4 Mose 34 - ŊMALƐ KRƆŊKRƆŊ LƐ

Shikpɔŋ lɛ husui lɛ

¹ Yehowa kɛɛ Mose akɛ,

² “Wo Israelbii lɛ kitã ni okɛɛ amɛ akɛ, kɛji nyɛyashɛ Kanaan ni ji shikpɔŋ ni mijɔɔ edalɛ tso muu fɛɛ nɔ akɛ mikɛmiihã nyɛ akɛ nyɛgbɛfaŋnɔ lɛ nɔ lɛ, bɔ ni ehusui lɛ baafee ji nɛkɛ.

³ Nyɛshikpɔŋ lɛ wuoyigbɛ lɛ baakã shi kɛjɛ Zin ŋa lɛ nɔ, ni ebaanyiɛ Edom shikpɔŋ lɛ husu lɛ nɔ. Nyɛwuoyigbɛ husu lɛ baajɛ Ŋoo Ŋshɔ lɛ bokãgbɛ naagbee gbɛ,

⁴ ni ebaadɔ eyi kɛya wuoyigbɛ Akrabim Jɔɔ lɛ mli. Kɛkɛ lɛ efo mli kɛtsɔ Zin kɛtee wuoyigbɛ aahu kɛyashɛ Kadesh Barnea. Kɛjɛ jɛi lɛ husu lɛ baadɔ eyi eŋmɛ kooyi anaigbɛ kɛtsɔ Hazar Adar kɛya Azmon.

⁵ Husu lɛ baadɔ eyi yɛ Azmon kɛyanina Ijipt husu lɛ naa jɔɔ lɛ, ni enaa baaya eyatã yɛ Mediterenia Ŋshɔ lɛ naa.

⁶ Nyɛnaigbɛ husu lɛ ji Mediterenia Ŋshɔ lɛ kɛ enaa shikpɔŋ lɛ.

⁷ “Nyɛkooyigbɛ husu lɛ nyɛbaajie kɛjɛ Mediterenia Ŋshɔ lɛ naa kɛyamɔ Hor Gɔŋ lɛ;

⁸ ni ebaajɛ jɛi hu kɛyamɔ Hamat, koni etsa nɔ kɛya Zedad,

⁹ kɛyashɛ Zifron; ni ebaanyiɛ nɔ koni enaa ayatã yɛ Hazar Enan. Enɛ baafee nyɛkooyigbɛ husu.

¹⁰ “Nyɛbaakadi nyɛbokãgbɛ husu lɛ kɛjɛ Hazar Enan kɛyamɔ Shefam;

¹¹ ni husu lɛ baatsa nɔ kɛjɛ Shefam koni ekpeleke shi kɛya Harbel yɛ Ain bokãgbɛ. Kɛjɛ jɛi lɛ enyiɛ gɔji lɛ anɔ kɛyanina Galilea Kpaakpo lɛ yɛ ebokãgbɛ;

¹² etsa nɔ kɛyamɔ Yordan Faa lɛ koni enaa ayatã yɛ Ŋoo Ŋshɔ lɛ naa. Nyɛshikpɔŋ lɛ kɛ ehe husui ni bɔle lɛ kpula lɛ nɛ.”

¹³ Kɛkɛ ni Mose kɛɛ Israelbii lɛ akɛ, “Shikpɔŋ ni nyɛbaafɔ̃ oshiki kɛja nyɛhã nyɛhe lɛ nɛ, ni ji shikpɔŋ ni Yehowa wo he shi akɛ ekɛbaahã akutsei nɛɛhu kɛ fã lɛ.

¹⁴ Rubenbii akutso lɛ kɛ Gadbii akutso lɛ kɛ Manase akutso lɛ fã lɛ ena amɛgbɛfaŋ shikpɔŋ yɛ amɛtsɛmɛi awei lɛ anaa momo,

¹⁵ yɛ Yordan Faa lɛ sɛɛ yɛ Yeriko ŋlɛnɔ yɛ bokãgbɛ lɛ.”

Onukpai ni kwɛ Shikpɔŋ lɛ jaa lɛ nɔ lɛ

¹⁶ Yehowa kɛɛ Mose akɛ,

¹⁷ “Hii ni aja shikpɔŋ lɛ ahã maŋbii lɛ ji Osɔfo Eleazar kɛ Nun binuu Yoshua.

¹⁸ Shi ŋɔɔ lumɔ kome yɛ akutso fɛɛ akutso mli koni amɛwa kɛja shikpɔŋ lɛ.”

¹⁹ Lumɛi ni aŋɔ yɛ akutsei lɛ amli lɛ agbɛii baa nɛɛ: Yudabii akutso lɛ mli lɛ ŋɔɔ Kaleb, Yefune bi lɛ;

²⁰ Simeonbii akutso lɛ mli lɛ ŋɔɔ Shelumiel, Amihud bi lɛ,

²¹ ni Benyaminbii akutso lɛ mli lɛ ŋɔɔ Elidad, Kision bi lɛ.

²² Danbii akutso lɛ mli lɛ ŋɔɔ Buki, Yogli bi lɛ,

²³ Manasebii akutso lɛ mli lɛ ŋɔɔ Haniel, Efod bi lɛ;

²⁴ ni Efraimbii akutso lɛ mli lɛ ŋɔɔ Kemuel, Shiftan bi lɛ,

²⁵ Zebulonbii lɛ akutso lɛ mli lɛ ŋɔɔ Elizafan, Parnak bi lɛ,

²⁶ Isakarbii lɛ akutso lɛ mli lɛ ŋɔɔ Paltiel, Azan bi lɛ,

²⁷ ni Asherbii lɛ akutso lɛ mli lɛ ŋɔɔ Ahihud, Shelomi bi lɛ,

²⁸ ni Naftalibii lɛ akutso lɛ mli lɛ ŋɔɔ Pedahel, Amihud bi lɛ.

²⁹ Mɛnɛɛmɛi ji hii ni Yehowa fã akɛ amɛja Kanaan shikpɔŋ lɛ amɛhã Israelbii lɛ.