4 Mose 30 - ŊMALƐ KRƆŊKRƆŊ LƐ

Shiwoo he mlai

¹ Mose kɛɛ Israelbii akutsei lɛ atsɛmɛi lɛ akɛ, “Mlai ni Yehowa ewo nɛ:

² ‘Kɛji mɔ ko wo Yehowa shi, aloo ekã kitã ekɛtsi lɛ diɛŋtsɛ ehe naa yɛ nɔ ko feemɔ gbɛfaŋ lɛ, ekaku shiwoo lɛ mli kɔkɔɔkɔ. Nɔ ni eje enaa ni ewie lɛ ja ena efee nakai.’

³ ‘Kɛji oblayoo ni eyako gbãlã wo Yehowa shi, aloo ewo shi kɛtsi lɛ diɛŋtsɛ ehe naa yɛ nɔ ko feemɔ gbɛfaŋ, be mli ni eyɔɔ etsɛ we,

⁴ ni etsɛ nu shi ni oblayoo lɛ ewo lɛ, kɛ nɔfeemɔ ni etsiɔ ehe naa yɛ he lɛ he, ni etsɛ lɛ eteee shi eshiii shiwoo lɛ, no lɛ oblayoo lɛ shiwoo lɛ fĩɔ lɛ, ni nɔ ni etsiɔ ehe naa yɛ he lɛ hu ja eye nɔ.

⁵ Shi kɛji gbi nɔ ni oblayoo lɛ tsɛ nu oblayoo lɛ shiwoo lɛ he nɔŋŋ lɛ ekpɛlɛ̃ɛɛ nɔ lɛ, no lɛ ebɛ akɛ oblayoo lɛ aaaye eshiwoo lɛ nɔ; ni Yehowa kɛbaafa lɛ ejaakɛ etsɛ ni ekpɛlɛ̃ɛɛ.’

⁶ ‘Kɛji oblayoo lɛ ewo shi momo dani etee gbãlã, ejwɛŋ he dani ewo shi lɛ jio, esha ehe efee jio, aloo ekã kitã ekɛtsi ehe naa yɛ nɔ ko feemɔ gbɛfaŋ

⁷ ni ewu lɛ nu shiwoi lɛ ahe, shi gbi ni enu he lɛ nɔŋŋ lɛ ekɛɛɛ oblayoo lɛ nɔ ko lɛ, no lɛ esa akɛ oblayoo lɛ aye eshiwoi lɛ anɔ, ni ehe naa ni etsi lɛ hu fĩɔ lɛ.

⁸ Shi kɛji gbi nɔ ni yoo wu lɛ na enu shiwoi lɛ ahe lɛ nɔŋŋ lɛ ekpɛlɛ̃ɛɛ nɔ lɛ, no lɛ efo eshiwoo lɛ kɛ ehe naa ni etsi lɛ fɛɛ mli, ni Yehowa kɛbaafa lɛ.’

⁹ ‘Kɛji yoo okulafo loo yoo ni ekɛ ewu teŋ etse ewo shi aloo ekã kitã ekɛtsi ehe naa yɛ nɔ ko feemɔ gbɛfaŋ lɛ ja eye nɔ.’

¹⁰ ‘Shi kɛji yoo nɛɛ wo shi aloo ekã kitã kɛtsi ehe naa be mli ni eyɔɔ ewu we lɛ,

¹¹ ni ewu lɛ nu he, shi ekɛɛɛ nɔ ko yɛ he, ni ekpɛlɛ̃ nɔ lɛ, ja yoo nɛɛ ye eshiwoo lɛ nɔ; ni nɔ fɛɛ nɔ ni etsi ehe naa yɛ he lɛ hu ja eye nɔ.

¹² Shi kɛji ewu lɛ ekpɛlɛ̃ɛɛ shi ni yoo lɛ wo lɛ nɔ, gbi nɔ ni enu he lɛ nɔŋŋ lɛ, no lɛ yoo lɛ shiwoo lɛ kɛ nɔ fɛɛ nɔ ni yoo lɛ tsi ehe naa yɛ he lɛ egbo, ejaakɛ ewu lɛ etswa efɔ̃, ni Yehowa kɛbaafa yoo lɛ.

¹³ Shi fɛɛ shi ni yoo baawo kɛ kitã fɛɛ kitã ni yoo ekã ni ekɛtsi lɛ diɛŋtsɛ ehe naa lɛ, ewu ji mɔ ni yɔɔ hegbɛ akɛ ekpɛlɛ̃ɔ nɔ ehãa lɛ aloo etswaa efɔ̃ɔ.

¹⁴ Shi kɛji yoo lɛ wu lɛ nu eŋa lɛ shiwoo lɛ he, ni ekɛɛɛ he nɔ ko kwraa kɛyashi jetsɛre nɔ lɛ, no tsɔ̃ɔ akɛ ekpɛlɛ̃ yoo lɛ shiwoo lɛ kɛ nɔ fɛɛ nɔ ni etsi ehe naa yɛ he lɛ nɔ, ni esa akɛ yoo lɛ aye nɔ. Nuu lɛ ekpɛlɛ̃ shiwoo lɛ nɔ ejaakɛ gbi ni enu he lɛ, ekɛɛɛ he nɔ ko.

¹⁵ Shi kɛji ete shi fee sɛɛ eshi akɛ ekpɛlɛ̃ɛɛ nɔ dɔŋŋ lɛ, no lɛ lɛ ji mɔ ni sɔ̃ lɛ baatere.’ ”

¹⁶ Enɛɛmɛi ji shiwoo he mlai ni Yehowa wo kɛtsɔ̃ Mose nɔ yɛ yoo ni etee gbãlã ni eyɔɔ ewu we kɛ yoo ni eyako gbãlã ni yɔɔ etsɛ we he.