4 Mose 36 - ŊMALƐ KRƆŊKRƆŊ LƐ

Yeigbãyei agbɛfaŋnii

¹ Yosef bi Manase bi Makir bi Gilead shwiei lɛ atsɛmɛi ashĩai lɛ amli onukpai lɛ tsi bɛŋkɛ Mose kɛ Israelbii lɛ akutseiaŋ onukpai lɛ,

² ni amɛkɛɛ amɛ akɛ, “Yehowa fã nyɛ akɛ nyɛfɔ̃ oshiki koni nyɛkɛja shikpɔŋ lɛ nyɛhã Israelbii lɛ. Asaŋ efã hu akɛ nyɛkɛ wɔnyɛmi Zelofehad gbɛfaŋ nɔ lɛ ahã ebiyei lɛ.

³ Belɛ kɛji biyei nɛɛ kɛ Israel hii ni jɛ akutsei krokomɛi amli yabote gbãlãshihilɛ mli lɛ, abaajie amɛgbɛfaŋnɔ lɛ yɛ nɔ ni abaahã wɔ lɛ mli koni akɛfata amɛwumɛi lɛ atsɛmɛi agbɛfaŋnɔ lɛ he; enɛ baahã wɔtsɛmɛi lɛ agbɛfaŋnɔ lɛ nɔ agbɔ.

⁴ No hewɔ lɛ, kɛji eshɛ Israelbii aNyamɔ Afiyeli be lɛ abaaŋɔ nɛkɛ amɛgbɛfaŋnɔ nɛɛ afata akutsei ni amɛtee gbãlã yɛ mli lɛ agbɛfaŋnɔ lɛ he, ni ebaaje wɔtsɛmɛi agbɛfaŋnɔ lɛ mli kwraa.”

⁵ Enɛ hewɔ lɛ, Mose wo Israelbii lɛ kitã yɛ Yehowa fãmɔ naa ni ekɛɛ akɛ, “Bɔ ni Yosef bi Manase shwiei akutso lɛ kɛɛ lɛ eja.

⁶ Kitã ni Yehowa woɔ yɛ Zelofehad biyei lɛ ahewɔ nɛ: Zelofehad biyei lɛ yɛ hegbɛ aahu akɛ amɛkɛ hii fɛɛ hii ni amɛsumɔɔ boteɔ gbãlãshihilɛ mli moŋ, shi esa akɛ hii lɛ ajɛ amɛtsɛmɛi akutso lɛ mli wekui lɛ eko mli,

⁷ bɔ ni afee ni Israelbii akutso gbɛfaŋnii akaje akutso kome dɛŋ kɛmiiya akutso kroko dɛŋ; shi moŋ Israelnyo gbɛfaŋ nɔ lɛ ebaafata etsɛmɛi awe gbɛfaŋ nɔ ko lɛ he.

⁸ Biyoo fɛɛ biyoo ni naa Israel akutso ko mli gbɛfaŋ nɔ yɛ Israelbii ateŋ lɛ, esa akɛ egbã etsɛ akutso lɛ mli nuu, bɔ ni afee ni Israelbii ateŋ mɔ fɛɛ mɔ tsɛmɛi agboshinii lɛ ahi ekutso lɛ dɛŋ be fɛɛ be,

⁹ koni gboshinii akajɛ akutso kome dɛŋ kɛmiiya akutso kroko dɛŋ; shi moŋ akutso fɛɛ akutso mli gboshinii ahi edɛŋ daa.”

¹⁰ Zelofehad biyei lɛ ye nɔ ni Yehowa kɛɛ Mose lɛ nɔ,

¹¹ ni Mahela kɛ Tirza kɛ Hogla kɛ Milka kɛ Noa, ni ji Zelofehad biyei lɛ, kɛ amɛtsɛkwɛmɛi abihii saŋŋ bote gbãlãshihilɛ mli.

¹² Amɛwumɛi lɛ fɛɛ jɛ Yosef bi Manase shwiei awekui lɛ amli; ni no hewɔ lɛ, amɛgboshinii lɛ ka amɛtsɛ weku lɛ akutso lɛ mli.

¹³ Mlai kɛ akpɔi ni Yehowa tsɔ̃ Mose nɔ ewo Israelbii lɛ be mli ni amɛyɔɔ Moab ŋa kplenee lɛ nɔ yɛ Yordan lɛ naa yɛ Yeriko ŋlɛnɔ lɛ nɛ.