5 Mose 27 - ŊMALƐ KRƆŊKRƆŊ LƐ

Nyɔŋmɔ Mlai ni akpɛ yɛ tɛi anɔ

¹ Agbɛnɛ Mose kpã ewo maŋbii lɛ atoiŋ, yɛ Israel maŋ onukpai lɛ ahiɛ, ni ekɛɛ akɛ, “Nyɛyea kitãi fɛɛ ni miwoɔ nyɛ ŋmɛnɛ gbi nɛɛ lɛ nɔ.

² Ni gbi nɔ ni nyɛaafo Yordan Faa lɛ kɛya shikpɔŋ ni Yehowa, nyɛNyɔŋmɔ lɛ, kɛhãa nyɛ lɛ nɔ lɛ, nyɛholea tɛi kpelei nyɛmamɔa shi, ni nyɛmaa hiɛ ni amɛnɔ afee trotro,

³ koni nyɛŋmã nɛkɛ mlai nɛɛ fɛɛ nyɛwo amɛnɔ, ni nyɛkɛya shikpɔŋ kpakpa ni baa nii ni Yehowa, nyɛNyɔŋmɔ lɛ, kɛhãa nyɛ lɛ nɔ tamɔ bɔ ni ewo nyɛtsɛmɛi lɛ shi eto lɛ.

⁴ Kɛji nyɛfo Yordan Faa lɛ kɛtee lɛ, nyɛkɛ tɛi ni miwoɔ nyɛ he kitã ŋmɛnɛ gbi nɛɛ lɛ amãmɔa shi yɛ Ebal Gɔŋ lɛ nɔ, ni nyɛmaa hiɛ ni amɛnɔ afee trotro.

⁵ Nyɛmaa afɔleshãa latɛ yɛ jɛi nyɛhãa Yehowa, nyɛNyɔŋmɔ lɛ, kɛ tɛi ni akɛ dade naa esako amɛhe dã,

⁶ ejaakɛ afɔleshãa latɛ fɛɛ afɔleshãa latɛ ni amaa akɛhã Yehowa, nyɛNyɔŋmɔ lɛ, akɛ tɛi ni dade naa esako he ama. Nyɛshãa shãa afɔlei yɛ nɔ nyɛkɛhãa Yehowa, nyɛNyɔŋmɔ lɛ.

⁷ Nyɛshãa shidaa afɔlei lɛ hu yɛ jɛi, ni nyɛyea nii yɛ jɛi koni nyɛnyaa yɛ Yehowa, nyɛNyɔŋmɔ lɛ, hiɛ.

⁸ Ni nyɛŋmaa nɛkɛ mlai nɛɛ amli wiemɔi lɛ, koni amɛje shi faŋŋ yɛ tɛi lɛ anɔ.”

⁹ Kɛkɛ ni Mose kɛɛ Israel muu lɛ fɛɛ, yɛ osɔfoi ni ji Levibii lɛ ahiɛ, akɛ, “Israelbii, nyɛfea diŋŋ ni nyɛboa toi. Ŋmɛnɛ gbi nɛɛ lɛ nyɛtsɔ̃ Yehowa, nyɛNyɔŋmɔ lɛ, diɛŋtsɛ maŋ;

¹⁰ no hewɔ lɛ, nyɛboa Yehowa, nyɛNyɔŋmɔ lɛ, toi, ni nyɛyea ekitãi kɛ ekpɔi ni miwoɔ nyɛ ŋmɛnɛ gbi nɛɛ lɛ nɔ.”

Toigbele he Loomɔi

¹¹ Nakai gbi lɛ nɔŋŋ lɛ Mose fã Israelbii lɛ akɛ,

¹² “Kɛji nyɛfo Yordan Faa lɛ, akutsei nɛɛ adamɔ Gerizim gɔŋ lɛ nɔ koni amɛjɔɔ maŋ lɛ: Simeon kɛ Levi kɛ Yuda kɛ Isakar kɛ Yosef kɛ Benyamin.

¹³ Ni akutsei nɛɛ hu adamɔ Ebal Gɔŋ lɛ nɔ koni amɛlomɔ: Ruben kɛ Gad kɛ Asher kɛ Zebulon kɛ Dan kɛ Naftali.

¹⁴ Ni Levibii lɛ kɛ gbee ni wa akɛɛ Israel muu fɛɛ akɛ,

¹⁵ “‘Alomɔ mɔ fɛɛ mɔ ni tsɔ̃ɔ ŋaalɔ nilee nɔ ekɛ su loo tso loo dade feɔ amãgã ni ejaa lɛ yɛ teemɔŋ, ejaakɛ Yehowa miihi.’ Ni maŋ muu lɛ fɛɛ ahere nɔ akɛ, ‘Amen!’

¹⁶ “Alomɔ mɔ ni wooo etsɛ loo enyɛ lɛ. Ni maŋ muu lɛ fɛɛ ahere nɔ akɛ, ‘Amen!’

¹⁷ “‘Alomɔ mɔ ni tsiɔ lɛ kɛ enaanyo teŋ husu nɔ okadi kɛyaa sɛɛ.’ Ni maŋ muu lɛ fɛɛ ahere nɔ akɛ, ‘Amen!’

¹⁸ “‘Alomɔ mɔ ni hãa shwilafo duɔ gbɛ.’ Ni maŋ muu lɛ fɛɛ ahere nɔ akɛ, ‘Amen!’

¹⁹ “‘Alomɔ mɔ ni tsɔ̃ɔ gbɔ kɛ awusã kɛ okulafo sane hiɛ ebuɔ shi.’ Ni maŋ muu lɛ fɛɛ ahere nɔ akɛ, ‘Amen!’

²⁰ “‘Alomɔ mɔ ni kɛ etsɛ ŋa wɔɔ lɛ, ejaakɛ ewo etsɛ hiɛ mama nɔ.’ Ni maŋ muu lɛ fɛɛ ahere nɔ akɛ, ‘Amen!’

²¹ “‘Alomɔ mɔ ni kɛ kooloo fɛɛ kooloo wɔɔ.’ Ni maŋ muu lɛ fɛɛ ahere nɔ akɛ, ‘Amen!’

²² “‘Alomɔ mɔ ni kɛ enyɛmiyoo ni ji etsɛbi loo enyɛbi wɔɔ.’ Ni maŋ muu lɛ fɛɛ ahere nɔ akɛ, ‘Amen!’

²³ “‘Alomɔ mɔ ni kɛ eshaayoo ni ji eŋa nyɛ wɔɔ.’ Ni maŋ muu lɛ fɛɛ ahere nɔ akɛ, ‘Amen!’

²⁴ “‘Alomɔ mɔ ni gbeɔ enaanyo gbɔmɔ yɛ teemɔŋ lɛ.’ Ni maŋ muu lɛ fɛɛ ahere nɔ akɛ, ‘Amen!’

²⁵ “‘Alomɔ mɔ ni heɔ nyɔɔŋnii koni eyagbe mɔ ko ni efeko nɔ ko lɛ.’ Ni maŋ muu lɛ fɛɛ ahere nɔ akɛ, ‘Amen!’

²⁶ “‘Alomɔ mɔ ni yeee nɛkɛ mlai nɛɛ anɔ, ni no hewɔ lɛ, ehaŋ mlai lɛ ama shi lɛ.’ Ni maŋ muu lɛ fɛɛ ahere nɔ akɛ, ‘Amen!’ ”