4 Mose 20 - ŊMALƐ KRƆŊKRƆŊ LƐ

Saji ni ba yɛ Kadesh

¹ Israelbii asafo muu lɛ fɛɛ yashɛ Zin ŋa lɛ nɔ yɛ klɛŋklɛŋ nyɔŋ lɛ nɔ, ni amɛto shi yɛ Kadesh. Biɛ Miriam gbo ni afu lɛ yɛ.

² Nu bɛ shitoohe nɛɛ hã maŋ lɛ, no hewɔ lɛ, maŋbii lɛ bakpe

³ amɛwo Mose kɛ Aaron he. Amɛkɛɛ amɛ akɛ, “Wɔgboi tamɔ wɔnyɛmimɛi lɛ gboi yɛ Yehowa Buu lɛ hiɛ moŋ kulɛ bɛ ehi:

⁴ Mɛɛ hewɔ nyɛkɛ wɔ, Yehowa asafo lɛ, ebaŋa nɛɛ nɔ? Ani jeee koni wɔ kɛ wɔkooloi fɛɛ wɔbagboi yɛ biɛ?

⁵ Ni mɛni hewɔ nyɛkpala wɔ kɛjɛ Ijipt kɛba shikpɔŋ gbonyo tamɔ enɛ nɔ? Shikpɔŋ gbonyo ni ehiii enɔ nidumɔ, ni agbãmi kɛ waintso kɛ akutu ko bɛ enɔ he ko he ko; ni nu ni anuɔ tete po bɛ nɔ?”

⁶ Mose kɛ Aaron je gwabɔɔ lɛ hiɛ, ni amɛtee Kpee Buu lɛ shinaa lɛ shi; ni amɛkɛ amɛhiɛ bumɔ shi; kɛkɛ ni Yehowa anunyam lɛ pue yɛ amɛnɔ.

⁷ Kɛkɛ ni Yehowa kɛɛ Mose akɛ,

⁸ “Kɔ tso lɛ, ni, bo kɛ onyɛmi Aaron, nyɛbuaa asafo lɛ naa, ni okɛ tɛsaa ni yɔɔ jɛi lɛ awie yɛ amɛhiɛ akɛ ehã nu ni yɔɔ emli lɛ atue. Nu baajɛ tɛsaa lɛ mli aba ahã maŋbii lɛ kɛ amɛkooloi lɛ koni amɛnu.”

⁹ Mose kɔ tso lɛ yɛ Yehowa hiɛ tamɔ bɔ ni Yehowa fã lɛ lɛ.

¹⁰ Mose kɛ Aaron bua maŋ lɛ naa yɛ tɛsaa lɛ he, ni ekɛɛ amɛ akɛ, “Nyɛboa toi koo, nyɛ atuatselɔi! Ani wɔhã nu ajɛ tɛsaa nɛɛ mli ahã nyɛ lo?”

¹¹ Kɛkɛ ni Mose wo enine nɔ, ni ekɛ etso lɛ tswa tɛsaa lɛ shii enyɔ, kɛkɛ ni nu tue babaoo, ni maŋbii lɛ kɛ amɛkooloi lɛ na nu amɛnu.

¹² Shi Yehowa kã Mose kɛ Aaron hiɛ, ni ekɛɛ amɛ akɛ, “Akɛni nyɛheee minɔ nyɛyeee koni nyɛhã maŋbii lɛ ana mihewalɛ krɔŋkrɔŋ kpele lɛ, nyɛkɛ asafo nɛɛ eyaŋ shikpɔŋ ni mikɛhãa amɛ lɛ nɔ.”

¹³ Awo nu lɛ gbɛi akɛ Meriba nu lɛ, ejaakɛ Israelbii lɛ kɛ Yehowa taa naa yɛ jɛi, shi Yehowa tsɔ̃ɔ amɛ yɛ jɛi akɛ Mɔ Krɔŋkrɔŋ ji lɛ lɛɛlɛŋ.

Edom Maŋtsɛ eŋmɛɛɛ Israelbii lɛ gbɛ

¹⁴ Ni Mose tsu bɔfoi kɛjɛ Kadesh kɛtee Edom maŋtsɛ lɛ ŋɔɔ ni ayakɛɛ lɛ akɛ, “Bɔ ni onyɛmimɛi Israelbii kɛɛ nɛ: Bo diɛŋtsɛ ole, amanehului fɛɛ ni wɔna:

¹⁵ bɔ ni wɔblema tsɛmɛi lɛ tee Ijipt, kɛ bɔ ni wɔhi shi yɛ Ijipt be kplaŋŋ diɛŋtsɛ, kɛ bɔ ni Ijiptbii fee wɔ kɛ wɔtsɛmɛi lɛ fɛɛ niseniianii aahu.

¹⁶ Wɔfo wɔtsɛ Yehowa, ni ebo wɔ toi, ni etsu bɔfo ni ebajie wɔ kɛje Ijipt. Wɔbashɛ Kadesh amrɔ nɛɛ, ni ji maŋ ni yɔɔ ohusu lɛ naa kpaakpa.

¹⁷ Ofainɛ, ŋmɛɛ wɔ gbɛ koni wɔtsɔ̃ oshikpɔŋ lɛ nɔ kɛho kɛkɛ. Wɔyaŋ ŋmɔji loo wain tromi amli lɛ, wɔnuŋ nubui lɛ amli nu lɛ eko hu. Tɛmpɔŋ wulu lɛ nɔ kɛkɛ wɔbaanyiɛ tɛ̃ɛ; wɔgbaŋ ninejurɔ loo abɛku kɛyaashi wɔɔfo mli yɛ okpokpai lɛ anɔ.”

¹⁸ Shi Edombii lɛ hã hetoo akɛ, “Dabida! Nyɛkabatsɔ̃a wɔshikpɔŋ lɛ nɔ, kɛjeee nakai lɛ wɔbaafã ta wɔwo nyɛ.”

¹⁹ Israelbii lɛ to he akɛ, “Tɛmpɔŋ lɛ nɔ kɛkɛ wɔbaanyiɛ tɛ̃ɛ. Kɛji wɔ kɛ wɔkooloi lɛ aaanu nyɛnu lɛ eko po lɛ, wɔbaawo nyɛ nyɔmɔ. Sane ko bɛ sɛɛ fe akɛ wɔmiitao wɔfo mli kpoo kɛkɛ.”

²⁰ Edombii lɛ kɛɛ ekoŋŋ akɛ, “Wɔkpɛ̃lɛɛɛ!” Ni amɛfã ta kpeteŋkple kɛyasa Israelbii lɛ anaa.

²¹ Akɛni Edombii lɛ eyaŋmɛɛɛ Israelbii lɛ gbɛ koni amɛtsɔ̃ Edom shikpɔŋ lɛ nɔ kɛho hewɔ lɛ, Israelbii lɛ dɔ amɛyi, ni amɛyatsɔ̃ he kroko.

Aaron gbele

²² Israelbii asafo tso muu lɛ fɛɛ fã kɛjɛ Kadesh, ni amɛba Hor Gɔŋ lɛ he,

²³ yɛ Edom shikpɔŋ lɛ husu lɛ naa. Yehowa kɛɛ Mose kɛ Aaron yɛ jɛi akɛ,

²⁴ “Aaron naji enyɔ yiŋ shikpɔŋ lɛ ni mikɛhã Israelbii lɛ nɔ; ebaagbo ejaakɛ nyɛbooo mi toi be ni nyɛyɔɔ Meriba lɛ.

²⁵ Ŋɔ̃ɔ Aaron kɛ ebinuu Eleazar koni okɛ amɛ aya Hor Gɔŋ lɛ nɔ.

²⁶ Jiemɔ osɔfoyeli atadei lɛ yɛ Aaron he yɛ gɔŋ lɛ nɔ koni okɛwo ebinuu Eleazar. Aaron baagbo yɛ jɛi.”

²⁷ Ni Mose fee bɔ ni Yehowa fã lɛ lɛ. Amɛkwɔ Hor Gɔŋ lɛ yɛ maŋbii lɛ fɛɛ ahiɛ,

²⁸ ni Mose jie osɔfoyeli atadei lɛ yɛ Aaron he, ni ekɛwo Aaron binuu Eleazar. Ni Aaron gbo yɛ jɛi yɛ gɔŋ lɛ yiteŋ, ni Mose kɛ Eleazar kpeleke shi kɛjɛ gɔŋ lɛ nɔ.

²⁹ Be ni Israel asafo tso muu lɛ fɛɛ na akɛ Aaron eje jeŋ lɛ, amɛfo Aaron gbii nyɔŋmai etɛ̃.