5 Mose 25 - ŊMALƐ KRƆŊKRƆŊ LƐ

¹ “Kɛji mɛi enyɔ miibe, ni amɛkɛ amɛsane lɛ tee kojomɔhe koni akojo lɛ, mɔ ni yeɔ bem lɛ abu lɛ bem, ni mɔ ni yeɔ fɔ lɛ abu lɛ fɔ.

² Kɛji mɔ ni eye fɔ lɛ sa yii lɛ, kojolɔ lɛ ahã abu lɛ shi koni ayi lɛ kpãa, yɛ lɛ kojolɔ lɛ ehiɛ, yɛ efɔŋ ni efee lɛ naa.

³ Kɛji efa aahu lɛ atswa lɛ kpãa nyɔŋmai ejwɛ; akateke nɔ, no lɛ ashwie onyɛmi Israelnyo lɛ hiɛ shi yɛ ohiɛ.

⁴ “Tsina ni gbɛlɛɔ abele lɛ akawo enaabu kotoku.

Nɔ ni afee ahã nyɛmi ni egbo

⁵ “Kɛji nyɛmimɛi hii enyɔ hi shi yɛ he kome, ni amɛteŋ mɔ kome gbo ni ebɛ binuu lɛ, mɔ ni egbo lɛ ŋa lɛ akashi weku lɛ mli eyagbã mɔkpɔŋ. Ewu ni egbo lɛ nyɛminuu lɛ gbɛnaa ji akɛ eŋɔ yoo lɛ akɛ eŋa koni etsu wu gbɛnaanii ehã lɛ.

⁶ Kromɔ binuu ni yoo nɛɛ aaafɔ lɛ, atsɔ̃ nuu ni egbo lɛ bi kɛ niyelɔ, bɔ ni afee ni mɔ ni egbo lɛ gbɛi akalaaje yɛ Israelbii ateŋ.

⁷ Shi kɛji mɔ ni egbo lɛ nyɛminuu lɛ sumɔɔɔ akɛ eŋɔɔ enyɛmi lɛ ŋa lɛ, no lɛ enyɛminuu lɛ ŋa lɛ aya maŋ onukpai lɛ aŋɔɔ yɛ maŋ koi lɛ shi, ni eyakɛɛ amɛ akɛ, ‘Miwu nyɛmi nuu lɛ sumɔɔɔ akɛ ekɛ mi awo shwie ahã enyɛmi nuu lɛ koni enyɛmi lɛ gbɛi akalaaje yɛ Israel; esumɔɔɔ akɛ etsuɔ wu nyɛminuu gbɛnaanii ehãa mi.’

⁸ Kɛji eba lɛ nakai lɛ, maŋ onukpai lɛ atsɛ mɔ ni egbo lɛ nyɛmi nuu lɛ, koni amɛ kɛ lɛ awie he. Kɛji gbɔmɔ nɛɛ ma nɔ mi ekɛɛ akɛ, ‘Misumɔɔɔ akɛ maŋɔ lɛ akɛ ŋa lɛ’,

⁹ no lɛ gbɔmɔ nɛɛ nyɛmi nuu lɛ okulafo lɛ atsi abɛŋkɛ ewu lɛ nyɛminuu lɛ yɛ onukpai lɛ fɛɛ ahiɛ, koni ejie nuu lɛ tokota nane kome yɛ ehe, ni efɛ̃ lajɔ̃ eshwie nuu lɛ hiɛ, ni no sɛɛ lɛ ekɛɛ akɛ, ‘Nɔ ni sa nuu ni sumɔɔɔ akɛ esaa enyɛminuu we nɛ.’

¹⁰ Ni nɛkɛ gbɔmɔ lɛ abaatsɛ ewe yɛ Israel akɛ, ‘Mɔ ni ajie etokota we’.

Mlai krokomɛi

¹¹ “Kɛji hii miinɔ, ni amɛteŋ mɔ kome ŋa tsi ebɛŋkɛ koni ebahere ewu lɛ yɛ enaanyo ni enine etsɔ̃ ewu lɛ nɔ dɛŋ, ni yoo nɛɛ kpã enine mli ekɛmɔ nuu kome lɛ nuutso lɛ,

¹² afo yoo nɛɛ nine lɛ; akana yoo lɛ mɔbɔ ko kwraa.

¹³ “Kaato nsɛnitɛi srɔtoi enyɔ, nɔ ni shɛɔ kɛ nɔ ni shɛɛɛ yɛ oflɔtɔ mli;

¹⁴ ni kaato susumɔ nii hu srɔtoi enyɔ yɛ shĩa, nɔ ni da kɛ nɔ ni edaaa.

¹⁵ Nyɛhãa nsɛnitɛ kɛ susumɔ nii lɛ ashɛa shishiishi koni nyɛwala sɛɛ atsɛ yɛ shikpɔŋ ni Yehowa, nyɛNyɔŋmɔ lɛ, kɛhãa nyɛ lɛ nɔ;

¹⁶ ejaakɛ Yehowa, nyɛNyɔŋmɔ lɛ, miihi mɛi fɛɛ ni shishiuɔ mɔ.

¹⁷ “Nyɛkaia nɔ ni Amalekbii lɛ fee nyɛ yɛ gbɛteŋ be ni nyɛjɛ Ijipt nyɛbaa lɛ,

¹⁸ bɔ ni amɛyasheee Nyɔŋmɔ gbeyei, ni no hewɔ lɛ, amɛjɛ nyɛsɛɛgbɛ ni amɛtua nyɛ, be ni etɔ nyɛ ni nyɛtɔ biti lɛ, ni amɛgbegbee nyɛsɛɛbii fɛɛ ni egbɔjɔ lɛ.

¹⁹ Enɛ hewɔ lɛ, kɛji Yehowa, nyɛNyɔŋmɔ lɛ, ehã nyɛhe ejɔ nyɛ yɛ nyɛhenyɛlɔi fɛɛ ni bɔle nyɛ lɛ adɛŋ lɛ, nyɛbulea Amalekbii lɛ ashishi kwraa koni akakai amɛ dɔŋŋ yɛ jeŋ. Nyɛhiɛ akakpaa nɔ.”