4 Mose 25 - ŊMALƐ KRƆŊKRƆŊ LƐ

Israelbii lɛ ashihilɛ yɛ Peor kpokpai anɔ

¹ Be ni Israelbii lɛ yɔɔ Shitim, Akasia tso Jɔɔ lɛŋ lɛ, amɛhii lɛ kɛ Moab yei lɛ bɔ̃i ajwamãŋbɔɔ.

² Moab yei lɛ kpeɔ Israelhii lɛ kɛyaa hei ni amɛshãa afɔlei amɛkɛhãa amɛmaŋ wɔji lɛ yɛ lɛ; ni Israelhii lɛ yayeɔ afɔleshãa niyenii lɛ eko, ni amɛjaa Moabbii lɛ awɔji lɛ hu.

³ Ni Israelbii lɛ kɛ amɛhe yabɔ jemawɔŋ Peor lɛ he. No hewɔ lɛ, Yehowa mli wo la,

⁴ ni ekɛɛ Mose akɛ, “Mɔ̃ɔmɔ maŋ lɛ mli onukpai lɛ fɛɛ koni agbe amɛ shwane ketekete yɛ mi, Yehowa, mihiɛ; bɔ ni afee ni Yehowa mli ni efu Israel fe nine lɛ sɛɛ afo.”

⁵ No hewɔ lɛ, Mose kɛɛ Israel maŋ onukpai lɛ akɛ, “Nyɛteŋ mɔ fɛɛ mɔ agbe lɛ diɛŋtsɛ ekutso lɛ mli nuu fɛɛ nuu ni etsɔ̃ ehe jemawɔŋ Peor jalɔ lɛ.”

⁶ Israelbii lɛ ateŋ nuu ko tee eyakpala Midianyoo ko ni ekɛ lɛ tee ebuu lɛ mli yɛ Mose kɛ Israelbii asafo muu lɛ fɛɛ hiɛ, be mli ni Mose kɛ Israel asafo muu lɛ yeɔ ŋkɔmɔ yɛ Yehowa Kpee Buu lɛ shinaa lɛ naa lɛ.

⁷ Be ni Osɔfo Aaron binuu Eleazar binuu Finehas na nifeemɔ nɛɛ lɛ, ete shi yɛ asafo lɛ mli, ni eyakɔ akplɔ ehiɛ edɛ̃,

⁸ ni etiu Israelnyo lɛ kɛtee buu lɛ mli, ni eyadu Israelnyo lɛ kɛ Midianyoo lɛ fɛɛ akplɔ bɔ ni etsɔ̃ amɛmli kɛyaje kpo. Biɛ tsɔ̃ ni gbele hela lɛ ni miikpãtã Israelbii lɛ ahiɛ lɛ sɛɛ fo.

⁹ Shi nakai be mli lɛ hela lɛ egbe mɛi akpei nyɔŋmai enyɔ kɛ ejwɛ momo.

¹⁰ Kɛkɛ ni Yehowa kɛɛ Mose akɛ,

¹¹ “Mihe awuŋã ni Osɔfo Aaron binuu Eleazar binuu Finehas ye etsɔ̃ɔ Israelbii lɛ, ekɛku mimli ni efu Israelbii lɛ anaa, ni no hewɔ lɛ, mipleneee amɛ dɔŋŋ.

¹² No hewɔ lɛ, kɛɛmɔ Finehas akɛ, ‘Miŋɔ̃ mihejɔlɛ kpãŋmɔ lɛ mihã lɛ kɛmiiya naanɔ,

¹³ ni mijɔɔ osɔfoyeli lɛ nɔ mihã lɛ kɛ eshwiei kɛmiiya naanɔ, ejaakɛ eye awuŋã yɛ mi, mihewɔ, ni ehã akɛ tɔ̃mɔ ni maŋ lɛ tɔ̃ lɛ efa amɛ.’ ”

¹⁴ Israelnyo lɛ ni agbe lɛ kɛ Midianyoo lɛ, egbɛi ji Zimri; ni etsɛ ji Salu, Simeonbii akutso lɛ mli wekui lɛ eko mli onukpa ni.

¹⁵ Ni Midianyoo lɛ ni agbe lɛ gbɛi ji Kozbi; etsɛ gbɛi ji Zur, Midianbii awekui lɛ eko mli onukpa ni.

¹⁶ Yehowa fã Mose akɛ,

¹⁷ “Nyɛfãa ta kɛyatuaa Midianbii lɛ koni nyɛplene amɛ,

¹⁸ ejaakɛ amɛ hu amɛfee nyɛ efɔŋ kɛ lakamɔ ni amɛlaka nyɛ yɛ jemawɔŋ Peor lɛ jamɔ sane lɛ mli, agbɛnɛ amɛlaka nyɛ yɛ amɛnyɛmi yoo Midian onukpa ko biyoo Kozbi sane lɛ mli. Lɛ ji Midianyoo lɛ ni agbe lɛ yɛ gbele hela gbi lɛ nɔ yɛ Peor lɛ.”