4 Mose 17 - ŊMALƐ KRƆŊKRƆŊ LƐ

Aaron dɛhiɛmɔtso lɛ

¹ Yehowa kɛɛ Mose akɛ,

² “Bi Israelbii lɛ koni amɛkutseiatsɛmɛi lɛ abahã bo dɛhiɛmɔtsei nyɔŋma kɛ enyɔ, akutso fɛɛ akutso lɛ dɛhiɛmɔtso kome. Ŋmãa akutso fɛɛ akutso gbɛi yɛ dɛhiɛmɔtso ni ekɛba lɛ he;

³ ni oŋmã Aaron gbɛi yɛ tso ni Levibii kɛba lɛ he. No hewɔ lɛ, akutsotsɛ fɛɛ akutsotsɛ lɛ ebaana dɛhiɛmɔtso kome.

⁴ Kɔlɔmɔ tsei lɛ fɛɛ kɛya Kpee Buu lɛ mli, ni okɛyashwie Kpãŋmɔ Adeka lɛ hiɛ he ni mi kɛ bo kpeɔ yɛ lɛ.

⁵ Gbɔmɛi nɛɛ ateŋ mɔ ni ji mɔ ni miŋɔ lɛ, edɛhiɛmɔtso lɛ baagba afofro; ni mikɛ enɛ baahã huhuuhu ni Israelbii lɛ wieɔ amɛshiɔ nyɛ yɛ mihewɔ lɛ sɛɛ afo.”

⁶ No hewɔ lɛ, Mose bi Israelbii lɛ, kɛkɛ ni amɛkutseiatsɛmɛi lɛ fɛɛ bahã lɛ dɛhiɛmɔtso komekome yɛ amɛkutsei lɛ anaa. Fɛɛ fee dɛhiɛmɔtsei nyɔŋma kɛ enyɔ, ni akɛ Aaron tso lɛ hu fata he.

⁷ Mose kɛ tsei lɛ tee eyashwie Kpãŋmɔ Adeka lɛ hiɛ yɛ Kpee Buu lɛ mli.

⁸ Enɔ jetsɛremɔ be ni Mose tee Kpee Buu lɛ mli lɛ, naa Aaron tso lɛ ni ji Levibii awe lɛ tso lɛ ni efrɔke ni egba afofro, ni ewo yibii hu.

⁹ Mose loo tsei lɛ fɛɛ yɛ Yehowa hiɛ kɛje kpo kɛba Israelbii lɛ aŋɔ̃ɔ, ni ekɛbatsɔ̃ɔ amɛ, ni akutsotsɛ fɛɛ akutsotsɛ kɔ etso.

¹⁰ Kɛkɛ ni Yehowa kɛɛ Mose akɛ, “Kpalemɔ ni okɛ Aaron tso lɛ ayafɔ̃ Kpãŋmɔ Adeka lɛ hiɛ ekoŋŋ koni akɛto okadi ahã toigbolɔi lɛ bɔ ni afee ni huhuuhu ni amɛwieɔ amɛshiɔ mi lɛ sɛɛ afo, koni amɛkagboi.”

¹¹ Mose fee bɔ ni Yehowa kɛɛ lɛ pɛpɛɛpɛ.

¹² Israelbii lɛ kɛɛ Mose akɛ, “Naa, wɔmiiplene, wɔhiɛ miikpãtã! Wɔ bluublu wɔhiɛ miikpãtã.

¹³ Kɛji mɔ fɛɛ mɔ ni bɛŋkɛɔ Yehowa Kpee Buu Krɔŋkrɔŋ lɛ baagbo lɛ, belɛ no lɛ wɔ fɛɛ lɛ, gboimɔ wɔgboi lɛ!”