4 Mose 8 - ŊMALƐ KRƆŊKRƆŊ LƐ

Akɛ kanetsei lɛ mamɔ̃ shi

¹ Yehowa kɛɛ Mose akɛ,

² “Kɛɛmɔ Aaron akɛ kɛji ekɛ kanei lɛ miimamɔ kanetsei kpawo lɛ anɔ lɛ, ekɛ amɛ amãmɔ shi bɔ ni amɛbaakpɛ kɛya kanetso lɛ hiɛgbɛ.”

³ Aaron fee bɔ ni Yehowa fã Mose lɛ, ni ekɛ kanei lɛ mamɔ shi bɔ ni amɛbaakpɛ kɛya kanetso lɛ hiɛgbɛ.

⁴ Bɔ ni kanetso lɛ yɔɔ ji akɛ atswia lɛ shika sɔŋŋ nii kɛjɛ eshitamɔnɔ lɛ nɔ, kɛmɔ ehe fɔfɔii lɛ aahu kɛyagbe naa emuu. Bɔ ni nɔkwɛmɔnɔ lɛ ni Yehowa kɛtsɔ̃ɔ Mose lɛ yɔɔ lɛ nakai pɛpɛɛpɛ afee kanetso lɛ.

⁵ Yehowa kɛɛ Mose akɛ,

⁶ “Halamɔ Levibii lɛ yɛ Israelbii lɛ ateŋ koni otsuu amɛhe.

⁷ Ni bɔ ni ofee amɛ ni otsuu amɛhe nɛ. Okɛ nu ni akɛtsuɔ mɔ he lɛ ashwã amɛnɔ; amɛshɛ amɛhe tsɔi fɛɛ kɛ kakla, ni amɛfɔ amɛtadei ahe koni amɛhe atse.

⁸ Enɛ sɛɛ lɛ ohã amɛŋɔ tsina oblanyo, ni akɛ niyenii afɔle ni ji ŋmãa mamu ni awo mli mu afata he; ni bo diɛŋtsɛ hu oŋɔ̃ tsina oblanyo kroko ni okɛshã esha he afɔle.

⁹ Ohã Israelbii asafo muu lɛ fɛɛ ababɔ gwa; ni ohã Levibii lɛ adamɔ Kpee Buu lɛ hiɛ.

¹⁰ Israelbii asafo lɛ kɛ amɛniji ashwie Levibii lɛ ayitsei anɔ be mli ni ohã Levibii lɛ ebadamɔ Yehowa Buu lɛ hiɛ lɛ.

¹¹ No sɛɛ lɛ, Aaron ajɔɔ Levibii lɛ anɔ ahã mi, Yehowa, akɛ afɔle krɛdɛɛ ni jɛ Israelbii lɛ adɛŋ koni amɛsɔ̃mɔ mi.

¹² Levibii lɛ kɛ amɛniji ashwie tsinahii lɛ ayiteŋ; ni okɛ ekome ashã esha he afɔle, ni okɛ ekome hu ashã shãa afɔle okɛhã Yehowa koni okɛkpãtã ohã Levibii lɛ.

¹³ “Jɔɔmɔ Levibii lɛ anɔ ohã mi koni amɛwa Aaron kɛ ebihii lɛ kɛsɔ̃mɔ,

¹⁴ koni ojie Levibii lɛ yɛ Israelbii krokomɛi lɛ ateŋ oto afã akɛ minɔ.

¹⁵ Otsuu amɛhe koni no sɛɛ lɛ amɛba Kpee Buu lɛ mli amɛbasɔ̃mɔ yɛ jɛi.

¹⁶ Ejaakɛ miiŋɔ amɛ kwraa yɛ Israelbii lɛ ateŋ miihã mihe; mikɛ amɛ eto nɔ fɛɛ nɔ ni gbeleɔ musu naa ni ji Israelbii akromɔbii lɛ anajiaŋ.

¹⁷ Ejaakɛ gbi nɔ ni mitswia kromɔbii fɛɛ anii yɛ Ijipt shikpɔŋ lɛ nɔ lɛ, mijɔɔ Israelbii lɛ ateŋ kromɔbi fɛɛ kromɔbi kɛ shĩa kooloo kromɔbi fɛɛ kromɔbi hu nɔ mihã mihe, ni mifee lɛ minɔ.

¹⁸ Levibii lɛ mikɛto Israelbii lɛ akromɔbii fɛɛ anajiaŋ

¹⁹ ni mikɛ Levibii lɛ miihã Aaron kɛ ebihii lɛ kwraa akɛ Israelbii lɛ adɛŋ nikeenii koni amɛsɔ̃mɔ yɛ Kpee Buu lɛ mli yɛ Israelbii lɛ anajiaŋ bɔ ni afee ni amɛkpãtã efɔŋ ni baaba maŋbii anɔ kɛji amɛbɛŋkɛ He Krɔŋkrɔŋ lɛ.”

²⁰ No hewɔ lɛ, Mose kɛ Aaron kɛ Israelbii asafo muu lɛ fɛɛ jɔɔ Levibii lɛ anɔ amɛhã. Bɔ pɛpɛɛpɛ ni Yehowa fã Mose akɛ efee yɛ Levibii lɛ agbɛfaŋ lɛ, nakai Israelbii lɛ fee Levibii lɛ.

²¹ Levibii lɛ tsu kusum kɛfɔ amɛhe eshai; amɛfɔfɔɔ amɛtadei ahe, ni Aaron jɔɔ amɛnɔ ehã akɛ keenii krɛdɛɛ hã Yehowa. Asaŋ etsuu amɛhe hu.

²² No sɛɛ lɛ, Levibii lɛ tee Buu lɛ mli, ni amɛyasɔ̃mɔ yɛ Aaron kɛ ebihii lɛ ashishi. Bɔ ni Yehowa fã Mose akɛ efee yɛ Levibii lɛ agbɛfaŋ lɛ, nakai efee amɛ.

²³ Yehowa kɛɛ Mose akɛ,

²⁴ “Levibii lɛ ahe gbɛjianɔtoo nɛ: Mɛi ni eye kɛjɛ afii nyɔŋmai enyɔ kɛ enumɔ kɛyaa lɛ, amɛtsu nii yɛ Kpee Buu lɛ mli,

²⁵ ni mɛi ni eye afii nyɔŋmai enumɔ lɛ, afɔ̃ɔ nitsumɔ lɛ ni amɛjɔɔ amɛhe.

²⁶ Be nɛɛ sɛɛ lɛ, amɛaanyɛ amɛwa amɛnyɛmimɛi lɛ kɛsɔ̃mɔ yɛ Kpee Buu lɛ mli; shi moŋ nitsumɔ ko akakã amɛnɔ. Gbɛjianɔ ni oto ohã Levibii lɛ yɛ amɛgbɛnaa nitsumɔi lɛ agbɛfaŋ nɛ.”