5 Mose 11 - ŊMALƐ KRƆŊKRƆŊ LƐ

Yehowa agbojee

¹ “No hewɔ lɛ, esa akɛ nyɛsumɔ Yehowa, nyɛNyɔŋmɔ lɛ, ni nyɛye egbei kɛ ekpɔi lɛ kɛ emlai lɛ kɛ ekitãi lɛ fɛɛ nɔ daa nɛɛ.

² Ŋmɛnɛ gbi nɛɛ nyɛkaia tsɔsemɔ ni Yehowa, nyɛNyɔŋmɔ lɛ, etsɔse nyɛ lɛ, kɛ egbojee lɛ kɛ enineshiwalɛ lɛ kɛ ehewalɛ lɛ hu. Ejaakɛ jeee nyɛbii ni amɛnako aloo amɛleko nibii nɛɛ ji mɛi ni mikɛ wieɔ nɛɛ.

³ Shi moŋ nyɛ mɛi ni nyɛle okadii ni efee kɛ nibii ni efee Ijipt Maŋtsɛ lɛ kɛ eshikpɔŋ tso muu lɛ fɛɛ yɛ Ijipt lɛ.

⁴ Nyɛna nɔ ni Yehowa fee Ijiptbii ata lɛ kɛ amɛkpɔŋɔi lɛ kɛ amɛtayaa shwiilii lɛ; bɔ ni ehã Ŋshɔ Tsuru lɛ baha amɛ fɛɛ amɛnɔ, ni amɛhiɛ kpãtã be mli ni amɛtiuɔ nyɛ lɛ.

⁵ Nyɛle nibii ni Yehowa tsu ehã nyɛ yɛ shiaŋa lɛ nɔ aahu kɛbashi beyinɔ ni nyɛbashɛ biɛ nɛɛ lɛ.

⁶ Nyɛkaiɔ nɔ ni efee Datan kɛ Abiram ni ji Ruben bi Eliab bii lɛ. Nyɛ Israel fɛɛ, nyɛhiɛ ni shikpɔŋ gba, ni emi amɛ kɛ amɛshiaŋbii kɛ amɛbii kɛ amɛtsuji kɛ amɛkooloi fɛɛ hu.

⁷ Nyɛ nyɛkɛ nyɛhiŋmɛi na nibii wuji nɛɛ fɛɛ ni Yehowa tsu lɛ.”

Shiwoo Shikpɔŋ lɛ nɔ jɔɔmɔi

⁸ “No hewɔ lɛ, kitãi fɛɛ ni miwoɔ nyɛ ŋmɛnɛ gbi nɛɛ lɛ nyɛyea nɔ, bɔ ni afee ni nyɛhe awa koni nyɛnyɛ nyɛya nyɛyaŋɔ shikpɔŋ ni nyɛfoɔ mli kɛya nyɛyaŋɔ lɛ;

⁹ asaŋ koni nyɛwala sɛɛ atsɛ yɛ shikpɔŋ kpakpa ni baa nii ni Yehowa wo nyɛtsɛmɛi shi akɛ ekɛbaahã amɛ kɛ amɛshwiei lɛ nɔ.

¹⁰ Ejaakɛ shikpɔŋ ni nyɛyaa ni nyɛyaŋɔ lɛ etamɔɔɔ Ijipt shikpɔŋ lɛ, he ni nyɛjɛ lɛ, he ni kɛji nyɛdu nii lɛ ja nyɛkɔ nyɛnane nyɛyashwie dumɔ nii lɛ nɔ nu dã, tamɔ afeɔ abɔɔ mli nii lɛ.

¹¹ Shi moŋ shikpɔŋ ni nyɛyaa ni nyɛyaŋɔ lɛ, gɔji kɛ jɔi ashikpɔŋ ni; ni nu nɛɔ nɔ;

¹² eji shikpɔŋ ko ni Yehowa, nyɛNyɔŋmɔ lɛ, baa yi, ni ehiŋmɛi yɛ he afi muu lɛ fɛɛ.

¹³ “Kɛji nyɛye kitãi ni miwoɔ nyɛ ŋmɛnɛ nɛɛ akɛ nyɛsumɔ Yehowa, nyɛNyɔŋmɔ lɛ, ni nyɛkɛ nyɛtsui kɛ nyɛnyɛmɔ fɛɛ hu asɔmɔ lɛ lɛ nɔ lɛ,

¹⁴ no lɛ ebaahã nu anɛ nyɛshikpɔŋ lɛ nɔ yɛ ebe mli, Agbiɛnaa kɛ Gbo fɛɛ, koni nyɛbele kɛ nyɛwaintso yibii kɛ mutso mu aba ahã nyɛ ni nyɛkpa.

¹⁵ Ŋa nɔ jwɛi afu ahã nyɛkooloi. Nyɛbaana nii nyɛye ni nyɛtɔrɔ.

¹⁶ Nyɛkwɛa nyɛhe ni ahia, bɔ ni afee ni nɔ ko akalaka nyɛ ni nyɛkpale yɛ Yehowa sɛɛ nyɛyasɔmɔ nyɔŋmɔi krokomɛi ni nyɛja amɛ.

¹⁷ Kɛji nyɛfee nɛkɛ nɔ ko lɛ, Yehowa mli baafu nyɛ, ni ebaatsi nu naa, ni nu enɛŋ, ni shikpɔŋ lɛ baŋ nii, ni nyɛhiɛ baakpãtã oya yɛ shikpɔŋ kpakpa ni Yehowa kɛhã nyɛ lɛ nɔ.

¹⁸ “No hewɔ lɛ, nyɛkɛ miwiemɔi lɛ atoa nyɛtsuiiaŋ kɛ nyɛmumɔ mli; nyɛkɛfimɔa nyɛnijiashi kɛ nyɛhiɛŋtsei anɔ akɛ hekaimɔ nii.

¹⁹ Nyɛtsɔ̃a nyɛbii; nyɛwiea he be ni nyɛtara shi yɛ shĩateŋ kɛ be ni nyɛnyiɛ gbɛ, kɛ be ni nyɛjɔɔ nyɛhe kɛ be ni nyɛtsuɔ nii fɛɛ.

²⁰ Nyɛŋmaa yɛ nyɛshĩai lɛ ashinaatsei lɛ kɛ nyɛmaji lɛ agboi lɛ hu ahe,

²¹ koni nyɛwala kɛ nyɛbii lɛ hu awala sɛɛ atsɛ yɛ shikpɔŋ ni Yehowa wo nyɛtsɛmɛi lɛ shi akɛ ekɛbaahã amɛ lɛ nɔ gbii abɔ ni ŋwɛi kɛ shikpɔŋ yɔɔ nɛɛ.

²² “Kɛji nyɛjwɛŋ nɛkɛ kitãi nɛɛ ni miwoɔ nyɛ nɛɛ nɔ, ni nyɛye nɔ, ni nyɛsumɔ Yehowa, nyɛNyɔŋmɔ lɛ, ni nyɛhi shi pɛpɛɛpɛ bɔ ni etsɔ̃ɔ nyɛ lɛ, ni nyɛkpɛtɛ ehe lɛ,

²³ no lɛ Yehowa baashwie maji nɛɛ fɛɛ yɛ nyɛhiɛ, ni nyɛbaashɔ̃shɔ̃ɔ maji ni dara ni amɛhe wa fe nyɛ ashikpɔji yɛ amɛdɛŋ, ni nyɛbaaŋɔ akɛ nyɛnɔ.

²⁴ He fɛɛ he ni nyɛnane aaasa lɛ jɛi aaatsɔ̃ nyɛnɔ. Nyɛshikpɔŋ lɛ baajɛ shiaŋa lɛ nɔ yɛ wuoyigbɛ, kɛyanina Lebanon gɔji lɛ yɛ kooyigbɛ; ni ebaajɛ Eufrate Faa lɛ naa yɛ bokãgbɛ kɛyamɔ Mediterenia Ŋshɔ lɛ yɛ anaigbɛ.

²⁵ Yehowa, nyɛNyɔŋmɔ lɛ, baahã nyɛhe ŋmiŋmi kɛ nyɛhe gbeyei amɔmɔ shikpɔŋ fɛɛ shikpɔŋ ni nyɛaayashɛ nɔ lɛ nɔ bii, ni mɔ ko mɔ ko nyɛŋ nyɛhiɛ adamɔ tamɔ bɔ ni ewo nyɛ shi lɛ.

²⁶ “Naa, mikɛ jɔɔmɔ kɛ loomɔ miishwie nyɛhiɛ ŋmɛnɛ gbi nɛɛ.

²⁷ Ebaafee jɔɔmɔ ehã nyɛ kɛji nyɛye Yehowa, nyɛNyɔŋmɔ lɛ, kitãi lɛ ni miwoɔ nyɛ ŋmɛnɛ nɛɛ nɔ;

²⁸ shi eeefee loomɔ ehã nyɛ kɛji nyɛyeee Yehowa, nyɛNyɔŋmɔ lɛ, kitãi lɛ anɔ; kɛji nyɛyahiii shi bɔ ni miwoɔ nyɛ kitã ŋmɛnɛ nɛɛ akɛ nyɛhi shi lɛ, ni nyɛyaja nyɔŋmɔi krokomɛi ni nyɛleee sa lɛ.

²⁹ Kɛji Yehowa, nyɛNyɔŋmɔ lɛ, kɛ nyɛ yashɛ shikpɔŋ ni nyɛyaa nyɛyaŋɔ lɛ nɔ lɛ, daamɔ Gerizim Gɔŋ lɛ yiteŋ koni ojaje nɔ ni ji jɔɔmɔ lɛ otsɔ̃ɔ; ni loomɔ lɛ odamɔ Ebal Gɔŋ lɛ yiteŋ ojaje otsɔ̃ɔ.

³⁰ (Gɔji enyɔ nɛɛ yɛ Yordan Faa lɛ anaigbɛ yɛ Kanaanbii lɛ ni yɔɔ Yordan Jɔɔ lɛ mli lɛ shikpɔŋ lɛ nɔ yɛ More tsei lɛ amasɛi yɛ Gilgal maŋ lɛ ŋlɛnɔ).

³¹ Ejaakɛ nyɛbaafo Yordan lɛ koni nyɛyaŋɔ shikpɔŋ lɛ ni Yehowa, nyɛNyɔŋmɔ lɛ, kɛhãa nyɛ lɛ. Kɛji nyɛtee nyɛyaŋɔ shikpɔŋ nɛɛ, ni nyɛhi nɔ lɛ,

³² nyɛkwɛa jogbaŋŋ koni nyɛye akpɔi lɛ fɛɛ kɛ mlai lɛ hu fɛɛ ni mikɛshwieɔ nyɛhiɛ ŋmɛnɛ gbi nɛɛ lɛ anɔ.