5 Mose 19 - ŊMALƐ KRƆŊKRƆŊ LƐ

Abobaa Maji lɛ

¹ “Kɛji Yehowa, nyɛNyɔŋmɔ lɛ, kpãtã maji anɔ bii lɛ ni eŋɔɔ amɛshikpɔŋ lɛ ehã nyɛ lɛ ahiɛ, ni nyɛŋɔ amɛshikpɔŋ lɛ kɛ amɛmaji lɛ kɛ amɛshĩai lɛ ni nyɛhi mli lɛ,

^2-3 nyɛhalaa shikpɔŋ lɛ nɔ maji etɛ̃ nyɛtoa. Nyɛjaa shikpɔŋ tso muu ni Yehowa, nyɛNyɔŋmɔ lɛ, kɛhãa nyɛ akɛ nyɛnɔ lɛ fɛɛ mli etɛ̃. Nyɛhalaa shikpɔŋ lɛ nɔ maji etɛ̃ nyɛtoa bɔ ni afee ni mɔ fɛɛ mɔ ni egbe gbɔmɔ lɛ, enyɛ ejo foi oya kɛya jɛi eyaba abo.

⁴ “Mla ni yɔɔ gbɔmɔgbelɔ ni aaajo foi kɛya abobaa maŋ ko mli koni ehere eyiwala lɛ nɛ: Mɔ ni nine aaayakpa yɛ enaanyo nɔ, be mli ni jeee akɛ ebɛ mɔ lɛ ewo emli momo sa lɛ, ejo foi kɛya abobaa maji lɛ eko mli, koni efee shweshweeshwe.

⁵ Wɔŋɔ lɛ akɛ nyɛyi enyɔ nyɛtee koo ko mli nyɛyaafo tso, ni be ni nyɛ teŋ mɔ kome wo elema lɛ nɔ koni efo tso lɛ, lema lɛ fã yɛ etso lɛ he, ni eyatswa mɔ kome ni egbe lɛ lɛ, gbɔmɔgbelɔ lɛ aaanyɛ ajo foi kɛya maŋ nɛɛ eko mli, ni eyi aaana wala.

⁶ Ejaakɛ kɛji abobaa maŋ kome too ayɔɔ lɛ, maŋ lɛ mli baajekɛ, ni mɔ ni agbe lɛ lɛ wekunyo ni baatɔ mɔ ni egbo lɛ lá lɛ he owele lɛ, baatiu gbɔmɔgbelɔ lɛ, be mli ni etsui he ejɔko, ni kɛji eyanina lɛ lɛ, eeetswa lɛ nɔ egbe lɛ; tsɛbelɛ esaaa akɛ gbɔmɔgbelɔ lɛ agbo, ejaakɛ enyɛko mɔ ni egbe lɛ lɛ etoko.

⁷ No hewɔ ni mifãa nyɛ akɛ nyɛhala maji etɛ̃ nyɛto lɛ.

^8-9 “Nyɛhalaa maji etɛ̃ krokomɛi hu nyɛkɛfataa abobaa maji etɛ lɛ ahe kɛji Yehowa, nyɛNyɔŋmɔ lɛ, lɛɛ nyɛhusui lɛ amli ehã nyɛ, tamɔ bɔ ni ewo nyɛtsɛmɛi lɛ shi akɛ ebaafee lɛ, ni ekɛ shikpɔŋ ni ewo nyɛtsɛmɛi lɛ shi yɛ he akɛ ekɛbaahã amɛ lɛ fɛɛ hã nyɛ lɛ. Kɛji nyɛye nɛkɛ kitãi nɛɛ fɛɛ anɔ, ni nyɛfee nɔ ni kitãi lɛ kɛɔ lɛ, ni nyɛsumɔ Yehowa, nyɛNyɔŋmɔ lɛ, ni nyɛba nyɛjeŋ bɔ ni etaoɔ lɛ, eeeŋɔ shikpɔŋ lɛ ehã nyɛ.

¹⁰ Nyɛfea enɛ koni akashwie mɔ ni efeko nɔ fɔŋ ko lá shi yakatswaa yɛ shikpɔŋ ni Yehowa, nyɛNyɔŋmɔ lɛ, kɛhãa nyɛ lɛ nɔ, ni nyɛbaye lá yi sɔ̃.

¹¹ “Shi kɛji mɔ ko miinyɛ enyɛmi, ni no hewɔ lɛ, eyawo enyɛmi lɛ ka, ni etua lɛ, ni etswa lɛ nɔ, ni epila lɛ ablaŋ, ni mɔ lɛ tsɔ̃ mli egbo, ni gbɔmɔgbelɔ nɛɛ jo foi kɛtee nɛkɛ abobaa maji nɛɛ ateŋ eko mli lɛ,

¹² gbɔmɔgbelɔ nɛɛ maŋ onukpai lɛ atsu koni ayaŋɔ gbɔmɔgbelɔ lɛ yɛ abobaa maŋ lɛ mli kɛba. Kɛji akɛ lɛ ba lɛ onukpai lɛ atu lɛ awo mɔ ni esa akɛ etɔ lá he owele lɛ dɛŋ koni egbe gbɔmɔgbelɔ lɛ.

¹³ Akana lɛ mɔbɔ kɔkɔɔkɔ. Ajie mɔ ni eye bem lɛ lá yi sɔ̃ kɛje Israel nɔ, koni ahi ahã nyɛ.

Blema husui lɛ

¹⁴ “Kaajie onaanyo kɛ bo teŋ husu nɔ okadi ni blemabii lɛ eto jeeŋmɔ lɛ kɛtee sɛɛ, yɛ shikpɔŋ ni Yehowa kɛhãa nyɛ koni etsɔ̃ nyɛnɔ lɛ nɔ.

Odaseyeli he akpɔi

¹⁵ “Akadamɔ odasefonyo kome naa wiemɔ nɔ abu mɔ ko fɔ. Esa akɛ ana odasefoi enyɔ loo etɛ̃ anaa wiemɔ dani adamɔ no nɔ kɛbu fɔ yɛ sane fɛɛ sane mli.

¹⁶ Kɛji mɔ ko to yiŋ sha yɛ enaanyo he, ni ekata sane efɔ̃ enaanyo lɛ nɔ lɛ,

¹⁷ mɛi enyɔ ni sane kã amɛteŋ lɛ aba osɔfoi kɛ kojolɔi ni tsuɔ nii nakai be lɛ mli lɛ ahiɛ yɛ Yehowa jamɔhe lɛ.

¹⁸ Kojolɔi lɛ atao sane lɛ mli fitsofitso. Kɛji ana akɛ sanetsɛ lɛ je gbɛ ekata sane efɔ̃ enyɛmi lɛ nɔ yaka, ni eye amale odase eshi enyɛmi lɛ,

¹⁹ afee lɛ bɔ pɛpɛɛpɛ ni etao akɛ afee enyɛmi lɛ. Kɛkɛ lɛ nyɛkɛjie nɔ fɔŋ nɛɛ yɛ nyɛteŋ.

²⁰ Mɛi krokomɛi baanu nɔ ni ba lɛ, ni ebaahã amɛshe gbeyei, ni amɛteŋ mɔ ko mɔ ko efeŋ nɔ fɔŋ nɛɛ eko yɛ nyɛteŋ dɔŋŋ.”

²¹ Akana mɔbɔ kwraa; akɛ wala atse wala; akɛ hiŋmɛi atse hiŋmɛi; akɛ nyanyɔŋ atse nyanyɔŋ; akɛ nine atse nine, ni akɛ nane atse nane.