5 Mose 32 - ŊMALƐ KRƆŊKRƆŊ LƐ

¹ “Ŋwɛi, bo mi toi, shi mibawie; ni Shikpɔŋ, bo minaa wiemɔi nɛɛ toi.

² Mitsɔ̃ɔmɔ aaashwie shi tamɔ nu ni miinɛ, ni eeenyɔ tamɔ bɔ, tamɔ futufuli ni miishwã jwɛfɔ nɔ, tamɔ nu kulibii yɛ bai anɔ.

³ Mibajie Yehowa gbɛi yi! Nyɛwoa wɔNyɔŋmɔ lɛ hiɛ nyam!

⁴ “Tɛsaa ji lɛ, enitsumɔ hi pɛpɛɛpɛ, ejaakɛ nibii fɛɛ ni efeɔ lɛ ja. Nyɔŋmɔ anɔkwafo ji lɛ; nɔ sha ko bɛ ehe; jalɔ kɛ anɔkwafo ji lɛ.

⁵ Shi nyɛyeee lɛ anɔkwa; no hewɔ lɛ, jeee ebii ji nyɛ dɔŋŋ, yɛ nyɛhe kpa hewɔ; yinɔ kɔɔdɔŋ ni eje eŋɛlɛnɔ ji nyɛ.

⁶ Aso Yehowa shidaa moŋ nɛ, kwashiai ni bɛ yitseiaŋ? Aso jeee lɛ ji nyɛtsɛ, mɔ ni bɔ nyɛ, mɔ ni fee nyɛ mɛi komɛi, ni ehã nyɛnane mɔ shi lɛ?

⁷ “Nyɛkaia blema jeeŋmɔ ko lɛ, nyɛjwɛŋa yinɔi ni eho lɛ ahe; nyɛbia nyɛtsɛmɛi, ni amɛaagba nyɛ, kɛ nyɛnukpai lɛ hu, ni amɛaakɛɛ nyɛ.

⁸ Be ni Ŋwɛinyo lɛ ja shikpɔŋ lɛ ekɛhã jeŋ majimaji lɛ, ni egbala adesai abii amli lɛ, ejie maji lɛ ahusui eshwie shi faŋŋ, yɛ Nyɔŋmɔ webii lɛ ayibɔ naa.

⁹ Yehowa ŋɔ Yakob akɛ gboshinii ni ena; ejaakɛ egbɛfaŋnɔ ji emaŋbii lɛ.

¹⁰ “Ena lɛ yɛ shiaŋa shikpɔŋ ko nɔ, yɛ ŋa olɛŋɛlɛ shwaŋŋ ko nɔ. Ebu ehe, ni ekura lɛ hu; ebaa eyi tamɔ ehiŋmɛi mli ajaŋmalaatɛ.

¹¹ Bɔ ni okropɔŋ tsɔ̃ɔ ebii filikimɔ, ni egbɛɔ efijiaŋ ekɛsɔoɔ amɛ, ni ehiɛɔ amɛ koni amɛkagbee shi lɛ,

¹² nakai Yehowa koome nyiɛ ewebii ahiɛ, ni maŋsɛɛ nyɔŋmɔ ko fataaa ehe.

¹³ “Ehã Israel ye gɔji anɔ shikpɔji lɛ anɔ; Israel ye shikpɔŋ lɛ nɔ nibaanii lɛ. Ena wo kɛjɛ tɛsai amli, ni emutsei shwere yɛ tɛ shikpɔŋ nɔ.

¹⁴ Tsinai kɛ gwantɛŋi hã fufɔ ni efĩ; egwaŋtɛŋ yei kɛ gwantɛŋ hii shwishwii kɛ fɔ tamɔ Bashan tsinai kɛ abotiai; ni enu wain kpakpa.

¹⁵ “Yehowa webii lɛ shwere, shi amɛtse atua; amɛshwishwii, ni amɛhe wa, ni amɛhe shamɔ hu. Kɛkɛ ni amɛkwa Nyɔŋmɔ mɔ ni bɔ amɛ lɛ moŋ, ni amɛbuuu Nyɔŋmɔ ni ji yiwalaheremɔ Tɛsaa lɛ.

¹⁶ Amɛtee Yehowa awuŋayeli shi kɛ maŋsɛɛ nyɔŋmɔi ni amɛja lɛ, ni esha ni amɛfee hewɔ lɛ amɛwo lɛ mlifu.

¹⁷ Amɛshã afɔlei amɛhã nyɔŋmɔi ni jeee nɔ ko nɔ ko, nyɔŋmɔi ni amɛleee, kɛ nyɔŋmɔi hei ni akɛba etsɛko, nii ni nyɛtsɛmɛi lɛ sheko amɛ gbeyei dã.

¹⁸ Nyɛbuuu Tɛsaa ni babɔ nyɛ ade lɛ, ni nyɛhiɛ kpa Nyɔŋmɔ mɔ ni bɔ nyɛ lɛ nɔ.

¹⁹ “Be ni Yehowa na enɛ lɛ, enyaŋe ebihii kɛ ebiyei lɛ, yɛ emli la ni amɛwo lɛ hewɔ.

²⁰ Kɛkɛ ni ekɛɛ akɛ, ‘Mifeŋ amɛ ejurɔ ko dɔŋŋ.’ Makwɛ bɔ ni amɛnaagbee baatamɔ ahã, ejaakɛ yinɔbii toigbolɔi ji amɛ, bii ni yeee anɔkwa.

²¹ Amɛhã miye nɔ ni jeee nyɔŋmɔ he awuŋã yakatswaa; amɛwo mimli la kɛ amɛmãgãi lɛ. No hewɔ lɛ, mi hu mahã amɛye maŋ ko ni bɛ nɔ ko mli he awuŋã. Mahã amɛmli awo la yɛ kwashiai amaŋ ko hewɔ.

²² Ejaakɛ mimlifu ehã la ko ehere, ni eetso kɛmiiya gbohiiaje tɔ̃ɔ; ebaashã je lɛ kɛ enɔ nibii, ni ebaashã gɔji lɛ ashishitoi diɛŋtsɛ.

²³ “Maloo haomɔi mabua amɛyiteŋ, matserɛ̃ amɛ gãii ni miyɔɔ.

²⁴ Hɔmɔ baahã amɛtã loo, ni jeŋ dɔlɛ kɛ hela baagbe amɛ. Mawo kooloi kakawuai agbɛ koni amɛbatua amɛ, kɛ onufui kɛ amɛnaa ebɔɔ hu gbɛ koni amɛbakɔ̃mɔ amɛ.

²⁵ Klante aaanu lá yɛ blohui amli, ni piai amli baafee gbeyei. Ebaakpãtã oblanyo kɛ oblayoo kɛ bi fufɔoo kɛ wajiatsɛ fɛɛ hiɛ.

²⁶ Kulɛ makɛɛ akɛ, ‘Magbɛ amɛ mashwã kɛya shɔŋŋ, ni mahã hiɛ akpa amɛnɔ yɛ gbɔmɛi ateŋ.’

²⁷ Shi mishe gbeyei akɛ amɛhenyɛlɔi aaashwã ni amɛaaŋɔ nɔ ni eba lɛ ekroko ni amɛaakɛɛ akɛ, ‘Wɔ ni wɔye amɛnɔ kunim lɛ, jeee Yehowa ni fee amɛ enɛ.’

²⁸ “Israel jeee ehe maŋ ni yɔɔ jwɛŋmɔ; ni sanesɛɛkɔmɔ ebɔ amɛ.

²⁹ Eji amɛle nii kulɛ amɛaanu nɔ ni ba lɛ shishi, ni amɛaayoo bɔ ni amɛnaagbee mli aaabatamɔ.

³⁰ Te feɔ tɛŋŋ ni gbɔmɔ kome kɛkɛ woɔ mɛi akpe foiŋ, ni gbɔmɛi enyɔ kɛkɛ hu woɔ mɛi akpei nyɔŋma foiŋ? Nɔ ni kɛba ji amɛTɛsaa lɛ ekwa amɛ, ni Yehowa eŋmɛɛ amɛhe ehã.

³¹ Ejaakɛ wɔhenyɛlɔi lɛ diɛŋtsɛ yeɔ enɛ he odase akɛ amɛtɛsaa, amɛnyɔŋmɔ lɛ, tamɔɔɔ wɔTɛsaa, Israel Nyɔŋmɔ lɛ.

³² Ejaakɛ jeŋ ni amɛhenyɛlɔi lɛ ba lɛ tamɔ Sodom kɛ Gomora jeŋba lɛ; amɛjeŋba fɛɛ etsɔ̃ ebɔɔ, ni amɛyibii miijoo pam;

³³ amɛwain lɛ shikpãi ebɔɔ ni, tamɔ blikã naa ebɔɔ pɛ.

³⁴ “Mikɛ amɛnifeemɔnii lɛ eto; mikɛŋmɛ shi, ni eemɛ amɛ.

³⁵ Oweletɔɔ kɛ toigbalamɔ lɛ, mi minɔ ni; amɛhiɛkpãtãmɔ be lɛ ebɛŋkɛ, nɔ ni baaba amɛnɔ lɛ miiba shwiaa.

³⁶ Ejaakɛ Yehowa baafã ewebii ahe; ebaana amɛ mɔbɔ kɛji ena akɛ amɛhewalɛ fɛɛ etã, ni eshwɛko mɔ ko mɔ ko kwraa, mɔ ni hiɛ ehe jio, nyɔŋ jio.

³⁷ Kɛkɛ lɛ Yehowa baabi akɛ, ‘Nɛgbɛ tɛsaa, amɛnyɔŋmɔ lɛ, ni amɛkɛ amɛhiɛ fɔ̃ nɔ lɛ yɔɔ;

³⁸ nibii ni amɛkɛ kooloi ni amɛkɛmiishã afɔle lɛ amli fɔi lɛ hã, ni amɛfɔse wain amɛshwie shi amɛhã amɛ akɛ amɛnu lɛ? Amɛba amɛbaye amɛbua amɛ, amɛbafã amɛhe koo!

³⁹ “‘Te nyɛna akɛ Mi nɔŋŋ ji Mi, ni misɛɛ lɛ nyɔŋmɔ ko bɛ dɔŋŋ? Migbeɔ, ni mihãa wala, mipilaa mɔ, ni mitsaa mɔ, ejaakɛ mɔ ko nyɛɛɛ nɔ ko ashɔ̃ yɛ mi midɛŋ.

⁴⁰ Ejaakɛ miiwo minine nɔ kɛya ŋwɛi, ni miikɛɛ akɛ, miyɛ kɛmiiya naanɔ lɛ,

⁴¹ kɛji mijɔ miklante lɛ naa, ni ekpɛ kaŋkaŋ ni miwo jalɛ saneyeli nɔ lɛ, mibatɔ mihe owele yɛ mihenyɛlɔi anɔ, ni mibagbala mɛi ni nyɛɔ mi lɛ toi.

⁴² Lá baawu migãimlibii ahe, ni miklante lɛ baaye loo. Lá baatsere yɛ migãimlibii anaa, ni miklante baagbe mɔ ni teɔ shi ewoɔ mi lɛ. Minaŋ mɔ ni egba ewo mi mɔbɔ, pilafo lɛ kɛ nomi fɛɛ yeŋ amɛhe.’

⁴³ “Nyɛ majimaji, nyɛkɛ Yehowa webii lɛ anyaa, ejaakɛ etɔ etsuji alá he owele, ni etɔ ehe owele yɛ ehenyɛlɔi anɔ, ni ekɛ ewebii atɔ̃mɔi efa amɛ.”

⁴⁴ Mose kɛ Yoshua, Nun bi lɛ, ba, ni amɛbakane lala nɛɛ mli wiemɔi lɛ fɛɛ amɛwo Israelbii lɛ atoiiaŋ.

Mose naagbee wiemɔ

⁴⁵ Be ni Mose kɛ Israelbii lɛ ewie wiemɔi nɛɛ fɛɛ egbe naa lɛ,

⁴⁶ ekɛɛ amɛ akɛ, “Nyɛhãa wiemɔi fɛɛ ni mikɛshwie nyɛhiɛ ŋmɛnɛ gbi nɛɛ akãa nyɛtsui nɔ; ni nyɛkpãa nyɛwoa nyɛbii atoiiaŋ koni amɛjwɛŋ nɛkɛ mla nɛɛ mli wiemɔi lɛ fɛɛ anɔ, ni amɛye nɔ;

⁴⁷ ejaakɛ wiemɔi nɛɛ jeee wiemɔi foji hã nyɛ, shi moŋ nyɛwala diɛŋtsɛ ni; ni no hewɔ lɛ, nyɛwala sɛɛ aaatsɛ yɛ shikpɔŋ ni nyɛfoɔ Yordan Faa lɛ kɛyaa ni nyɛyaŋɔ lɛ nɔ.”

⁴⁸ Nakai gbi lɛ nɔ nɔŋŋ lɛ, Yehowa kɛɛ Mose akɛ,

⁴⁹ “Kwɔɔ Abarim gɔŋ nɛɛ, ni ji Nebo Gɔŋ ni yɔɔ Moab shikpɔŋ lɛ nɔ ni ekwɛɔ Yeriko maŋ lɛ hiɛ lɛ, koni okwɛ Kanaan shikpɔŋ ni mikɛhãa Israelbii lɛ akɛ amɛgbɛfaŋnɔ lɛ.

⁵⁰ Obaagbo yɛ nakai gɔŋ ni obaakwɔ lɛ nɔ koni oyanina omɛi lɛ tamɔ onyɛmi Aaron gbo yɛ Hor Gɔŋ lɛ nɔ, ni eyanina emɛi lɛ,

⁵¹ ejaakɛ, bo kɛ lɛ fɛɛ, nyɛkwa mi yɛ Israelbii lɛ ateŋ yɛ Meriba nu lɛ he yɛ Kadesh, yɛ Zin ŋa lɛ nɔ; ejaakɛ nyɛwooo mihiɛ nyam akɛ mɔ krɔŋkrɔŋ yɛ Israelbii lɛ ahiɛ.

⁵² Obaana shikpɔŋ lɛ kã ohiɛ moŋ nɛ; shi ya ni oyaŋ nɛkɛ shikpɔŋ nɛɛ ni mikɛhãa Israelbii lɛ nɔ.”