4 Mose 33 - ŊMALƐ KRƆŊKRƆŊ LƐ

Gbɛ ni afã kɛjɛ Ijipt kɛtee Moab lɛ

¹ Be ni Israelbii lɛ shi Ijipt shikpɔŋ lɛ nɔ yɛ amɛkutsei lɛ anaa kɛ Mose kɛ Aaron akɛ amɛhiɛnyiɛlɔi lɛ, hei ni amɛtotoo shi yɛ yɛ amɛgbɛfãa lɛŋ lɛ agbɛii baa nɛɛ.

² Mose ŋmã he fɛɛ he ni yɛ Yehowa fãmɔ naa lɛ ayiɔ mli yɛ lɛ, kɛ he fɛɛ he ni atoɔ shi yɛ lɛ hu gbɛi; ni nomɛi baa nɛɛ.

³ Israelbii lɛ fã nyiɛmɔ kɛjɛ Rameses yɛ afi lɛ mli klɛŋklɛŋ nyɔŋ lɛ nɔ gbi ni ji nyɔŋma kɛ enumɔ lɛ, ni ji Hehoo gbi lɛ nɔ jetsɛremɔ lɛ. Ijiptbii lɛ miikwɛ Israelbii lɛ nɛkɛ nɔŋŋ, ni amɛfã yɛ Yehowa hewalɛ naa.

⁴ No mli lɛ Ijiptbii lɛ miifufuu amɛkromɔbii fɛɛ ni Yehowa egbe lɛ agbohii lɛ. Yehowa kɛ nɛkɛ gbele nɛɛ tsɔ̃ɔ akɛ eyɛ hewalɛ fe Ijiptbii awɔji lɛ.

⁵ Israelbii lɛ yiŋ kɛjɛ Rameses, ni amɛyato shi yɛ Sukot.

⁶ Amɛfã kɛjɛ Sukot ni amɛyato shi yɛ Etam yɛ shiaŋa lɛ naa.

⁷ Amɛfã yɛ Etam, ni amɛdɔ amɛyi kɛtee Pi-Hahirot ni yɔɔ Baal-Zefon bokãgbɛ lɛ, ni amɛyato shi yɛ Migdol masɛi.

⁸ Amɛshi Pi-Hahirot ni amɛfo Ŋshɔ Tsuru lɛ kɛyashɛ Shur Shiaŋa lɛ nɔ; ni be ni amɛnyiɛ gbii etɛ̃ gbɛ lɛ amɛto shi yɛ Mara.

⁹ Be ni amɛfã nyiɛmɔ kɛjɛ Mara lɛ amɛyanina nubui nyɔŋma kɛ enyɔ kɛ amitsrɔbi tsei hu nyɔŋmai kpawo yɛ Elim; no hewɔ lɛ, amɛto shi yɛ jɛi.

¹⁰ Amɛfã nyiɛmɔ kɛjɛ Elim ni amɛyato shi yɛ Ŋshɔ Tsuru lɛ naa.

¹¹ Ni amɛshi Ŋshɔ Tsuru lɛ naa lɛ, amɛyato shi yɛ Sin Shiaŋa lɛ nɔ;

¹² ni kɛjɛ jɛi lɛ amɛyato shi yɛ Dofka.

¹³ Amɛshi Dofka kɛtee Alush;

¹⁴ be ni amɛjɛ Alush lɛ, amɛyawa yɛ Refidim; amɛnaaa nu amɛnu yɛ jɛi.

¹⁵ Kɛjɛ Refidim lɛ hei ni Israelbii lɛ totoo shi yɛ aahu kɛyashɛ Hor Gɔŋ lɛ he nɛ: Klɛŋklɛŋ lɛ Sinai Shiaŋa lɛ nɔ;

¹⁶ kɛkɛ lɛ Kibrot Hataava;

¹⁷ kɛkɛ lɛ Hazerot;

¹⁸ kɛkɛ lɛ Ritma;

¹⁹ kɛkɛ lɛ Rimon Perez;

²⁰ kɛkɛ lɛ Libna;

²¹ kɛkɛ lɛ Risa;

²² kɛkɛ lɛ Kehelata;

²³ kɛkɛ lɛ Shefer Gɔŋ lɛ nɔ;

²⁴ kɛkɛ lɛ Harada;

²⁵ kɛkɛ lɛ Makelot;

²⁶ kɛkɛ lɛ Tahat;

²⁷ kɛkɛ lɛ Tera;

²⁸ kɛkɛ lɛ Milka;

²⁹ kɛkɛ lɛ Hashmona;

³⁰ kɛkɛ lɛ Moserot;

³¹ kɛkɛ lɛ Bene Yaakan;

³² kɛkɛ lɛ Hor Hagidgad;

³³ kɛkɛ lɛ Yotbata;

³⁴ kɛkɛ lɛ Abrona;

³⁵ kɛkɛ lɛ Ezion Geber;

³⁶ kɛkɛ lɛ Zin ŋa lɛ nɔ, no ji Kadesh;

³⁷ kɛkɛ lɛ Hor Gɔŋ lɛ he yɛ Edombii ashikpɔŋ lɛ husu lɛ naa.

³⁸ Yɛ Yehowa fãmɔ naa lɛ Osɔfo Aaron kwɔ kɛtee Hor Gɔŋ lɛ nɔ, ni eyagbo yɛ jɛi yɛ Israelbii lɛ Ijipt shikpɔŋ lɛ nɔ shimɔ sɛɛ afi ni ji nyɔŋmai ejwɛ lɛ mli nyɔŋ ni ji enumɔ lɛ klɛŋklɛŋ gbi lɛ nɔ.

³⁹ Aaron eye afii oha kɛ nyɔŋmai enyɔ kɛ etɛ̃, be ni egbo yɛ Hor Gɔŋ lɛ nɔ lɛ.

⁴⁰ Arad maŋtsɛ ni yɔɔ Kanaan shikpɔŋ lɛ wuoyigbɛ lɛ nu akɛ Israelbii lɛ miiba.

⁴¹ Israelbii lɛ fã kɛjɛ Hor Gɔŋ lɛ he, ni amɛyato shi yɛ Zalmona;

⁴² ni kɛjɛ Zalmona lɛ amɛyato shi yɛ Punon.

⁴³ Kɛjɛ Punon lɛ amɛyato shi yɛ Obot;

⁴⁴ ni kɛjɛ Obot lɛ amɛyato shi yɛ Abarim ni ji maŋ amaŋfɔ̃ ni yɔɔ Moab shikpɔŋ lɛ nɔ lɛ.

⁴⁵ Be ni amɛfã kɛjɛ Abarim lɛ amɛyato shi yɛ Dibon Gad;

⁴⁶ ni kɛjɛ Dibon Gad lɛ amɛyato shi yɛ Almon Diblataim

⁴⁷ ni kɛjɛ Almon Diblataim lɛ amɛyato shi yɛ Abarim Gɔŋ lɛ he yɛ Nebo Gɔŋ lɛ masɛi.

⁴⁸ Kɛkɛ ni amɛfã yɛ Abarim Gɔŋ lɛ he ni amɛyato shi yɛ Moab ŋa kplenee lɛ nɔ yɛ Yordan Faa lɛ bokãgbɛ yɛ Yeriko ŋlɛnɔ.

⁴⁹ Israelbii lɛ to shi yɛ Yordan Faa lɛ naa, ni amɛjwere shi kɛjɛ Bet Yeshimot aahu kɛyashi Akasia Jɔɔ lɛ mli yɛ Moab ŋa lɛ nɔ.

Akpɔi ni awo Israelbii lɛ dani amɛfo Yordan Faa lɛ

⁵⁰ Kɛkɛ ni Yehowa kɛɛ Mose yɛ Moab ŋa kplenee lɛ nɔ yɛ Yordan Faa lɛ sɛɛ yɛ Yeriko ŋlɛnɔ akɛ,

⁵¹ “Kɛɛmɔ Israelbii lɛ akɛ, kɛji nyɛfo Yordan lɛ kɛtee Kanaan shikpɔŋ lɛ nɔ lɛ,

⁵² nyɛshwiea shikpɔŋ lɛ nɔ bii lɛ fɛɛ yɛ nɔ; ni nyɛkpãtãa amɛtɛ shiui lɛ fɛɛ kɛ amɛmãgãi ni ashwie lɛ hu fɛɛ ahiɛ; asaŋ nyɛfitea hei ni amɛjaa amɛwɔji lɛ yɛ lɛ fɛɛ hu.

⁵³ Nyɛŋɔa shikpɔŋ lɛ koni nyɛhia nɔ, ejaakɛ mijɔɔ nɔ mihã nyɛ koni etsɔ̃ nyɛnɔ.

⁵⁴ Nyɛfɔa oshiki koni nyɛkɛja shikpɔŋ lɛ nyɛhã nyɛkutsei lɛ. Akutso ni yi fa lɛ, ena shikpɔŋ agbo; ni akutso ni yi faaa lɛ ena shikpɔŋ fioo. Bɔ ni oshiki lɛ baagbee shi ehã lɛ, nakai naa aja shikpɔŋ lɛ ahã akutso fɛɛ akutso.

⁵⁵ Shi naa, kɛji nyɛshwieee shikpɔŋ lɛ nɔ bii lɛ kɛjeee nyɛteŋ lɛ, no lɛ amɛteŋ mɛi ni nyɛbaashi lɛ baagba nyɛnaa tamɔ aklatii ni miitsulɔ nyɛhiŋmɛiiaŋ kɛ ŋmei yɛ nyɛŋmawuiaŋ; ni amɛbaahao nyɛ yɛ shikpɔŋ ni nyɛyɔɔ nɔ lɛ nɔ.

⁵⁶ Kɛji nyɛshwieee amɛ lɛ, no lɛ bɔ ni mito ni mibakpãtã amɛhiɛ lɛ, nakai nɔŋŋ mibafee nyɛ hu.”