4 Mose 2 - ŊMALƐ KRƆŊKRƆŊ LƐ

Bɔ ni akutsei lɛ jwereɔ shi yɛ shitoohe lɛ

¹ Yehowa kɛɛ Mose kɛ Aaron akɛ,

² “Kɛji ashɛ shitoohe ko lɛ, Israelbii lɛ ateŋ mɔ fɛɛ mɔ ashi ebuu yɛ esafo shitoohe, yɛ etsɛmɛi awe aflaŋaa lɛ shishi. Amãmɔ bui fɛɛ yɛ Kpee Buu lɛ ŋlɛnɔ kɛbɔle lɛ kpula kɛkpe.

³ “Mɛi fɛɛ ni yɔɔ Yuda aflaŋaa lɛ shishi baashi amɛbui yɛ Kpee Buu lɛ bokãgbɛ yɛ amɛsafoi anaa; ni amɛsafoiatsɛ nukpa ji Nahashon, Aminadab bi lɛ.

⁴ Ta ni yɔɔ eshishi lɛ yikulɛ be ni akane mɛi lɛ fee mɛi akpei nyɔŋmai kpawo kɛ ejwɛ kɛ ohai ekpaa.

⁵ Mɛi ni ashitoohe baatsa Yudabii lɛ anɔ ji Isakarbii lɛ, ni amɛsafoiatsɛ nukpa ji Netanel, Zuar bi lɛ;

⁶ ni eta lɛ yikulɛ be ni akane mɛi lɛ fee mɛi akpei nyɔŋmai enumɔ kɛ ejwɛ kɛ ohai ejwɛ lɛ.

⁷ Kɛkɛ lɛ Zebulon akutso lɛ etsa Isakarbii lɛ hu anɔ, kɛ amɛsafoiatsɛ nukpa Eliab, Helon bi lɛ.

⁸ Eta lɛ yikulɛ be ni akane mɛi lɛ fee mɛi akpei nyɔŋmai enumɔ kɛ kpawo kɛ ohai ejwɛ.

⁹ No hewɔ lɛ, Yuda aflaŋaa lɛ shishi asafo lɛ fɛɛ yikulɛ yɛ amɛsafoi anaa ji mɛi akpei oha kɛ nyɔŋmai kpaanyɔ kɛ ekpaa kɛ ohai ejwɛ. Amɛ esa akɛ amɛnyiɛ akutsei lɛ fɛɛ ahiɛ kɛji afã nyiɛmɔ lɛ.

¹⁰ “Mɛi fɛɛ ni yɔɔ Ruben aflaŋaa lɛ shishi lɛ baashi amɛbui yɛ Kpee Buu lɛ wuoyigbɛ yɛ amɛsafoi anaa. Rubenbii lɛ asafoiatsɛ nukpa ji Elizur, Shedeur bi lɛ,

¹¹ ni eta lɛ yikulɛ be ni akane mɛi lɛ ji mɛi akpei nyɔŋmai ejwɛ kɛ ekpaa kɛ ohai enumɔ.

¹² Mɛi ni ashitoohe baatsa Rubenbii lɛ anɔ ji Simeon akutso lɛ kɛ amɛsafoiatsɛ nukpa Shelumiel, Zurishadai bi lɛ;

¹³ ni eta lɛ yikulɛ be ni akane mɛi lɛ ji mɛi akpei nyɔŋmai enumɔ kɛ nɛɛhu kɛ ohai etɛ̃.

¹⁴ Kɛkɛ lɛ Gad akutso lɛ atsa Simeonbii lɛ hu anɔ. Gadbii lɛ asafoiatsɛ nukpa lɛ ji Eliasaf, Reuel bi lɛ,

¹⁵ ni eta lɛ yikulɛ be ni akane mɛi lɛ ji mɛi akpei nyɔŋmai ejwɛ kɛ enumɔ kɛ ohai ekpaa kɛ nyɔŋmai enumɔ.

¹⁶ No hewɔ lɛ, Ruben aflaŋaa lɛ shishi asafo lɛ fɛɛ yikulɛ yɛ amɛsafoi anaa ji mɛi akpei oha kɛ nyɔŋmai enumɔ kɛ ekome kɛ ohai ejwɛ kɛ nyɔŋmai enumɔ. Amɛ amɛ ji asafo ni ji enyɔ ni baafã kɛji afã nyiɛmɔ.

¹⁷ “Kɛkɛ lɛ Levibii lɛ kɛ Kpee Buu lɛ hu baafã kɛnyiɛ klɛŋklɛŋ asafoi wuji enyɔ lɛ kɛ naagbee asafoi wuji enyɔ lɛ ateŋ. Bɔ ni ato naa abato shi lɛ, nakai nɔŋŋ abaato naa kɛfã nyiɛmɔ, mɔ fɛɛ mɔ anyiɛ egbɛhe yɛ aflaŋaa shishi.

¹⁸ “Mɛi fɛɛ ni yɔɔ Efraim aflaŋaa lɛ shishi lɛ baashi amɛbuui yɛ Kpee Buu lɛ anaigbɛ yɛ amɛsafoi anaa. Efraimbii lɛ asafoiatsɛ nukpa ji Elishama, Amihud bi lɛ;

¹⁹ ni eta lɛ yikulɛ be ni akane mɛi lɛ ji mɛi akpei nyɔŋmai ejwɛ kɛ ohai enumɔ.

²⁰ Manasebii lɛ atsa Efraim akutso lɛ nɔ kɛ amɛsafoiatsɛ nukpa Gamaliel, Pedazur bi lɛ;

²¹ ni eta lɛ yikulɛ be ni akane mɛi lɛ ji mɛi akpei nyɔŋmai etɛ̃ kɛ enyɔ kɛ ohai enyɔ.

²² Kɛkɛ lɛ Benyamin akutso lɛ hu atsa Manase akutso lɛ nɔ. Benyaminbii lɛ asafoiatsɛ nukpa ji Abidan, Gideoni bi lɛ,

²³ ni eta lɛ yikulɛ be ni akane mɛi lɛ ji mɛi akpei nyɔŋmai etɛ̃ kɛ enumɔ kɛ ohai ejwɛ.

²⁴ No hewɔ lɛ, Efraim aflaŋaa lɛ shishi asafo lɛ fɛɛ yikulɛ yɛ amɛsafoi anaa ji mɛi akpei oha kɛ kpaanyɔ kɛ oha. Amɛ, amɛ ji asafo ni ji etɛ̃ ni baafã kɛji afã nyiɛmɔ.

²⁵ “Mɛi fɛɛ ni yɔɔ Dan aflaŋaa lɛ shishi lɛ baashi amɛbuui yɛ Kpee Buu lɛ kooyigbɛ yɛ amɛsafoi lɛ anaa. Danbii lɛ asafoiatsɛ nukpa ji Ahiezer, Amishadai bi lɛ;

²⁶ ni eta lɛ yikulɛ be ni akane mɛi lɛ ji mɛi akpei nyɔŋmai ekpaa kɛ enyɔ kɛ ohai kpawo.

²⁷ Asherbii lɛ atsa Dan akutso lɛ nɔ kɛ amɛsafoiatsɛ nukpa Pagiel, Okran bi lɛ;

²⁸ ni eta lɛ yikulɛ be ni akane mɛi lɛ ji mɛi akpei nyɔŋmai ejwɛ kɛ ekome kɛ ohai enumɔ.

²⁹ Kɛkɛ lɛ Naftali akutso lɛ hu atsa Asherbii lɛ anɔ. Naftalibii lɛ asafoiatsɛ nukpa ji Ahira, Enan bi lɛ.

³⁰ Eta lɛ yikulɛ be ni akane mɛi lɛ ji mɛi akpei nyɔŋmai enumɔ kɛ etɛ̃ kɛ ohai ejwɛ.

³¹ No hewɔ lɛ, Dan aflaŋaa lɛ shishi asafo lɛ fɛɛ yikulɛ yɛ amɛsafoi lɛ anaa ji mɛi akpei oha kɛ nyɔŋmai enumɔ kɛ kpawo kɛ ohai ekpaa.”

³² Israelbii asafo muu lɛ fɛɛ ni akane yɛ amɛtsɛmɛi awei lɛ kɛ amɛsafoi lɛ anaa yɛ amɛshitoohei lɛ amli naa shiɔ mɛi akpei ohai ekpaa kɛ etɛ̃ kɛ ohai enumɔ kɛ nyɔŋmai enumɔ.

³³ Shi akaneee Levibii lɛ ashiii Israelbii krokomɛi lɛ anɔ tamɔ bɔ ni Yehowa fã Mose akɛ efee lɛ.

³⁴ No hewɔ lɛ, Israelbii lɛ fee bɔ pɛpɛɛpɛ ni Yehowa fã Mose akɛ afee lɛ. Kɛji ashɛ shitoohe lɛ, amɛtoɔ shi yɛ amɛflaŋaai lɛ ashishi; ni kɛji amɛfã nyiɛmɔ lɛ, amɛnyiɛɔ yɛ tsɛmɛiawei lɛ anaa.