nyɛ nyɛto;

¹¹ shikpɔŋ kɛ enɔ shĩai ni amɛmli eyimɔ obɔ̃bɔ̃ kɛ nibii kpakpai ni jeee nyɛ nyɛtsu nyɛwo amɛmli; shikpɔŋ kɛ nubui ni jeee nyɛ nyɛtsatsaai, kɛ wain tromi kɛ mutsei ni jeee nyɛ nyɛtɛo, kɛji nyɛye ni nyɛtɔrɔ lɛ,

¹² nyɛkwɛa nyɛhe nɔ ni ahĩa koni nyɛhiɛ akajea Yehowa, mɔ ni jie nyɛ kɛje Ijipt shikpɔŋ lɛ nɔ he ni aye nyɛ nyɔŋ yɛ lɛ, nɔ.

¹³ Nyɛshea Yehowa, nyɛNyɔŋmɔ lɛ, gbeyei; lɛ ekoome nyɛjaa, ni lɛ pɛ egbɛi nyɛkɛkãa kitã.

¹⁴ Nyɛkayasɔmɔa nɔ kroko yɛ lɛ esɛɛ, ni ji majimaji ni jwere nyɛmasɛi lɛ anyɔŋmɔi lɛ;

¹⁵ ejaakɛ Yehowa, nyɛNyɔŋmɔ lɛ, ni yɔɔ nyɛteŋ lɛ, eyeɔ awuŋã, koni emli akawo nyɛ la, ni ekpãtã nyɛhiɛ yɛ shikpɔŋ lɛ nɔ.

¹⁶ “Nyɛkakaa Yehowa, nyɛNyɔŋmɔ lɛ, tamɔ bɔ ni nyɛka lɛ yɛ Masa lɛ;

¹⁷ shi moŋ nyɛyea ehe saji lɛ kɛ ekitãi lɛ kɛ ekpɔi lɛ ni ewoɔ nyɛ lɛ anɔ;

¹⁸ ni nyɛfea nɔ ni ja ni hi hu, bɔ ni afee ni ahi ahã nyɛ koni nyɛya nyɛyaŋɔ shikpɔŋ kpakpa ni Yehowa wo nyɛtsɛmɛi lɛ he shi lɛ,

¹⁹ kɛtsɔ̃ shwiemɔ ni nyɛbaashwie nyɛhenyɛlɔi fɛɛ yɛ nyɛhiɛ lɛ nɔ tamɔ bɔ ni Yehowa ewo shi lɛ.

²⁰ “Kɛji nyɛbii aaabi nyɛ wɔ ko loo wɔsɛɛ ko akɛ, ‘Te odaseyeli saji kɛ akpɔi kɛ mlai ni Yehowa, wɔNyɔŋmɔ lɛ, wo nyɛ lɛ shishi hu lɛ’,

²¹ no lɛ nyɛkɛa nyɛbii lɛ akɛ, ‘Sa ko lɛ Ijipt maŋtsɛ ye wɔ nyɔŋ yɛ Ijipt shikpɔŋ lɛ nɔ, ni Yehowa kɛ nineshiwalɛ bajie wɔ kɛje Ijipt.

²² Yehowa fee okadii kɛ naakpɛɛ nii ni yɔɔ gbeyei eshi Ijipt kɛ Ijipt maŋtsɛ lɛ kɛ ewebii fɛɛ yɛ wɔhiɛ,

²³ ni ejie wɔ kɛje nakai shikpɔŋ lɛ nɔ, koni ekɛ wɔ aba ni ekɛ shikpɔŋ ni ewo wɔtsɛmɛi lɛ ashi yɛ he lɛ abahã wɔ.

²⁴ Ni Yehowa, wɔNyɔŋmɔ lɛ, wo wɔ kitã akɛ wɔye nɛkɛ akpɔi nɛɛ fɛɛ nɔ, ni wɔshe lɛ gbeyei bɔ ni afee ni ahi ahã wɔ daa nɛɛ, koni wɔyi ana wala tamɔ bɔ ni eyɔɔ ŋmɛnɛ nɛɛ lɛ.

²⁵ Kɛji wɔjwɛŋ nɔ, ni wɔye nɛkɛ kitãi nɛɛ fɛɛ nɔ tamɔ bɔ ni Yehowa, wɔNyɔŋmɔ lɛ, efã wɔ lɛ no aaahã wɔsa ehiɛ.’