5 Mose 34 - ŊMALƐ KRƆŊKRƆŊ LƐ

Mose Gbele

¹ Kɛkɛ ni Mose jɛ Moab ŋa lɛ nɔ, ni ekwɔ Nebo Gɔŋ lɛ kɛtee Pisga Gɔŋ lɛ ni kwɛɔ Yeriko maŋ lɛ hiɛ lɛ yiteŋ. Yehowa kɛ shikpɔŋ tso muu lɛ fɛɛ tsɔ̃ɔ lɛ kɛjɛ Gilead kɛyashi Dan,

² kɛ Naftali fɛɛ, kɛ Efraim kɛ Manase shikpɔŋ lɛ, kɛ Yuda shikpɔŋ lɛ fɛɛ kɛyashwie Mediterenia Ŋshɔ lɛ anaigbɛ.

³ Ekɛ Yuda shikpɔŋ lɛ wuoyigbɛ lɛ, kɛ Yeriko ni ji tɛŋmaŋ jɔɔ lɛ mli ŋa kplenee lɛ kɛyashi Zoar tɔ̃ɔ?

⁴ Kɛkɛ ni Yehowa kɛɛ Mose akɛ, “Shikpɔŋ lɛ ni miwo Abraham kɛ Isak kɛ Yakob shi yɛ he akɛ, ‘Mikɛbaahã nyɛshwiei’ lɛ, no nɛ. Mihã ona kɛ ohiŋmɛitsei enyɔ, shi jɛi ni oyaŋ.”

⁵ Yehowa tsulɔ Mose gbo yɛ jɛi yɛ Moab shikpɔŋ lɛ nɔ yɛ Yehowa wiemɔ lɛ naa;

⁶ ni Yehowa fu Mose yɛ jɔɔ lɛ mli yɛ Moab shikpɔŋ lɛ nɔ, yɛ Betpeor ŋlɛnɔ; shi mɔ ko mɔ ko kwraa leee Mose saŋ kɛbashi ŋmɛnɛ.

⁷ Mose eye afii oha kɛ nyɔŋmai enyɔ be ni egbo lɛ; no mli lɛ ehiŋmɛii anɔ efeko lɛ tuutuu lɛ, egbɔmɔtsoŋ hewalɛ hu nɔ gbɔko.

⁸ Israelbii lɛ fo Mose gbii nyɔŋmai etɛ̃ sɔŋŋ yɛ Moab ŋa kplenee lɛ nɔ, dani amɛkɛgbe Mose yarafeemɔ kɛ lɛ fomɔ lɛ naa.

⁹ Yoshua, Nun bi lɛ, eyi obɔ̃ kɛ nilee mumɔ, ejaakɛ Mose kɛ eniji eshwie enɔ ejɔɔ enɔ. No hewɔ lɛ, Israelbii lɛ bo Yoshua toi, ni amɛfee tamɔ bɔ ni Yehowa efã Mose lɛ.

¹⁰ Gbalɔ ko eteko shi dɔŋŋ yɛ Israel tamɔ Mose mɔ ni Yehowa kɛ lɛ wie hiɛ kɛ hiɛ lɛ.

¹¹ Gbalɔ ko hu efeko okadii kɛ naakpɛɛnii tamɔ nii fɛɛ ni Yehowa tsu Mose ni eyafee yɛ Ijipt shikpɔŋ lɛ nɔ etsɔ̃ɔ Ijipt maŋtsɛ kɛ etsuji lɛ kɛ eshikpɔŋ lɛ nɔ bii lɛ fɛɛ lɛ.

¹² Gbalɔ ko hu bako ni eyɛ hewalɛ kpele, ni efee naakpɛɛnii kɛ gbeyeinii tamɔ Mose fee yɛ Israelbii ahiɛ lɛ.