5 Mose 2 - ŊMALƐ KRƆŊKRƆŊ LƐ

¹ “Kɛkɛ ni wɔdɔ wɔyi kɛtsɔ̃ Akaba Bele lɛ he gbɛ lɛ nɔ kɛyabote shiaŋa lɛ mli bɔ ni Yehowa kɛɛ mi akɛ afee lɛ. Wɔye gbii babaoo ni wɔmiilɔgɔ shi kɛmiibɔle Edom Gɔŋ lɛ.

² “Kɛkɛ ni Yehowa kɛɛ mi akɛ,

³ ‘Bɔ ni nyɛbɔle shi yɛ gɔŋ nɛɛ he lɛ efa; nyɛtsɔ̃a nyɛhiɛ nyɛhãa kooyigbɛ agbɛnɛ.

⁴ Ni obɔ maŋ lɛ kɔkɔ ni okɛɛ amɛ akɛ nyɛyaatsɔ̃ nyɛnyɛmimɛi, Esau shwiei, ni yɔɔ Edom lɛ akpokpai lɛ anɔ. Amɛbaashe nyɛ gbeyei;

⁵ shi moŋ nyɛkwɛa ni ahia, ni nyɛkɛ amɛ akawua ejaakɛ mikɛ amɛshikpɔŋ lɛ he ko he ko haŋ nyɛ. Mihaŋ nyɛ shikpɔŋ nanemaahe kome tete nɛkɛ yɛ jɛi, ejaakɛ mikɛ Edom shikpɔŋ lɛ ehã Esau akɛ egbɛfaŋnɔ.

⁶ Nyɛkɔa shika nyɛkɛhea niyenii tete yɛ amɛdɛ̃ dani nyɛyea, ni nu ni nyɛbaanu hu nyɛkɔa shika nyɛkɛhea yɛ amɛdɛ̃.’

⁷ “Ejaakɛ Yehowa, nyɛNyɔŋmɔ lɛ, ejɔɔ nyɛ yɛ nɔ fɛɛ nɔ ni nyɛtsu mli; ni ebaa nyɛyi yɛ nyɛgbɛnyiɛmɔ mli yɛ nɛkɛ shiaŋa kpeteŋkple nɛɛ nɔ. Afii nyɔŋmai ejwɛ nɛɛ fɛɛ mli lɛ, Yehowa, nyɛNyɔŋmɔ lɛ, kɛ nyɛ yɛ, ni nɔ ko nɔ ko bɛ ni hia nyɛ.

⁸ ‘Wɔtsa wɔ nyiɛmɔ lɛ nɔ; shi wɔshi gbɛ ni jɛ Elat kɛ Eziongeber kɛyaa Ŋoo Ŋshɔ lɛ he lɛ. Kɛkɛ ni wɔtswa wɔnyɛmimɛi Esau shwiei ni yɔɔ Edom lɛ hu wɔfɔ̃; ni wɔtsɔ̃ wɔhiɛ wɔhã Moab ŋa lɛ nɔ.’

⁹ Yehowa kɛɛ mi akɛ, ‘Nyɛkagbaa Moabbii lɛ anaa, ejaakɛ mikɛ Moab shikpɔŋ lɛ he ko kwraa haŋ nyɛ, ejaakɛ mikɛhã Ar, Lot shwiei lɛ, akɛ amɛgbɛfaŋnɔ.’ ”

¹⁰ (Emimbii ji mɛi ni hi shikpɔŋ nɛɛ nɔ sa; gbɔmɛi kakabãŋi ni, ni amɛyi fa, ni amɛkwɔlɔ tamɔ Anakbii lɛ.

¹¹ Tamɔ Anakbii lɛ, atsɛɔ amɛ akɛ Refaim hu, shi Moabbii lɛ tsɛɔ amɛ Emimbii.

¹² Sa lɛ mɛi ni hi Edom ji Horbii lɛ; shi Esau shwiei lɛ bashwie amɛ yɛ jɛi, ni amɛplene amɛ, ni amɛŋɔ shikpɔŋ lɛ amɛhi nɔ tamɔ bɔ ni Israelbii lɛ shwie mɛi ni yɔɔ shikpɔŋ ni Yehowa kɛhã amɛ Israelbii lɛ akɛ amɛgbɛfaŋnɔ lɛ nɔ lɛ.)

¹³ “Shi moŋ nyɛtea shi ni nyɛfoa Zered Faa lɛ. No hewɔ lɛ, wɔyafo Zered Faa lɛ.

¹⁴ Be ni wɔye yɛ gbɛteŋ kɛjɛ beyinɔ ni wɔshi Kadesh Barnea kɛyashi wɔfo Zered Faa lɛ fee afii nyɔŋmai etɛ̃ kɛ kpaanyɔ. Nakai be mli lɛ tsutsu yinɔ tabilɔi lɛ fɛɛ egboi tamɔ bɔ ni Yehowa kã kitã lɛ.

¹⁵ Ejaakɛ Yehowa nine kã amɛnɔ, ni ekpãtã amɛhiɛ kɛyashi amɛ fɛɛ amɛtã yɛ asafo lɛ mli.

¹⁶ “Be ni tsutsu tabilɔi lɛ fɛɛ gboi lɛ,

¹⁷ Yehowa kɛɛ mi akɛ,

¹⁸ ‘Ŋmɛnɛ lɛ, nyɛbaatsɔ̃ Moabbii lɛ akpokpai lɛ anɔ kɛho yɛ Ar maŋ lɛ masɛi.

¹⁹ Kɛji nyɛyashɛ Amonbii lɛ ashikpɔŋ lɛ husu lɛ nɔ lɛ, nyɛkagbaa Amonbii lɛ anaa, ni nyɛkɛ amɛ akawua ta ko hu, ejaakɛ mikɛ Amonbii lɛ ashikpɔŋ lɛ he ko kwraa haŋ nyɛ, ejaakɛ mikɛhã Lot shwiei lɛ akɛ amɛgbɛfaŋnɔ.’ ”

²⁰ (Atsɛ shikpɔŋ nɛɛ akɛ Refaim hu ejaakɛ Refaimbii ji mɛi ni hi jɛi sa, shi Amonbii lɛ tsɛɔ amɛ akɛ Zamzumbii.

²¹ Gbɔmɛi kakabãŋi ni, ni amɛyi fa, ni amɛkwɔlɔ gojogojoo tamɔ Anakbii lɛ. Shi Yehowa kpãtã amɛhiɛ yɛ Amonbii lɛ ahiɛ. No hewɔ lɛ, Amonbii lɛ shɔ̃ shikpɔŋ lɛ yɛ Zamzumbii lɛ adɛŋ ni amɛhi nɔ

²² tamɔ bɔ ni Yehowa fee ehã Esau shwiei ni yɔɔ Edom lɛ, be ni eshwie Horbii lɛ ni ehã Esau shwiei lɛ shɔ̃ shikpɔŋ lɛ yɛ Horbii lɛ adɛŋ, ni amɛbahi nɔ kɛbashi ŋmɛnɛ gbi nɛɛ lɛ.

²³ Avimbii lɛ, sa lɛ amɛhi shi kɛjɛ Mediterenia Ŋshɔ lɛ naa kɛyashi Gaza. Kretabii fã kɛjɛ Kreta ŋshɔkpɔ lɛ nɔ kɛba, ni amɛbashwie Avimbii lɛ, ni amɛshɔ̃ shikpɔŋ lɛ yɛ amɛdɛŋ, ni amɛhi nɔ.)

²⁴ “Nyɛtea shi ni nyɛyia mli, ni nyɛyafoa Arnon Faa lɛ. Naa, mijɔɔ Heshbon maŋtsɛ Sihon, Amornyo lɛ, kɛ eshikpɔŋ lɛ hu fɛɛ nɔ mihã nyɛ. Nyɛyatuaa lɛ koni nyɛbɔi shikpɔŋ lɛ shɔ̃mɔ.

²⁵ Kɛjɛ ŋmɛnɛ gbi nɛɛ nɔ lɛ, mahã nyɛhe ŋmiŋmi kɛ gbeyei amɔmɔ mɛi fɛɛ ni yɔɔ jeŋ fɛɛ; amɛaanu nyɛhe, amɛtsui aaafã, ni amɛhe aaakpokpo kɛji atsi nyɛtã.

Israel ye Maŋtsɛ Sihon nɔ kunim

²⁶ “Mitsu bɔfoi kɛjɛ Kedemot ŋa lɛ nɔ kɛtee Maŋtsɛ Sihon ŋɔɔ yɛ Heshbon kɛ naajɔlɛ wiemɔ akɛ,

²⁷ ‘Ŋmɛɛ wɔ gbɛ koni wɔtsɔ̃ oshikpɔŋ lɛ nɔ kɛho. Gbɛjegbɛ lɛ kɛkɛ nɔ wɔbaanyiɛ tɛ̃ɛ; wɔgbaŋ ninejurɔgbɛ lɛ, wɔgbaŋ abɛku hu.

²⁸ Niyenii ni wɔbaaye lɛ ahɔ̃ɔ ahã wɔ koni wɔhe kɛ shika, ni nu hu ni wɔbaanu lɛ ahɔ̃ɔ ahã wɔ koni wɔhe. Nɔ nɔŋŋ ni wɔbaa bo ji akɛ oŋmɛ wɔ gbɛ koni wɔfo mli kɛtsɔ̃ oshikpɔŋ lɛ nɔ,

²⁹ kɛyashi wɔɔfo Yordan Faa lɛ kɛbote shikpɔŋ ni Yehowa, wɔNyɔŋmɔ lɛ, kɛaahã wɔ lɛ mli. Nakai ji bɔ ni Esau shwiei ni yɔɔ Edom lɛ kɛ Moabbii ni yɔɔ Ar lɛ hu fee amɛhã wɔ.’

³⁰ “Shi Heshbon Maŋtsɛ Sihon ekpɛlɛ̃ɛɛ nɔ akɛ wɔtsɔ̃ eshikpɔŋ lɛ nɔ kɛho, ejaakɛ Yehowa, nyɛNyɔŋmɔ lɛ, hã ekuɛŋ ti, ni ekpliŋ etsui bɔ ni afee ni wɔ kɛ lɛ awu ni wɔye enɔ kunim tamɔ eyɔɔ ŋmɛnɛ nɛɛ lɛ.

³¹ “Kɛkɛ ni Yehowa kɛɛ mi akɛ, ‘Naa, mibɔ̃i Maŋtsɛ Sihon kɛ eshikpɔŋ lɛ nɔjɔɔmɔ kɛ bo hãmɔ; bɔ̃imɔ shikpɔŋ lɛ shɔ̃mɔ koni nyɛhi nɔ.’

³² Maŋtsɛ Sihon kɛ etabilɔi fɛɛ fã kɛba koni amɛ kɛ wɔ abawu yɛ Yahaz maŋ lɛ masɛi.

³³ Yehowa, wɔNyɔŋmɔ lɛ, jɔɔ Maŋtsɛ Sihon nɔ ehã wɔ, ni wɔgbe lɛ kɛ ebihii lɛ kɛ etabilɔi lɛ fɛɛ.

³⁴ Wɔŋɔ emaji fɛɛ nakai be lɛ mli nɔŋŋ, ni wɔkpãtã maŋ fɛɛ maŋ kɛ hii kɛ yei kɛ gbekɛbii fɛɛ ahiɛ; wɔshwɛɛɛ gbɔmɔ hiɛkãalɔ kome nɛkɛ.

³⁵ Wɔloo kooloi lɛ wɔhã wɔhe akɛ haanii kɛ maji ni wɔŋɔŋɔɔ lɛ amli nibii hu.

³⁶ Kɛjɛ Aroer maŋ lɛ ni kã Arnon Faa lɛ jɔɔ lɛ toi, kɛ maŋ lɛ ni yɔɔ jɔɔ lɛ teŋ kɛyashi Gilead maŋ lɛ mli tɔ̃ɔ lɛ, maŋ ko maŋ ko bɛ ni wɔyeee enɔ kunim. Yehowa, wɔNyɔŋmɔ lɛ, jɔɔ eko fɛɛ eko nɔ ehã wɔ.

³⁷ Amonbii lɛ ashikpɔŋ lɛ pɛ he wɔyataaa, no ji Yabok Faa lɛ hewɔhewɔ shikpɔji lɛ, kɛ gɔji ashikpɔji lɛ anɔ maji lɛ, kɛ he fɛɛ he ni Yehowa wɔNyɔŋmɔ lɛ, bɔ wɔ kɔkɔ akɛ wɔkata he lɛ.”