Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

4 Mose 31 - ŊMALƐ KRƆŊKRƆŊ LƐ


Israel kɛ Midian wu ta

1 Yehowa kɛɛ Mose akɛ,

2 “Yaatɔ Israelbii ahe owele yɛ Midianbii lɛ anɔ. Oweletɔɔ lɛ sɛɛ lɛ obaagbo.”

3 No hewɔ lɛ, Mose kɛɛ Israelbii lɛ akɛ, “Nyɛteŋ hii lɛ asaa amɛhe ahã tayaa, koni amɛkɛ Midianbii lɛ ayawu, ejaakɛ Yehowa baatɔ ehe owele yɛ amɛnɔ.

4 Israel akutso fɛɛ akutso ahã tabilɔi akpe koni amɛya ta lɛ.”

5 No hewɔ lɛ, akutso fɛɛ akutso famɔ tabilɔi akpe ehã, ni ana tabilɔi akpei nyɔŋma kɛ enyɔ ni baaya ayawu ta lɛ.

6 Mose wo tabilɔi nɛɛ gbɛ kɛtee ta lɛ; amɛkɛ Osɔfo Eleazar bi Finehas tee; ehiɛ nibii krɔŋkrɔŋi lɛ kɛ tɛtɛrɛmantɛrɛi ni akɛbɔɔ oshe lɛ.

7 Israelbii kɛ Midianbii lɛ wu tamɔ bɔ ni Yehowa efã Mose lɛ, ni amɛgbe Midian hii fɛɛ;

8 amɛgbe Midian majiatsɛmɛi enumɔ ni ji Evi kɛ Rekem kɛ Zur kɛ Hur kɛ Reba fɛɛ yɛ ta lɛ mli. Amɛgbe Balaam, Beor bi lɛ, hu kɛ klante.

9 Israelbii lɛ ŋɔ̃ Midian yei kɛ gbekɛbii lɛ nom, ni amɛha Midianbii atsinai kɛ amɛtoi kɛ amɛhe nibii fɛɛ hu;

10 asaŋ amɛmãmɔ Midianbii lɛ amaji kɛ bui ni amɛmãmɔ ni amɛyɔɔ mli fɛɛ anaa la, ni amɛshã.

11 Kɛkɛ ni amɛkɛ ta lɛ mli nibii ni amɛha lɛ fɛɛ kɛ nomii lɛ kɛ kooloi lɛ fɛɛ ba,

12 ni amɛkɛba Mose kɛ Osɔfo Eleazar kɛ Israelbii asafo lɛ ŋɔ̃ɔ yɛ amɛshitoohe lɛ mli yɛ Moab ŋa kplenee lɛ nɔ yɛ Yordan Faa lɛ sɛɛ yɛ Yeriko ŋlɛnɔ.


Tabilɔi lɛ ku amɛsɛɛ kɛba

13 Mose kɛ Osɔfo Eleazar kɛ maŋbii ahiɛnyiɛlɔi krokomɛi lɛ je kpo yɛ shitoohe lɛ mli, ni amɛyakpee tabilɔi lɛ yɛ shitoohe lɛ sɛɛ.

14 Mose mli fu tabilɔi onukpai lɛ ni jɛ ta lɛ kɛba lɛ, ni ji mɛi akpe ku kɛ mɛi oha ku anɔkwɛlɔi lɛ,

15 ni ekɛɛ amɛ akɛ, “Mɛɛba nyɛhã yei nɛɛ fɛɛ yɔɔ wala mli kɛbashi benɛ?

16 Naa, Mɛnɛɛmɛi nɔŋŋ tsɔ̃ Balaam ŋaawoo nɔ, ni amɛhã Israelbii tɔ̃ Yehowa nɔ, ni amɛkwa lɛ yɛ Peor sane lɛ mli lɛ, ni kɛtsɔ̃ no nɔ ni gbele hela bote Yehowa asafo lɛ mli lɛ.

17 No hewɔ lɛ, nyɛgbea gbekɛbii lɛ ateŋ nuu fɛɛ nuu, ni nyɛgbea yei lɛ ateŋ yoo fɛɛ yoo ni le nuu hu;

18 shi gbekɛbii yei fɛɛ ni leko nuu lɛ nyɛshĩa amɛ nyɛhãa nyɛhe.

19 Agbɛnɛ nyɛ diɛŋtsɛ hu, nyɛteŋ mɔ fɛɛ mɔ ni egbe mɔ ko, aloo eta mɔ ko ni enyɔ gbonyo he lɛ, ehi shitoohe lɛ sɛɛ kɛyashi gbii kpawo. Gbi ni ji etɛ̃ lɛ kɛ nɔ ni ji kpawo lɛ nɔ lɛ, nyɛtsuua nyɛhe, nyɛ kɛ nomii ni nyɛkɛba lɛ fɛɛ.

20 Asaŋ mama fɛɛ mama kɛ nɔ fɛɛ nɔ ni akɛ kooloo he wolo loo abotia he tsɔi loo tso fee lɛ nyɛtsuua he.”

21 Kɛkɛ ni Osɔfo Eleazar kɛɛ tabilɔi lɛ ni tee ta lɛ akɛ, “Mla ni Yehowa wo Mose nɛ:

22 shika kɛ jwiɛtɛi kɛ akɔɔble kɛ dade kɛ sanyaa kɛ sumui,

23 no ji nɔ fɛɛ nɔ ni yaa la mli lɛ, nyɛkɛwoa la mli koni ehe atse; shi no sɛɛ lɛ akɛ hetsuumɔ nu lɛ hu eko atsuu he. Shi nii ni eyaaa la mli lɛ, nyɛkɛ hetsuumɔ nu lɛ kɛkɛ atsuua he.

24 Gbi ni ji kpawo lɛ nɔ lɛ nyɛfɔa nyɛtadei lɛ ahe koni nyɛhe atse; ni no sɛɛ dani nyɛba shitoohe lɛ mli.”


Ta mli nibii ni aha lɛ jaa

25 Yehowa kɛɛ Mose akɛ,

26 “Bo kɛ Osɔfo Eleazar kɛ akutsei lɛ anɔ onukpai lɛ, nyɛkanea ta lɛ mli nomŋɔɔnii fɛɛ ni ana kɛba lɛ, gbɔmɛi lɛ kɛ kooloi lɛ fɛɛ.

27 No sɛɛ lɛ, aja nii lɛ mli enyɔ; akɛ fã kome ahã tabilɔi ni tee ta lɛ, koni akɛ fã kroko lɛ hu ahã maŋbii lɛ.

28 Ahe nibii ni yaa tabilɔi lɛ adɛŋ lɛ anɔ too koni akɛhã Yehowa. Nomii lɛ ni jio, tsinai lɛ ni jio, tejii lɛ ni jio, toi lɛ ni jio, ojie ohai enumɔ fɛɛ ohai enumɔ nɔ ekome,

29 koni okɛhã Osɔfo Eleazar akɛ afɔle ni amɛkɛmiihã.

30 Fã ni yaa Israel maŋbii lɛ adɛŋ lɛ, nomii lɛ ni jio, tsinai lɛ ni jio, tejii lɛ ni jio, toi lɛ ni jio, ojie nyɔŋmai enumɔ fɛɛ nyɔŋmai enumɔ nɔ ekome koni okɛhã Levibii lɛ ni amɛ amɛkwɛɔ Yehowa Kpee Buu Krɔŋkrɔŋ lɛ nɔ lɛ.”

31 Mose kɛ Osɔfo Eleazar fee bɔ ni Yehowa fã Mose lɛ.

32 Ta lɛ mli nii ni tabilɔi lɛ ha lɛ mli nii ni shwɛ ni tabilɔi lɛ kɛba ji gwantɛŋi akpei ohai ekpaa kɛ nyɔŋmai kpawo kɛ enumɔ,

33 kɛ tsinai akpei nyɔŋmai kpawo kɛ enyɔ,

34 kɛ tejii akpei nyɔŋmai ekpaa kɛ ekome,

35 kɛ nomii oblayei ni leko nuu akpei nyɔŋmai etɛ̃ kɛ enyɔ.

36 Nɔ ni tabilɔi ni tee ta lɛ na yɛ nibii nɛɛ amli ji gwantɛŋi akpei ohai etɛ̃ kɛ nyɔŋmai etɛ̃ kɛ kpawo kɛ ohai enumɔ,

37 ni ajie amɛmli gwantɛŋi ohai ekpaa kɛ nyɔŋmai kpawo kɛ enumɔ akɛ too ni atsu akɛhã Yehowa.

38 Tsinai lɛ agbɛfaŋ lɛ nɔ ni amɛna lɛ yibɔ fee akpei nyɔŋmai etɛ̃ kɛ ekpaa, ni ejie amɛmli nyɔŋmai kpawo kɛ enyɔ akɛ too akɛhã Yehowa.

39 Tejii lɛ agbɛfaŋ lɛ nɔ ni amɛna lɛ yibɔ akpei nyɔŋmai etɛ̃ kɛ ohai enumɔ; ni ajie amɛmli nyɔŋmai ekpaa kɛ ekome akɛ too akɛhã Yehowa.

40 Ni oblayei nomii lɛ ayibɔ ni amɛna ji akpei nyɔŋma kɛ ekpaa; ni ajie amɛmli nyɔŋmai etɛ̃ kɛ enyɔ akɛ too akɛhã Yehowa.

41 No hewɔ lɛ, Mose ŋɔ̃ nibii lɛ anɔ toi ni aye nɛɛ ehã Osɔfo Eleazar akɛ afɔle krɛdɛɛ ni ashã akɛhã Yehowa, tamɔ bɔ ni Yehowa fã lɛ, Mose lɛ, akɛ efee lɛ.

42 Ta lɛ mli nii ni Mose he yɛ tabilɔi lɛ adɛŋ ekɛhã koni etsɔ̃ Israelbii lɛ asafo lɛ nɔ lɛ fee

43 toi akpei ohai etɛ̃ kɛ nyɔŋmai etɛ̃ kɛ kpawo kɛ ohai enumɔ;

44 kɛ tsinai akpei nyɔŋmai etɛ̃ kɛ ekpaa,

45 kɛ tejii akpei nyɔŋmai etɛ̃ kɛ ohai enumɔ,

46 kɛ oblayei nomii akpei nyɔŋma kɛ ekpaa.

47 Nii ni ba Israel maŋbii lɛ agbɛfaŋ nɛɛ lɛ, Mose ŋɔ̃ gbɔmɛi lɛ kɛ kooloi lɛ hu amli nyɔŋmai enumɔ fɛɛ nyɔŋmai enumɔ mli ekomekome, ni ekɛhã Levibii lɛ ni tsuɔ Yehowa Kpee Buu Krɔŋkrɔŋ lɛ he nii lɛ tamɔ bɔ ni Yehowa fã lɛ akɛ efee lɛ.

48 Kɛkɛ ni tabilɔi lɛ asafoiatsɛmɛi ni tee ta lɛ ni kwɛɔ mɛi akpekpe kɛ mɛi ohaha akui anɔ lɛ ba Mose ŋɔ̃ɔ,

49 ni amɛbakɛɛ lɛ akɛ, “Ofainɛ, wɔkane tabilɔi ni wɔhiɛ lɛ, ni amɛteŋ mɔ ko kwraa ekaaa ta lɛ mli.

50 No hewɔ lɛ, shika tsuru nibii ni wɔteŋ mɔ fɛɛ mɔ na yɛ ta lɛ mli, shikanii ni ji naneshinii kɛ nineshi gai kɛ niianaasɔomɔnii kɛ toiiaŋnii kɛ kuɛnii, lɛ wɔkɛba wɔkɛbake Yehowa koni akɛkpãtã ahã wɔsusumai yɛ Yehowa hiɛ.”

51 Mose kɛ Osɔfo Eleazar he shika tsuru nibii lɛ fɛɛ yɛ tabilɔi lɛ adɛŋ.

52 Shika nibii lɛ fɛɛ ni asafoiatsɛmɛi lɛ kɛba akɛ keenii lɛ feɔ shekeli akpei nyɔŋma kɛ ekpaa kɛ ohai kpawo kɛ nyɔŋmai enumɔ.

53 Shi tabilɔ fɛɛ tabilɔ ha nii hã lɛ diɛŋtsɛ ehe hu.

54 Mose kɛ Osɔfo Eleazar he shika lɛ yɛ asafoiatsɛmɛi lɛ adɛŋ, ni amɛkɛtee Kpee Buu lɛ mli koni etsɔ̃ kaimɔnɔ ehã Israelbii lɛ yɛ Yehowa hiɛ.

Bible in Ga Language © Bible Society of Ghana, 2020.

Bible Society of Ghana
ကြှနျုပျတို့နောကျလိုကျပါ:



ကြော်ငြာတွေ