5 Mose 18 - ŊMALƐ KRƆŊKRƆŊ LƐ

Osɔfoi agbɛfaŋnɔ

¹ “Levibii ni ji osɔfoi akutso lɛ, akahã amɛ shikpɔŋ lɛ eko yɛ Israelbii lɛ ateŋ; amɛgbɛfaŋnɔ ji afɔlei ni ashãa ahãa mi, Yehowa, akɛ migbɛnaanii lɛ. Mijɔɔ no nɔ mihã amɛ koni amɛye.

² Akahã amɛ shikpɔŋ ni abaaja lɛ eko tamɔ abaahã amɛnyɛmimɛi akutsei krokomɛi lɛ. Mi ji amɛgbɛfaŋnɔ tamɔ bɔ ni miwo amɛ shi lɛ.

³ “Kɛji akɛ tsina loo too bashã afɔle lɛ, akɛ kooloo lɛ nine lɛ kɛ kadaa lɛ kɛ musuŋ kotoku lɛ ahã osɔfoi lɛ akɛ osɔfoi agbɛnaanɔ ni yɔɔ afɔle lɛ mli.

⁴ Klɛŋklɛŋ obele ni obaaku kɛ owain kɛ omu klɛŋklɛŋ ni oooŋa kɛ otoi ahetsɔi ni oooku lɛ okɛhã osɔfoi lɛ tsuutsu.

⁵ Ejaakɛ Yehowa, nyɛNyɔŋmɔ lɛ, eŋɔ Levi kɛjɛ nyɛkutsei lɛ fɛɛ ateŋ koni lɛ kɛ eshwiei lɛ asɔmɔ yɛ ehiɛ akɛ osɔfoi kɛya naanɔ.

⁶ “Levinyo ni miisumɔ baanyɛ eshi Israel maŋ fɛɛ maŋ ni eyɔɔ mli lɛ koni eya he ni Yehowa eto akɛ aja lɛ yɛ lɛ. Kɛji eba lɛ nakai lɛ,

⁷ esɔmɔ Yehowa, eNyɔŋmɔ lɛ, akɛ osɔfo tamɔ enyɛmimɛi Levibii ni yɔɔ jɛi lɛ nɔŋŋ.

⁸ Ekɛ enyɛmimɛi osɔfoi krokomɛi lɛ ana afɔleshãa latɛ lɛ naa niyenii lɛ pɛpɛɛpɛ; shi nii ni eeena kɛjɛ etsɛmɛiawe lɛ ekome enɔ ni.

Wɔŋjamɔ he kɔkɔbɔɔ

⁹ “Kɛji nyɛyashɛ shikpɔŋ ni Yehowa, nyɛNyɔŋmɔ lɛ kɛhãa nyɛ nɛɛ nɔ lɛ, nyɛkakasea jɛibii lɛ amusubɔɔ nii ni amɛfeɔ lɛ.

¹⁰ Nyɛteŋ mɔ ko mɔ ko akagbe ebinuu loo ebiyoo ekɛshã afɔle; akana klamɔfonyo loo ashwãifeelɔ loo okɔmfo loo ŋkunyaayelɔ

¹¹ loo hoŋkpãatsɛ loo sisatsɛlɔ loo ayɛ yɛ nyɛteŋ.

¹² Ejaakɛ Yehowa miihi mɔ fɛɛ mɔ ni feɔ nii nɛɛ ateŋ eko lɛ; ni no hewɔ ni Yehowa, nyɛNyɔŋmɔ lɛ, shwieɔ shikpɔŋ lɛ nɔ bii lɛ yɛ nyɛhiɛ lɛ.

¹³ Yehowa, nyɛNyɔŋmɔ lɛ, akana tɔ̃mɔ ko yɛ nyɛhe.

Awo Gbalɔ he shi

¹⁴ “Maji anɔ bii ni nyɛyaa nyɛyaŋɔ amɛshikpɔŋ nɛɛ lɛ, amɛboɔ klamɔfoi kɛ ŋkunyaayelɔi atoi; shi nyɛ lɛ, Yehowa, nyɛNyɔŋmɔ lɛ, eŋmɛɛɛ nyɛ gbɛ ni nyɛfee nakai nɔ ko.

¹⁵ “Yehowa, nyɛNyɔŋmɔ lɛ, baatee gbalɔ ko ni tamɔ mi shi yɛ nyɛ nyɛteŋ, ni lɛ toi esa akɛ nyɛbo.

¹⁶ “Gbi ni akpe yɛ Sinai Gɔŋ lɛ he lɛ, nyɛkpa Yehowa, nyɛNyɔŋmɔ lɛ, fai nyɛkɛɛ akɛ, ‘Wɔnyɛŋ wɔnu Yehowa, wɔNyɔŋmɔ lɛ, diɛŋtsɛ gbee aloo wɔna enunyam ni kpɛlɛɔ nyramnyram lɛ dɔŋŋ koni wɔkagboi.’

¹⁷ Ni Yehowa kɛɛ mi akɛ, ‘Amɛwiemɔ lɛ ja naakpa.

¹⁸ Mibatee gbalɔ ko shi tamɔ bo mahã amɛ, yɛ amɛnyɛmimɛi lɛ ateŋ, ni ebaakɛɛ emaŋbii lɛ nɔ ni mikɛhã lɛ akɛ ekɛɛ amɛ lɛ.

¹⁹ No hewɔ lɛ, mɔ fɛɛ mɔ ni booo wiemɔi ni ebaawie yɛ migbɛi mli lɛ toi lɛ, mibagbala mɔ lɛ toi yɛ no hewɔ.

²⁰ Shi gbalɔ ni aaato lɛ diɛŋtsɛ eyiŋ ni ewie wiemɔ ko yɛ migbɛi mli, be mli ni jeee mi mifã lɛ akɛ ewie nakai wiemɔ lɛ, ja agbe lɛ; nakai nɔŋŋ gbalɔ ko ni aaawie yɛ nyɔŋmɔi krokomɛi agbɛi amli hu agbe lɛ.’

²¹ “Nyɛaabi nyɛhe akɛ, ‘Te wɔɔfee tɛŋŋ ni wɔle gbalɛ ni jeee Yehowa dɛŋ ejɛ hu?’

²² Nyɛnaa nyɛlea akɛ kɛji gbalɔ ko wie yɛ Yehowa gbɛi mli, ni gbalɛ lɛ baaa mli loo ebɛ mli lɛ, no tsɔ̃ɔ akɛ jeee Yehowa dɛŋ nakai wiemɔ lɛ jɛ. Gbalɔ lɛ diɛŋtsɛ ni to eyiŋ ni ewie, ni no hewɔ lɛ, kaashe nakai gbalɔ lɛ gbeyei.”