5 Mose 23 - ŊMALƐ KRƆŊKRƆŊ LƐ

Mɛi ni jeee Yehowa webii

¹ “Nuu ni afo enuutso aloo asa lɛ lɛ, ekaya Yehowa gwabɔɔ lɛ mli.

² “Ajwamãŋbi ko akaba Yehowa gwabɔɔ lɛ mli; ni eshwiei kɛyashi yinɔ ni ji nyɔŋma lɛ nɔ bii tete akaba Yehowa gwabɔɔ lɛ mli kɔkɔɔkɔ.

³ “Amonnyo loo Moabnyo akaba Yehowa gwabɔɔ lɛ mli. Amɛshwiei ayinɔ ni ji nyɔŋma lɛ nɔ bii tete amɛteŋ mɔ ko mɔ ko akaba gwabɔɔ lɛ mli gbi ko gbi ko;

⁴ ejaakɛ be ni nyɛjɛ Ijipt ni nyɛbaa lɛ, amɛhiɛɛɛ niyenii kɛ nu amɛkɛbakpeee nyɛ, shi moŋ amɛyabɔ Beor binuu Balaam apaa kɛjɛ Petor yɛ Mesopotamia akɛ ebalomɔ nyɛ.

⁵ Shi Yehowa, nyɛNyɔŋmɔ lɛ, booo Balaam toi, shi moŋ ehã loomɔ lɛ tsɔ̃ jɔɔmɔ hã nyɛ, ejaakɛ Yehowa miisumɔ nyɛ.

⁶ Nyɛkataoa amɛ ekpakpa loo ejurɔyeli kɔkɔɔkɔ.

⁷ “Nyɛkanyaŋea Edombii ejaakɛ nyɛnyɛmimɛi ji amɛ, ni nyɛkanyaŋea Ijiptbii hu ejaakɛ nyɛyato gbɔ yɛ amɛshikpɔŋ lɛ nɔ pɛŋ.

⁸ Amɛshwiei ayinɔ ni ji etɛ̃ kɛyaa lɛ nɔ bii baanyɛ amɛba Yehowa gwabɔɔ lɛ mli.

Muji akahi tabilɔi ahe

⁹ “Kɛji nyɛfã ta ni nyɛ kɛ nyɛhenyɛlɔi yaawu ni nyɛyato shi yɛ he ko lɛ, nyɛlea nyɛhenɔ kwɛmɔ koni nyɛkafee nɔ fɔŋ ko nɔ fɔŋ ko.

¹⁰ Kɛji muji ba nuu ko he yɛ shitoohe lɛ mli ejaakɛ eshwie ehe shi nyɔɔŋ lɛ, no lɛ gbɔmɔ nɛɛ aje shitoohe lɛ mli koni eyahi sɛɛ flɛŋŋ.

¹¹ Gbɛkɛnaashi mli lɛ ekɛ nu aju ehe, ni kɛ hulu nyɔ shi lɛ eku esɛɛ eba shitoohe lɛ mli.

¹² “Ato he ko akɛ kuŋtso yɛ shitoohe lɛ sɛɛ koni aya jɛi.

¹³ Mɔ ni miiya kuŋtso nɔ ahiɛ tso hu afata etawuu nii he. Ekɛ tso nɛɛ atsa bu koni esɔ̃ nɔ; ni kɛji egbe naa lɛ etsi wamɔ lɛ nɔ.

¹⁴ Yehowa, nyɛ Nyɔŋmɔ lɛ, kɛ nyɛ yɛ jɛi bɔ ni afee ni ebu nyɛhe, ni asaŋ ehã nyɛye nyɛhenyɛlɔi lɛ anɔ kunim. No hewɔ lɛ, muji nɔ ko akahi shitoohe lɛ mli koni ehã Yehowa kpa yɛ nyɛsɛɛ.”

Mlai krokomɛi

¹⁵ “Kɛji nyɔŋ ko jo foi yɛ enuŋtsɔ ŋɔɔ, ni ebaba Israelbii abo lɛ, akakpale nyɔŋ lɛ ayahã enuŋtsɔ lɛ.

¹⁶ Nyɛhãa ekɛ nyɛ ahia shi yɛ nyɛmaji lɛ ateŋ nɔ ni lɛ esumɔɔ mli; ni nyɛkayea lɛ nyɔŋ.

¹⁷ “Israel fɔmɔbi, nuu ni jio, yoo ni jio, akafee ehe jamɔhe lɛ mli ajwamãŋbɔlɔ.

¹⁸ Nuu ni jio, yoo ni jio, mɔ ko mɔ ko kɛ ajwamãŋbɔɔ mli shika akabahã yɛ Yehowa, nyɛNyɔŋmɔ lɛ, we lɛ mli yɛ eshiwoo ko hewɔ, ejaakɛ Yehowa miihi jamɔhe lɛ mli ajwamãŋbɔɔ lɛ kɛ shika lɛ fɛɛ.

¹⁹ “Kɛji ofa onyɛmi Israelnyo shika loo niyenii loo nɔ ko ni aheɔ ehe kpa lɛ, lɛ lɛ kaahe lɛ nii lɛ he kpa.

²⁰ Mɔkpɔŋ lɛ, hemɔ lɛ nii lɛ he kpa; shi Israelnyo lɛ kaahe lɛ nii he kpa. Nyɛyea mla nɛɛ nɔ, ni Yehowa, nyɛNyɔŋmɔ lɛ, baajɔɔ nɔ fɛɛ nɔ ni nyɛaatsu nɔ yɛ shikpɔŋ ni nyɛyaa nyɛyaŋɔ nɛɛ nɔ.

²¹ “Kɛji owo Yehowa, oNyɔŋmɔ lɛ, shi lɛ kaahã shiwoo lɛ nɔyeli lɛ sɛɛ miitsɛ, ejaakɛ Yehowa, baabi bo nyɔmɔ yɛ shiwoo lɛ he; ni no aaafee esha ehã bo.

²² Ejeee tɔ̃mɔ kɛji owooo Yehowa shi;

²³ shi kɛji ona owo shi lɛ, esa akɛ ojwɛŋ nɔ koni oye shiwoo lɛ nɔ, bɔ ni owo Yehowa shi yɛ tsuijurɔ naa lɛ.

²⁴ “Kɛji otee onaanyo waintrom mli lɛ, obaanyɛ oye wain yibii lɛ bɔ ni ooonyɛ; shi moŋ okatse yibii lɛ eko owo onii amli akɛ okɛmiiya shĩa.

²⁵ Kɛji oyabote onaanyo ŋmaaŋmɔ mli lɛ, obaanyɛ okɛ onine aku ŋmaa lɛ eko ni okpe bɔ ni ooonyɛ, shi okɛ nikpamɔ kakla akakpa ŋmaa lɛ.”