5 Mose 24 - ŊMALƐ KRƆŊKRƆŊ LƐ

Gbãlãmligbalamɔ kɛ gbãlãmlibotemɔ ekoŋŋ

¹ “Kɛji nuu ko ŋɔ yoo ko efee eŋa, ni fee sɛɛ lɛ nuu nɛɛ naaa yoo lɛ he miishɛɛ, ejaakɛ ena hiɛgbejianii ko yɛ yoo lɛ he, ni no hewɔ lɛ, eŋma mligbalamɔ wolo ekɛwo yoo lɛ dɛŋ, ni ehã eje ewe lɛ,

² ni yoo nɛɛ tee ni eyagbã nuu kroko,

³ ni sɛɛkpee wu nɛɛ hu eyasumɔɔɔ yoo lɛ, ni lɛ hu eŋma mligbalamɔ wolo ekɛwo yoo lɛ dɛŋ, ni ehã eje ewe lɛ, aloo sɛɛkpee wu nɛɛ gbo lɛ,

⁴ no lɛ yoo nɛɛ klɛŋklɛŋ wu ni shwie lɛ lɛ aka ŋɔ yoo lɛ ekɛmiifee eŋa ekoŋŋ, ejaakɛ abule yoo lɛ. Nyɔŋmɔ miihi nɛkɛ gbãlãshihilɛ. Nyɛkafea nɛkɛ esha ni nyɛkɛmiibule shikpɔŋ ni Yehowa, nyɛNyɔŋmɔ lɛ, kɛhãa nyɛ akɛ nyɛnɔ lɛ.

Mlai krokomɛi

⁵ “Kɛji nuu ko kpee yoo hee lɛ, ekaya ta; ni akɛ nitsumɔ ko nitsumɔ ko akafɔ̃ enɔ akɛ etsu. Ahã eye ehe afi naakplɔ yɛ eshĩa teŋ koni ehã eŋa ni ekpee lɛ mii ashɛ ehe.

⁶ “Mɔ ko akahe enaanyo wiɛ loo wiɛbi akɛ awabatoonɔ, ejaakɛ kɛji efee nakai lɛ belɛ gbɔmɔ wala eheɔ akɛ awaba lɛ.

⁷ “Kɛji ana mɔ ko ni eju enyɛmi Israelnyo, ni eeye lɛ nyɔŋ aloo eyahɔ̃ɔ lɛ lɛ, agbe nakai gbɔmɔ lɛ koni akɛgu nɛkɛ nɔ fɔŋ nɛɛ yɛ nyɛteŋ.

⁸ “Kɛji hewolo nɔ hela gbonyo ko mɔ mɔ ko lɛ, ekwɛ ni ahi, ni ejwɛŋ nɔ, ni efee bɔ ni osɔfoi ni ji Levibii lɛ aaatsɔ̃ɔ lɛ akɛ efee lɛ pɛpɛɛpɛ. Nyɛjwɛŋa nɔ, ni nyɛfea bɔ ni mitsɔ̃ɔ osɔfoi lɛ pɛpɛɛpɛ.

⁹ Nyɛkaia nɔ ni Yehowa, nyɛNyɔŋmɔ lɛ, fee Miriam yɛ gbɛ lɛ nɔ, be ni nyɛjɛ Ijipt nyɛbaa lɛ.

¹⁰ “Kɛji ofa onaanyo ko nɔ ko lɛ, kaatiu lɛ kɛtee eshĩa mli koni oyahe nɔ ni ekɛbaato bo awaba lɛ;

¹¹ shi moŋ daamɔ agbo naa, ni mɔ ni okɛ nii lɛ efa lɛ lɛ kɛ nɔ ni ekɛtoɔ awaba lɛ baaje kpo ekɛbahã bo.

¹² Kɛji ohiafo ji lɛ lɛ kaahã ehebo lɛ hi oŋɔɔ ni obu kɛwɔ ni je tsɛre nɔ.

¹³ Kpalemɔ ohã lɛ kɛji hulu yaanyɔ shi, bɔ ni afee ni ohiafo lɛ ana ehebo lɛ ebu kɛwɔ koni eda bo shi; ni osane baasa Yehowa, oNyɔŋmɔ lɛ hiɛ.

¹⁴ “Kaawa apaafonyo ohiafo ni efĩ lɛ yi. Nyɛnyɛmi Israelnyo ni jio, gbɔi ni yɔɔ nyɛshikpɔŋ lɛ nɔ, yɛ nyɛmaji lɛ amli lɛ ateŋ eko ni jio, akawa lɛ yi.

¹⁵ Wo lɛ gbi lɛ nɔ apaa ni obɔ lɛ lɛ he nyɔmɔ dani hulu anyɔ shi (ejaakɛ ohiafo ji lɛ, ni nakai nyɔmɔwoo lɛ nɔŋŋ ebɔleɔ), koni ekafo etsɛ Yehowa ewo bo, ni no tsɔ̃ esha ehã bo.

¹⁶ “Tsɛmɛi akagbo bii ayi gbele, ni bii hu akagbo tsɛmɛi ayi gbele; mɔ fɛɛ mɔ agbo yɛ lɛ diɛŋtsɛ efɔŋ ni efee hewɔ.

¹⁷ “Kaatsɔ̃ gbɔ loo awusã sane hiɛ obu shi; ni kaahe okulafo hebo akɛ awaba.

¹⁸ Shi nyɛkaia akɛ aye nyɛ nyɔŋ yɛ Ijipt shikpɔŋ lɛ nɔ, ni Yehowa, nyɛNyɔŋmɔ lɛ, kpɔ̃ nyɛ kɛje jɛi; no hewɔ ni miwoɔ nyɛ kitã nɛɛ koni nyɛye nɔ lɛ.

¹⁹ “Kɛji okpa oŋmɔshinii, ni ohiɛ kpa ke kome nɔ yɛ ŋmɔ lɛŋ lɛ, kaaku osɛɛ oyawo; shi moŋ oshi ohã gbɔ kɛ awusã kɛ okulafo bɔ ni afee ni Yehowa, oNyɔŋmɔ lɛ, ajɔɔ oninenaa nitsumɔi fɛɛ nɔ.

²⁰ Kɛji otse omutso yibii sɛɛ lɛ, kaaku osɛɛ okpa niji lɛ anɔ dɔŋŋ otserɛ nɔ ni eshwɛ lɛ; shi nomɛi ohã gbɔ kɛ awusã kɛ okulafo.

²¹ Kɛji otse owaintrom mli yibii sɛɛ lɛ, kaaye kpɛkpɛo yɛ trom lɛ mli dɔŋŋ; shi yibii ni eshwɛ kpɛkpɛo lɛ ohã gbɔ kɛ awusã kɛ okulafo.

²² Nyɛkaia akɛ nyɔji ji nyɛ yɛ Ijipt, ni no hewɔ ni miwoɔ nyɛ kitãi akɛ nyɛfee nɛkɛ lɛ.”