4 Mose 19 - ŊMALƐ KRƆŊKRƆŊ LƐ

Tsinayoo tsuru lamlu lɛ

¹ Yehowa kɛɛ Mose kɛ Aaron akɛ,

² “Akpɔ ni mi, Yehowa, miwoɔ nɛ: Kɛɛmɔ Israelbii lɛ akɛ amɛbahã bo tsinayoo tsuru ni kpa ko kpa ko bɛ ehe, ni asaŋ akɛ apã woko lɛ, ni akɛ lɛ tsuko nii dã.

³ Akɛ tsina lɛ ahã Osɔfo Eleazar, ni ekɛ kooloo lɛ aje kpo kɛya shitoohe lɛ sɛɛ koni agbe kooloo lɛ yɛ Eleazar hiɛ.

⁴ Osɔfo Eleazar asɔo tsina lɛ lá lɛ eko, ni ekɛ ewao atsɔ lá lɛ mli ni etsɛŋe lá lɛ eshwã Kpee Buu lɛ naagbɛ shii kpawo.

⁵ Ama tsinayoo muu lɛ fɛɛ naa la koni ashã lɛ kɛ ehewolo lɛ kɛ eloo lɛ kɛ elá lɛ kɛ ewamɔ fɛɛ.

⁶ Osɔfo lɛ akɔlɔ tsenedru tso kɛ hisopo tso kɛ kpãa tsuru koni efɔ̃ ewo la ni akɛshãa tsinayoo lɛ mli.

⁷ No sɛɛ lɛ, osɔfo lɛ afɔ etadei ahe, ni eju ehe dani ebote maŋbii lɛ ashitoohe lɛ mli. Shi enɛ fɛɛ sɛɛ lɛ osɔfo lɛ he tseee aahu kɛyashi gbi lɛ gbɛkɛ.

⁸ Mɔ ni shã tsina lɛ hu afɔ etadei ahe, ni eju ehe. Lɛ hu ehe tseee kɛyashi gbi lɛ gbɛkɛ.

⁹ Kɛkɛ lɛ mɔ ko ni he tse aloo tsinayoo lɛ lamlu lɛ, ni ekɛya shitoohe lɛ sɛɛ he ko ni tse koni akɛ lamlu lɛ ayato jɛi. Akɛ lamlu nɛɛ awo nu ni akɛtsuɔ mɔ he akɛdãiɔ esha ni afee yɛ Israel lɛ mli. Enɛ ji hetsuumɔ afɔle.

¹⁰ Lɛ mɔ ni ebaaloo tsinayoo lɛ lamlu lɛ hu, ebaafɔ etadei ahe. Lɛ hu ehe tseee kɛyaashi gbi lɛ gbɛkɛ. Akpɔ nɛɛ baakã shi daa ahã Israelbii kɛ mɛi kpɔ̃ji ni ebato amɛ gbɔ fɛɛ.

Mɔ ni eyata gbonyo he

¹¹ “Mɔ fɛɛ mɔ ni aaata gbonyo ko he lɛ, ebule ehe kɛyaashi gbii kpawo.

¹² Gbɔmɔ nɛɛ aju nu ni akɛtsuɔ mɔ he lɛ eko, yɛ gbi ni ji etɛ̃ kɛ gbi ni ji kpawo lɛ nɔ, ni ehe aaatse. Shi kɛji ejuuu nu lɛ yɛ gbi ni ji etɛ̃ lɛ kɛ nɔ ni ji kpawo lɛ fɛɛ nɔ lɛ, no lɛ etsuuko ehe ni ehe tseŋ.

¹³ Mɔ ni aaata gbonyo ko he ni etsuuu ehe lɛ, eebule Yehowa Kpee Buu Krɔŋkrɔŋ lɛ, ni abuŋ lɛ ashiŋ Israelbii lɛ anɔ, ejaakɛ ejuko nu ni akɛtsuɔ he lɛ ekɛdãiko ehe, ni no hewɔ lɛ, ekã muji lɛ mli lolo.

¹⁴ “Kɛji mɔ ko gbo yɛ buu mli lɛ, ehe mla ni kã shi nɛ: mɔ fɛɛ mɔ ni yɔɔ buu lɛ mli be ni mɔ lɛ nyɔ lɛ, kɛ mɔ fɛɛ mɔ ni aaatee buu lɛ mli lɛ ebule ehe kɛyaashi gbii kpawo;

¹⁵ asaŋ nɔ fɛɛ nɔ ni yɔɔ buu lɛ mli ni abuko naa lɛ abule lɛ.

¹⁶ Mɔ fɛɛ mɔ ni baata mɔ ko ni enyɔ yɛ klante naa gbonyo he, loo mɔ ni egbo lɛ diɛŋtsɛ edɛŋ gbele gbonyo aloo eeeta gbonyo wu loo gbonyobu ko he yɛ jwɛiaŋ lɛ, ebule ehe kɛyashi gbii kpawo.

¹⁷ “Bɔ ni atsɔ̃ atsuu mɔ ni ebule ehe lɛ he nɛ: akpiti tsina tsuru ni ashã lɛ lamlu lɛ eko awo nɔ̃ mli, ni ayɛ faa ni hoɔ mli nu awo lamlu lɛ he.

¹⁸ Mɔ ko ni ehe tse kɛ hisopo atsɔ nu kɛ lamlu lɛ mli koni ekɛshwã buu lɛ kɛ emli nibii fɛɛ kɛ mɛi ni yɔɔ jɛi kɛ mɛi hu ni tee mli lɛ fɛɛ anɔ. Nakai nɔŋŋ akɛ nu nɛɛ ashwã mɔ ni eyata mɔ ni nyɔ yɛ klante naa gbonyo he loo mɔ ni gbo lɛ diɛŋtsɛ edɛŋ gbele gbonyo he loo gbonyowu loo gbonyobu he lɛ nɔ.

¹⁹ Mɔ ni he tse lɛ kɛ nu nɛɛ baashwã mɔ ni he tseee lɛ nɔ yɛ gbi ni ji etɛ̃ lɛ, kɛ nɔ ni ji kpawo lɛ nɔ. Gbi ni ji kpawo lɛ nɔ lɛ ebaatsuu mɔ ni ebule ehe lɛ he; ni gbɔmɔ nɛɛ baafɔ etadei lɛ ahe, ni ebaaju ehe, ni gbi lɛ gbɛkɛ lɛ mɔ ni kulɛ ehe tseee lɛ he aaatse.

²⁰ “Shi mɔ ni ebule ehe, shi etsuuu ehe koni ekɛfɔ ehe muji lɛ, abaashwie lɛ yɛ asafo lɛ mli, ejaakɛ eebule Yehowa He Krɔŋkrɔŋ lɛ. Ejuko nu ni akɛtsuɔ he lɛ, ni no hewɔ lɛ, ekã muji lɛ mli lolo.

²¹ Akpɔ nɛɛ akã shi ahã Israelbii lɛ daa. Mɔ ni kɛ hetsuumɔ nu lɛ shwãa lɛ, lɛ hu efɔ etadei lɛ ahe; ni mɔ ni aaata hetsuumɔ nu lɛ he lɛ, ebule ehe kɛyaashi gbi lɛ gbɛkɛ.

²² Nɔ fɛɛ nɔ ni mɔ ni ebule ehe aaata he lɛ, ebule nɔ lɛ; ni mɔ ni aaata nii ni abule he lɛ, lɛ hu ebule ehe kɛyaashi gbɛkɛ.”