5 Mose 29 - ŊMALƐ KRƆŊKRƆŊ LƐ

Yehowa kɛ Israel kpãŋ yɛ Moab Shikpɔŋ lɛ nɔ

¹ Kpãŋmɔ ni Yehowa fã Mose akɛ ekɛ Israelbii lɛ akpãŋ yɛ Moab shikpɔŋ lɛ nɔ lɛ mli wiemɔi nɛ; esoro kpãŋmɔ ni Yehowa kɛ Israelbii kpãŋ yɛ Horeb Gɔŋ lɛ he lɛ.

² Mose tsɛ Israel muu lɛ fɛɛ, ni ekɛɛ amɛ akɛ, “Nyɛ diɛŋtsɛ nyɛna kɛ nyɛhiŋmɛii nii fɛɛ ni Yehowa fee Ijipt maŋtsɛ lɛ kɛ etsuji lɛ kɛ emaŋbii lɛ fɛɛ hu yɛ Ijipt shikpɔŋ lɛ nɔ lɛ.

³ Nyɛna haomɔi kpelei lɛ kɛ okadii lɛ kɛ naakpɛɛ nii wuji lɛ;

⁴ shi kɛbashi ŋmɛnɛ lɛ, Yehowa hãko nyɛ jwɛŋmɔ ni nyɛkɛaanu nɔ ni ba lɛ shishi, loo hiŋmɛii ni nyɛkɛaana nii loo toii ni nyɛkɛaanu nii.

⁵ Mi mikpala nyɛ afii nyɔŋmai ejwɛ yɛ shiaŋa lɛ nɔ; nyɛtadei esuuu yɛ nyɛhe, nyɛtokotai hu tserɛɛɛ yɛ nyɛnaji.

⁶ Nyɛhiɛɛɛ aboloo lɛ, nyɛhiɛɛɛ wain loo dãa ni wa; shi Yehowa hã nyɛ nyɛhehiamɔnii fɛɛ koni nyɛkɛna nyɛle akɛ lɛ ji Yehowa, nyɛNyɔŋmɔ lɛ.

⁷ Ni be ni nyɛbashɛ biɛ lɛ, Heshbon Maŋtsɛ Sihon kɛ Bashan Maŋtsɛ Og fã ta kɛba amɛkɛ wɔ bawu; shi wɔye amɛnɔ kunim,

⁸ ni wɔŋɔ amɛshikpɔŋ lɛ, ni wɔjara shikpɔŋ lɛ wɔhã Rubenbii lɛ kɛ Gadbii lɛ kɛ Manasebii akutso lɛ fã kome akɛ amɛgbɛfaŋnɔ.

⁹ No hewɔ lɛ, nyɛjwɛŋa kpãŋmɔ nɛɛ mli wiemɔi lɛ anɔ koni nyɛye nɔ, bɔ ni afee ni nyɛshwere yɛ nibii fɛɛ ni nyɛfeɔ lɛ mli.

¹⁰ “Ŋmɛnɛ gbi nɛɛ lɛ, nyɛ fɛɛ nyɛdamɔ Yehowa, nyɛNyɔŋmɔ lɛ, hiɛ, nyɛkutseiatsɛmɛi lɛ, kɛ nyɛkutsei lɛ amli onukpai lɛ, kɛ nyɛmaŋ nitsulɔi lɛ, kɛ nyɛ Israel maŋ lɛ mli hii fɛɛ,

¹¹ kɛ nyɛbii bibii lɛ, kɛ nyɛŋamɛi lɛ, kɛ gbɔi ni kɛ nyɛ yɔɔ nyɛshitoohei lɛ amli lɛ, laiyalɔi kɛ faaŋyalɔi fɛɛ.

¹² Nyɛba ŋmɛnɛ koni nyɛ kɛ Yehowa, nyɛNyɔŋmɔ lɛ, abote kpãŋmɔ ni Yehowa, nyɛNyɔŋmɔ lɛ, kãa nyɛ he kitã ŋmɛnɛ gbi nɛɛ lɛ mli,

¹³ koni ŋmɛnɛ lɛ, Yehowa ama nɔ mi akɛ lɛ diɛŋtsɛ emaŋ ji nyɛ, ni lɛ hu etsɔ̃ nyɛNyɔŋmɔ tamɔ bɔ ni ewo shi momo sa, be ni ekã nyɛtsɛmɛi Abraham kɛ Isak kɛ Yakob kitã lɛ.

¹⁴ Shi jeee nyɛ kɛkɛ ni Yehowa kɛkpãŋ nɛkɛ kpãŋmɔ nɛɛ,

¹⁵ shi moŋ ekɛ wɔ kɛ mɔ hu ni bɛ biɛ ŋmɛnɛ gbi nɛɛ miikpãŋ nakai nɔŋŋ.

¹⁶ “Nyɛle bɔ ni wɔhi shi yɛ Ijipt shikpɔŋ lɛ nɔ wɔhã, kɛ bɔ ni wɔtsɔ̃ majimaji ateŋ kɛba lɛ.

¹⁷ Nyɛna maji nɛɛ amusubɔɔ nibii ni ji amɛmãgãi ni akɛ tso kɛ tɛ kɛ jwiɛtɛi kɛ shika fee ni amɛyɔɔ yɛ amɛteŋ lɛ.

¹⁸ Nyɛkwɛa jogbaŋŋ koni nyɛteŋ nuu ko loo yoo ko loo weku ko loo akutso ko yiŋ akatsɔ̃ ŋmɛnɛ ni ekpale yɛ Yehowa, wɔNyɔŋmɔ lɛ sɛɛ, ni etee eyaja nakai maji lɛ anyɔŋmɔi lɛ; no lɛ nakai mɔ lɛ aaatsɔ̃ tamɔ tso shishifã ni woɔ tsoyibii ni joɔ kɛ emli ebɔɔ yɛ nyɛteŋ.

¹⁹ Nɛkɛ gbɔmɔ baahã ehe tsui kɛji enu kitã ni ji kpãŋmɔ nɛɛ mli wiemɔi lɛ, ni ebaakɛɛ ehe akɛ, ‘Mikpliŋ mitsui kɛmiifee nɔ ni mi misumɔɔ moŋ nɛ, kɛ̃lɛ mibaye mihe.’ Enɛ baahã mɔ kpakpa kɛ mɔ fɔŋ hu fɛɛ hiɛ akpãtã.

²⁰ Yehowa kɛ nɛkɛ gbɔmɔ nɛɛ he ekeŋ lɛ, shi moŋ Yehowa mlifu kɛ ewuŋayeli aaate shi awo lɛ, ni loomɔi fɛɛ ni aŋma yɛ nɛkɛ wolo nɛɛ mli lɛ aaababua gbɔmɔ nɛɛ yiteŋ kɛyashi Yehowa baagbe egbɛi yɛ je lɛ mli.

²¹ Yehowa kɛ ehiɛ aaaka lɛ dikadika yɛ Israel akutsei lɛ fɛɛ amli, yɛ nɛkɛ kpãŋmɔ nɛɛ mli loomɔi ni yɔɔ Mla Wolo nɛɛ mli lɛ anaa.

²² “Wɔsɛɛ yinɔbii, ni ji nyɛshwiei ni aaaba yɛ nyɛsɛɛ lɛ, kɛ mɛi kpɔ̃ji ni aaajɛ maŋsɛɛ shɔŋŋ lɛ aaawie he kɛji amɛna haomɔi kɛ helai ni Yehowa ehã eba nɛkɛ shikpɔŋ lɛ nɔ lɛ.

²³ Amɛaana bɔ ni swɔɔ kɛ ŋoo egbe shikpɔŋ tso muu lɛ, ni ehiii enɔ nidumɔ, ni ebaaa nii, ni jwɛi tete ekwɛ̃ɛɛ yɛ nɔ lɛ. Amɛaana akɛ efite tamɔ Sodom kɛ Gomora kɛ Adama kɛ Zeboim maji lɛ ni Yehowa kpãtã amɛhiɛ yɛ emlifu kɛ emlila naa lɛ.

²⁴ Kɛkɛ lɛ majimaji fɛɛ aaabi akɛ, ‘Mɛni ba ni Yehowa fee shikpɔŋ nɛɛ nɛkɛ nɛɛ? Mɛni kɛ mlifu ni naa wa nɛkɛ ba?’

²⁵ Hetoo ni mɛi aaahã ji akɛ, ‘Ejɛ kwamɔ ni amɛkwa kpãŋmɔ ni Yehowa, amɛtsɛmɛi aNyɔŋmɔ lɛ, kɛ amɛ kpãŋ be mli ni eyakpɔ̃ amɛ kɛje Ijipt shikpɔŋ lɛ nɔ lɛ hewɔ.

²⁶ Amɛtee ni amɛyajajaa nyɔŋmɔi krokomɛi moŋ, ni amɛsɔmɔ amɛ, nyɔŋmɔi ni amɛleee, asaŋ ni Yehowa ewo amɛ kitã akɛ amɛkaja amɛ lɛ.

²⁷ No hewɔ lɛ, Yehowa mli fu nɛkɛ shikpɔŋ nɛɛ, ni ehã loomɔi fɛɛ ni aŋma yɛ nɛkɛ wolo nɛɛ mli lɛ babua enɔ bii lɛ ayiteŋ.

²⁸ Kɛkɛ ni Yehowa gri, ni efã amɛ yɛ emlifu kɛ emlila lɛ naa, ni eshɛrɛ amɛ eshwie maŋsɛɛ shikpɔŋ ko nɔ tamɔ bɔ ni eyɔɔ ŋmɛnɛ gbi nɛɛ lɛ.’

²⁹ “Teemɔŋ nibii lɛ Yehowa, wɔNyɔŋmɔ lɛ, koome nɔ ni; shi kɛji ajie nɔ ko kpo atsɔ̃ɔ pɛ, nɔ lɛ etsɔ̃ wɔ kɛ wɔbii anɔ kɛmiiya naanɔ, bɔ ni afee ni wɔye mla nɛɛ mli wiemɔi lɛ fɛɛ kwa nɔ.”