4 Mose 18 - ŊMALƐ KRƆŊKRƆŊ LƐ

Osɔfoi anitsumɔi kɛ Levibii hu anitsumɔi

¹ Yehowa kɛɛ Aaron akɛ, “Bo kɛ obihii kɛ Levibii fɛɛ ji mɛi ayi ni sɔ̃ baatere kɛji abɔ musu yɛ Kpee Buu lɛ gbɛfaŋ; shi yɛ osɔfo nitsumɔi lɛ agbɛfaŋ lɛ bo kɛ obihii lɛ pɛ baatere sɔ̃ kɛji tɔ̃mɔ ko ba.

² Ŋɔɔ onyɛmimɛi, Levibii ni ji otsɛ akutso lɛ mli bii lɛ, ofata ohe koni amɛwa bo be ni bo kɛ obii lɛ tsuɔ osɔfoi anitsumɔi lɛ yɛ Kpee Buu lɛ mli lɛ.

³ Amɛsɔ̃mɔ kɛtsu Kpee Buu lɛ mli nitsumɔi lɛ kɛkɛ yɛ oshishi; shi amɛkabɛŋkɛ He Krɔŋkrɔŋ lɛ mli nibii krɔŋkrɔŋi lɛ loo afɔleshãa latɛ lɛ koni amɛ kɛ nyɛ fɛɛ akagboi.

⁴ Amɛ, amɛfata ohe koni amɛtsu amɛgbɛfaŋ nitsumɔi fɛɛ ni yɔɔ Kpee Buu lɛŋ lɛ: shi moŋ mɔ ko ni jeee Levinyo akabɛŋkɛ nyɛ ni ebatsu jɛi nitsumɔ lɛ eko.

⁵ Bo kɛ obii lɛ pɛ akwɛ He Krɔŋkrɔŋ lɛ kɛ afɔleshãa latɛ lɛ he nitsumɔi lɛ fɛɛ anɔ bɔ ni afee ni mimli akafu Israelbii lɛ dɔŋŋ.

⁶ Ni naa, mijie nyɛnyɛmimɛi Levibii lɛ yɛ Israelbii fɛɛ ateŋ, ni mikɛ amɛ eke nyɛ akɛ mi, Yehowa, minikeenii, koni amɛsɔ̃mɔ yɛ Kpee Buu lɛ mli.

⁷ Shi bo kɛ obihii lɛ pɛ asɔ̃mɔ akɛ osɔfoi yɛ afɔleshãa latɛ lɛ he kɛ muhɔɔ lɛ mligbɛ hu. Miŋɔ osɔfoyeli lɛ mihã nyɛ akɛ sɔɔ̃mɔ ni aŋɔ ke. Mɔ fɛɛ mɔ ni ejeee osɔfo ni eeebɛŋkɛ nibii krɔŋkrɔŋi lɛ, gbe aaagbe lɛ.”

Osɔfoi agbɛnaanii

⁸ Yehowa kɛɛ Aaron akɛ, “Naa, nibii ni Israelbii kɛbahãa mi akɛ afɔle lɛ, amɛmli nibii fɛɛ ni ashãaa lɛ, mijɔɔ nɔ mikɛke bo kɛ obihii osɔfoi lɛ kɛmiiya naanɔ akɛ nyɛgbɛnaanii kɛmiiya naanɔ.

⁹ Afɔlei krɔŋkrɔŋi ni fe fɛɛ lɛ amli nibii fɛɛ ni shwɛɔ yɛ afɔleshãa lɛ sɛɛ lɛ nyɛnɔ ni. Nibii fɛɛ ni akɛbakeɔ mi akɛ afɔle krɔŋkrɔŋ lɛ, niyenii afɔle ni jio, esha he afɔle ni jio, sɔ̃yeli he afɔle ni jio, mijɔɔ nɔ tswaa mikɛke bo kɛ oshwiei.

¹⁰ Nyɛyea nɛkɛ nii nɛɛ yɛ he ko ni yɔɔ krɔŋkrɔŋ. Nuu fɛɛ nuu aaanyɛ aye eko; nyɛbua lɛ akɛ nɔ krɔŋkrɔŋ.

¹¹ “Mikɛ nibii ni Israelbii lɛ kɛbahã mi akɛ shidaa afɔle lɛ hu eke nyɛ, ni ji bo kɛ oshwiei hii kɛ yei fɛɛ, akɛ amɛgbɛnaanii kɛmiiya naanɔ; ni mɔ fɛɛ mɔ ni ehe tse yɛ oshwiei ateŋ lɛ aaanyɛ aye eko.

¹² “Miijɔɔ mu kɛ wain kɛ klɛŋklɛŋ abele ni akuɔ lɛ mli ekpakpa fe fɛɛ ni Israelbii kɛbahãa mi Yehowa nɔ mihã bo.

¹³ Klɛŋklɛŋ aduawai ni amɛtseɔ yɛ amɛŋmɔji amli ni amɛkɛhãa mi Yehowa lɛ, onɔ ni. Mɔ fɛɛ mɔ ni ehe tse yɛ oshwiei ateŋ lɛ aaanyɛ aye eko.

¹⁴ “Nɔ fɛɛ nɔ ni ajɔɔ nɔ akɛke mi yɛ Israel lɛ etsɔ̃ onɔ.

¹⁵ “Nɔ fɛɛ nɔ ni gbeleɔ musu naa ni akɛbahãa Yehowa lɛ, gbɔmɔ ni jio, kooloo ni jio, mijɔɔ enɔ mihã nyɛ. Shi gbɔmɔ kromɔbi lɛ ohã akpɔ̃ lɛ; kooloi ni he tseee lɛ ohã akpɔ̃ amɛ

¹⁶ kɛji amɛye nyɔŋ kome lɛ, jara ni akɛkpɔ̃ amɛ ji jwiɛtɛi shekeli enumɔ yɛ Sɔlemɔ we lɛ jwiɛtɛi jara naa. Shekel kome feɔ gerai nyɔŋmai enyɔ.

¹⁷ Shi tsina loo gwantɛŋ loo abotia kromɔbi lɛ, okahã akpɔ̃ lɛ, ejaakɛ amɛ lɛ amɛhe tse; amɛ okɛshã afɔle okɛhã mi. Okɛ amɛlá lɛ ashwã afɔleshãa latɛ lɛ nɔ, ni oshã amɛmli fɔ lɛ koni efee afɔle ni akɛ la shãa ni jeɔ ŋma woɔ Yehowa.

¹⁸ Amɛloo lɛ nyɛnɔ ni tamɔ bɔ ni kooloi krokomɛi ni akɛshãa afɔle atsitsinaa kɛ ninejurɔ shuɔji lɛ feɔ nyɛnɔ lɛ.

¹⁹ “Nibii fɛɛ ni Israelbii lɛ kɛbahãa mi akɛ afɔle krɛdɛɛ lɛ miijɔɔ fɛɛ nɔ miihã bo kɛ oshwiei hii kɛ yei fɛɛ akɛ amɛgbɛnaanii ni kã shi daa. Kpãŋmɔ ni mi kɛ bo kɛ oshwiei ekpãŋ nɛɛ akuŋ mli kɛmiiya naanɔ.”

²⁰ Yehowa kɛɛ Aaron akɛ, “Onaŋ gboshinii ko yɛ shikpɔŋ lɛ nɔ, ni asaŋ onaŋ shikpɔŋ ni abaaja lɛ eko. Mi, Yehowa, mi ji ogbɛfaŋnɔ kɛ ogboshinii ni he hiaa bo yɛ Israelbii lɛ ateŋ.”

Nɔ ni ahã Levibii lɛ

²¹ “Too fɛɛ too ni ji nii mlijaa nyɔŋma mli ekomekome ni awoɔ yɛ Israel ni akɛbahãa mi lɛ, mijɔɔ nɔ mihã Levibii lɛ akɛ amɛgbɛfaŋ gboshinii yɛ sɔ̃ɔmɔ ni amɛsɔ̃mɔɔ kɛtsuɔ Kpee Buu lɛ he nii lɛ hewɔ.

²² Ni kɛjɛ kɛyaa nɛɛ lɛ Israelbii krokomɛi lɛ akabɛŋkɛ Kpee Buu lɛ dɔŋŋ koni amɛkabaloo musu ni amɛgboi.

²³ Levibii lɛ ji mɛi ni baatsu Kpee Buu lɛ he nii; ni kɛji nɔ ko tɔ̃ yɛ he lɛ sɔ̃yeli lɛ tere amɛ. Akpɔ nɛɛ akã shi daa ahã nyɛ kɛ nyɛshwiei. Levibii lɛ, amɛnaŋ gboshinii ko yɛ Israelbii lɛ ateŋ,

²⁴ ejaakɛ nibii mlijaa nyɔŋma mli ekomekome lɛ ni Israelbii woɔ akɛ too ni amɛkɛbahãa mi Yehowa akɛ afɔle krɛdɛɛ lɛ, mikɛhã Levibii lɛ akɛ amɛgboshinii. Enɛ hewɔ ni mikɛɛ amɛ akɛ amɛnaŋ shikpɔŋ lɛ eko yɛ Israelbii lɛ ateŋ akɛ amɛgbɛfaŋnɔ lɛ.”

Too ni Levibii lɛ baawo

²⁵ Yehowa kɛɛ Mose akɛ,

²⁶ “Kɛɛmɔ Levibii lɛ akɛ, kɛji nyɛnine shɛ nibii mlijaa nyɔŋma mli ekomekome lɛ ni mibi Israelbii koni amɛwo amɛhã nyɛ lɛ nɔ akɛ nyɛgbɛfaŋnɔ lɛ, nyɛ hu nyɛjiea mlijaa nyɔŋma mli ekome nɛɛ mli mlijaa nyɔŋma kome koni nyɛkɛbahãa, mi Yehowa, akɛ afɔle krɛdɛɛ.

²⁷ Ni abaabu nyɛfɔle krɛdɛɛ nɛɛ tamɔ abuɔ okwaafonyo ŋmãa hee kɛ wain hee ni ekɛbashãa afɔle lɛ.

²⁸ Nakai nɔŋŋ nyɛ hu nyɛbashã afɔle nyɛhã Yehowa kɛjɛ nyɛmlijai nyɔŋma mli ekomekome ni nyɛheɔ kɛjɛɔ Israelbii lɛ adɛŋ lɛ mli. Nyɛŋɔa afɔle nɛɛ nyɛhãa Osɔfo Aaron.

²⁹ Nyɛkɛ nibii fɛɛ ni akɛbaahã nyɛ lɛ amli nii kpakpa ni fe fɛɛ lɛ ashãa afɔle krɛdɛɛ lɛ nyɛkɛhãa Yehowa.

³⁰ No hewɔ lɛ, kɛɛmɔ Levibii lɛ akɛ, ‘Kɛji nyɛkɛ nyɛnibii lɛ amli nii kpakpa fe fɛɛ lɛ eshã afɔle lɛ, nyɛŋɔa nibii fɛɛ ni shwɛɔ yɛ sɛɛ lɛ akɛ nyɛnɔ tamɔ okwaafonyo ŋɔɔ eŋmɔshi nii loo wain ni shwɛɔ lɛ akɛ enɔ lɛ.

³¹ Nyɛ kɛ nyɛshwiei ayea nii ni shwɛɔ hãa nyɛ nɛɛ yɛ he fɛɛ he, ejaakɛ nyɛnii ni nyɛtsuɔ yɛ Kpee Buu lɛ mli lɛ he nyɔmɔwoo ni.

³² Nyɛyeee sɔ̃ ko yɛ no hewɔ, kɛji nyɛna nyɛkɛ nii lɛ mli nii kpakpa fe fɛɛ lɛ eshã afɔle momo lɛ. Nyɛkwɛa jogbaŋŋ kɛkɛ koni nyɛkabule nibii krɔŋkrɔŋi ni Israelbii kɛbahãa Yehowa lɛ koni nyɛbagboi.’ ”