4 Mose 21 - ŊMALƐ KRƆŊKRƆŊ LƐ

Israelbii ye Kanaanbii anɔ kunim

¹ Be ni Kanaan shikpɔŋ lɛ wuoyigbɛ shikpɔŋ ni gbɛi ji Arad lɛ nɔ maŋtsɛ lɛ nu akɛ Israelbii lɛ etsɔ̃ Atarim gbɛ kɛmiiba lɛ, efã ta kɛtee eyatua Israelbii lɛ, ni eŋɔ mɛi komɛi nom,

² Kɛkɛ ni Israelbii lɛ wo Yehowa shi, ni amɛkɛɛ lɛ akɛ; “Kɛji ooohã wɔye gbɔmɛi nɛɛ anɔ kunim lɛ, no lɛ wɔbaakpãtã amɛmaji lɛ ahiɛ butubutu.”

³ Yehowa bo Israelbii lɛ atoi, ni ehã amɛye Kanaanbii lɛ anɔ kunim, ni amɛkpãtã Kanaanbii amaji lɛ ahiɛ butubutu, ni amɛwo jɛi gbɛi akɛ Horma (eshishi ji niihiɛkpãtãmɔ.)

Akɔɔble onufu lɛ

⁴ Israelbii lɛ fã kɛjɛ Hor Gɔŋ lɛ he, ni amɛtsɔ̃ Ŋshɔ Tsuru lɛ naagbɛ, he ni atsɛɔ jɛi akɛ Akaba Ble lɛ, bɔ ni afee ni amɛtswa Edom shikpɔŋ lɛ amɛfɔ̃. Nyiɛmɔ lɛ je Israelbii lɛ atsine yɛ gbɛ lɛ nɔ,

⁵ ni amɛwie amɛshi Nyɔŋmɔ kɛ Mose amɛkɛɛ akɛ, “Mɛɛba kwraa po nyɛjie wɔ yɛ Ijipt koni wɔbagboi yɛ ŋa nɛɛ nɔ nɛɛ? Niyenii bɛ lɛ, nu hu bɛ; niyenii gbonyogbonyo nɛɛ yeli eje wɔtsine.”

⁶ Kɛkɛ ni Yehowa hã onufui ni anaa jaraa babote Israelbii lɛ ateŋ, ni amɛkɔ̃mɔ amɛ, ni Israelbii lɛ ateŋ mɛi pii gboi.

⁷ Kɛkɛ ni maŋbii lɛ ba Mose ŋɔɔ, ni amɛbakɛɛ lɛ akɛ, “Wɔfee esha akɛ wɔwie wɔshi Yehowa kɛ bo fɛɛ. Kpa Yehowa fai ohã wɔ koni ejie onufui nɛɛ kɛje wɔteŋ.” Mose kpa fai lɛ ehã Israelbii lɛ.

⁸ Yehowa kɛɛ Mose akɛ, “Okɛ dade ni kpɛlɛɔ afee onufu ni okɛtsotsoro tso bloblo nɔ, ni okɛma shi. Mɔ fɛɛ mɔ ni onufui lɛ eko ekɔ̃ lɛ lɛ, kɛji ewo ehiɛ nɔ ekwɛ onufu lɛ yɛ tso lɛ nɔ lɛ, eyi baana wala.”

⁹ No hewɔ lɛ, Mose kɛ akɔɔble fee onufu, ni ekɛtsotsoro tso bloblo nɔ ni ekɛma shi. Mɔ fɛɛ mɔ ni onufui lɛ eko ekɔ̃ lɛ lɛ, ewoɔ ehiɛ nɔ ekwɛɔ akɔɔble onufu lɛ, ni eyi naa wala.

Israelbii lɛ yashɛ Moabbii ajɔɔ lɛ mli

¹⁰ Israelbii lɛ fã ekoŋŋ, ni amɛyato shi yɛ Obot.

¹¹ Kɛjɛ Obot lɛ amɛyato shi yɛ Abarim maŋ amaŋfɔ̃ ko ni yɔɔ ŋa ni kã Moabbii ashikpɔŋ lɛ bokãgbɛ lɛ nɔ.

¹² Be ni amɛfã ekoŋŋ lɛ, amɛyato shi yɛ Zered Jɔɔ lɛ mli;

¹³ ni kɛjɛ jɛi lɛ, Israelbii lɛ yato shi yɛ Arnon Faa lɛ kooyigbɛ ŋa kplanaa ni kã shi aahu kɛyaboteɔ Amorbii lɛ ashikpɔŋ lɛ mli lɛ nɔ. Arnon Faa nɛɛ ji Moabbii kɛ Amorbii lɛ ahusu.

¹⁴ No hewɔ lɛ, aŋmã yɛ Yehowa Tai Ahe Wolo lɛ mli akɛ, “Wɔtsɔ̃ Waheb yɛ Sufa, kɛ Arnon Faa lɛ jɔi lɛ amli,

¹⁵ kɛ gɔji lɛ hu ni amɛjɔi lɛ yaa kɛyashɛɔ Ar maŋ lɛ shikãmɔhe lɛ anɔ ni ji Moab kpokpai lɛ ahusu lɛ.”

¹⁶ Israelbii lɛ fã kɛjɛ Arnon Faa lɛ kooyigbɛ ni amɛyato shi yɛ he ko ni atsɛɔ jɛi akɛ Nubuianaa, he ni Yehowa kɛɛ Mose yɛ akɛ, “Buamɔ maŋbii lɛ anaa, ni mahã amɛ nu koni amɛnu” lɛ.

¹⁷ Nakai be lɛ mli lɛ Israelbii lɛ la nɛkɛ lala nɛɛ: “Nubu, hã nu atue, ni wɔɔɔbɔ oshe kɛhere lɛ atuu!

¹⁸ Nubu ni lumɛi lɛ tsa, ni maŋ abladei je kɛ amɛtsii kɛ amɛdɛhiɛmɔ tsei lɛ.” Israelbii lɛ shi ŋa lɛ nɔ kɛtee Matana,

¹⁹ ni be ni amɛfã yɛ jɛi hu lɛ amɛtee Nahaliel, ni amɛjɛ Nahaliel kɛtee Bamot.

²⁰ Kɛjɛ Bamot lɛ amɛtee jɔɔ lɛ ni kã Moab ŋa lɛ nɔ lɛ mli yɛ Pisga Gɔŋ lɛ shishi. Kɛjɛ gɔŋ nɛɛ yiteŋ lɛ anaa shiaŋa kplanaa lɛ.

Aye Maŋtsɛ Sihon kɛ Maŋtsɛ Og fɛɛ nɔ kunim

²¹ Kɛkɛ ni Israelbii lɛ tsu bɔfoi kɛtee Amorbii amaŋtsɛ Sihon ŋɔ̃ɔ ayakɛɛ lɛ akɛ,

²² “Ofainɛ, ŋmɛɛ wɔ gbɛ koni wɔtsɔ̃ oshikpɔŋ lɛ nɔ kɛho kɛkɛ. Wɔgbaŋ ŋmɔ ko loo waintrom ko mli lɛ, wɔnuŋ nubui lɛ amli nu lɛ eko hu. Maŋtsɛ tɛmpɔŋ lɛ nɔ kɛkɛ wɔbaanyiɛ tɛ̃ɛ; wɔgbaŋ ninejurɔ loo abɛku kɛyaashi wɔɔɔfo mli yɛ okpokpai lɛ anɔ.”

²³ Shi Maŋtsɛ Sihon ekpɛlɛ̃ɛɛ nɔ akɛ Israelbii lɛ atsɔ̃ eshikpɔŋ lɛ nɔ kɛho. No hewɔ lɛ, ebua etabilɔi anaa, ni efã ta kɛyanina Israelbii lɛ yɛ Yahaz ŋa lɛ nɔ, ni ekɛ amɛ wu.

²⁴ Shi Israelbii lɛ anine tsɔ̃ Amorbii lɛ anɔ, ni amɛgbe amɛ, ni amɛŋɔ Amorbii ashikpɔŋ lɛ kɛjɛ Arnon Faa lɛ naa aahu kɛyashwie Yabok Faa lɛ naa, ni ji Amonbii ashikpɔŋ lɛ naa lɛ, ejaakɛ Amonbii lɛ etswa gbogboi yɛ amɛhusu lɛ naa.

²⁵ Ni Israelbii lɛ shɔ̃ Amorbii amaŋ ni ji Heshbon lɛ kɛ ehe akrowai lɛ fɛɛ, ni amɛhi mli.

²⁶ Heshbon ji Amorbii amaŋtsɛ Sihon lɛ maŋtsɛmaŋ. Sihon kɛ tsutsu Moab maŋtsɛ lɛ wu ni eshɔ̃ eshikpɔŋ lɛ fɛɛ yɛ edɛŋ kɛbashi Arnon Faa lɛ naa.

²⁷ No hewɔ ni alaa akɛɔ akɛ, “Nyɛbaa Heshbon, nyɛhãa atswaa; asaa atswa Maŋtsɛ Sihon maŋ lɛ ama shi.

²⁸ Nyɛsɛɛ ko lɛ, Heshbon maŋ nɛɛ mli Sihon tabilɔi fã kɛjɛ oookɛɛ la. Kɛyakpãtã Moab Ar maŋ lɛ hiɛ kɛ Arnon gɔŋkpɔi lɛ anɔ bii lɛ ahiɛ lɛ.

²⁹ Kpoo hã bo, bo Moab! Nyɛgbe nyɛjeŋ naa, nyɛ Kemosh jalɔi. Ehã ebihii lɛ etsɔ̃mɔ kobɔfoi, ni ebiyei lɛ hu etsɔ̃mɔ Amor Maŋtsɛ Sihon nomii.

³⁰ No hewɔ lɛ, amɛshwiei ahiɛ ekpãtã kɛjɛ Heshbon aahu kɛyashwie Dibon tɔ̃ɔ; kɛjɛ Nashim kɛtee Nofa yɛ Medeba masɛi.”

³¹ Bɔ ni fee ni Israelbii lɛ hi Amorbii lɛ ashikpɔŋ lɛ nɔ lɛ nɛ.

³² Mose tsu mɛi ni amɛtee amɛyasara Yazer maŋ lɛ amɛba; ni fee sɛɛ lɛ Israelbii lɛ yatua maŋ lɛ, ni amɛŋɔ kɛ ehe akrowai lɛ fɛɛ, ni amɛshwie Amorbii ni yɔɔ jɛi momo sa lɛ.

³³ Kɛkɛ ni Israelbii lɛ dɔ amɛyi, ni amɛyi Bashan gbɛ. Bashan maŋtsɛ Og fã ta, lɛ kɛ emaŋ lɛ fɛɛ, koni amɛkɛ Israelbii lɛ abawu yɛ Edrei.

³⁴ Ni Yehowa kɛɛ Mose akɛ, “Kaashe lɛ gbeyei, ejaakɛ mijɔɔ lɛ kɛ emaŋbii lɛ kɛ eshikpɔŋ lɛ fɛɛ nɔ miwo odɛ̃ŋ. Obaaye enɔ kunim, koni ofee lɛ bɔ ni ofee Amorbii amaŋtsɛ Sihon ni ye lumɔ yɛ Heshbon lɛ.”

³⁵ Israelbii lɛ gbe Maŋtsɛ Og kɛ ebihii lɛ kɛ emaŋbii lɛ fɛɛ bɔ ni ashiii gbɔmɔ hiɛkãalɔ kome nɛkɛ; ni amɛŋɔ eshikpɔŋ lɛ, ni amɛhi nɔ.