4 Mose 15 - ŊMALƐ KRƆŊKRƆŊ LƐ

Afɔleshãa he mlai

¹ Yehowa kɛɛ Mose akɛ,

² “Kɛɛmɔ Israelbii lɛ akɛ, ‘Kɛji nyɛyashɛ shikpɔŋ lɛ ni mikɛhãa nyɛ ni nyɛhi nɔ lɛ nɔ lɛ,

³ kɛji nyɛkɛ tsina loo too baashã afɔle nyɛkɛhã mi, Yehowa, lɛ, shãa afɔle ni jio, gbee afɔle ni jio, afɔle ni akɛmiiye shiwoo ko nɔ ni jio, tsuijurɔ naa afɔle ni jio, nyɛgbii juji ni ato lɛ eko nɔ afɔle ni jio, afɔle lɛ ŋma asa mi, Yehowa, mihiɛ.

⁴ Mɔ ni baashã afɔle lɛ ekɛ niyenii hu afata kooloo lɛ he kɛba. Niyenii nɛɛ afee ŋmãa mamu kilo kome ni akɛ mu lita kome efutu mli,

⁵ kɛ wain hu lita kome. Akɛ nibii nɛɛ afata toobi kome ni akɛbaashã shãa afɔle loo gbee afɔle lɛ he.

⁶ Kɛji akɛ ojwɛni baashã afɔle lɛ, akɛ ŋmãa mamu kiloi enyɔ ni akɛ mu lita kome kɛ fã efutu mli afee kooloo lɛ he niyenii afɔle lɛ;

⁷ ni akɛ wain lita kome kɛ fã afata he koni afɔle lɛ ŋma lɛ asa mihiɛ.

⁸ Shi kɛji akɛ tsina oblanyo baashã shãa afɔle loo gbee afɔle akɛ akɛmiiye shiwoo ko nɔ loo akɛ shidaa afɔle akɛhã mi, Yehowa, lɛ,

⁹ no lɛ niyenii afɔle ni akɛfata tsina oblanyo lɛ he lɛ afee ŋmãa mamu kiloi etɛ̃ ni akɛ mu litai enyɔ efutu mli;

¹⁰ ni akɛ wain litai enyɔ hu afata he. Afɔle ni akɛ la shãa hãa mi Yehowa, ni misumɔɔ eŋma ji enɛ.’

¹¹ “Niyenii ni afata tsinanuu fɛɛ tsinanuu, loo ojwɛni fɛɛ ojwɛni, loo gwantɛŋbi fɛɛ gwantɛŋbi loo abotiabi fɛɛ abotiabi he nɛ.

¹² No hewɔ lɛ, kooloi abɔ ni akɛbaashã afɔle lɛ, akɛ eko fɛɛ eko he niyenii afɔle ni ato lɛ afata he yɛ amɛyibɔ lɛ naa.

¹³ Israel fɔmɔbi fɛɛ fɔmɔbi afee enɛ kɛji eba ebaashã niyenii afɔle ni jeɔ ŋma woɔ mi, Yehowa.

¹⁴ Kɛji mɔkpɔŋ ni ebato gbɔ yɛ nyɛteŋ aloo ebadɔmɔ nyɛ kwraa miisumɔ akɛ eshã afɔle ni jeɔ ŋma woɔ mi, Yehowa, bɔ ni nyɛfeɔ lɛ nakai pɛpɛɛpɛ lɛ hu efee.

¹⁵ Gbɛjianɔtoo kome baakã shi ahã shikpɔŋ muu lɛ nɔ gbɔmɛi fɛɛ; ni ekã shi akɛ naanɔ akpɔ ahã nyɛ, Israel fɔmɔbii kɛ mɔkpɔŋ ni ebato nyɛ gbɔ lɛ fɛɛ ashwiei. Israelnyo kɛ mɔkpɔŋ lɛ, amɛ fɛɛ pɛ yɛ Yehowa hiɛ.

¹⁶ No hewɔ lɛ, mla kome kɛ gbɛjianɔtoo kome baahi shi ahã nyɛ Israel fɔmɔbii kɛ gbɔ ni ebato nyɛ lɛ fɛɛ.”

¹⁷ Yehowa kɛ Mose wie akɛ,

¹⁸ “Kɛɛmɔ Israelbii lɛ akɛ kɛji nyɛyashɛ shikpɔŋ ni mikɛ nyɛ yaa nɔ lɛ nɔ lɛ,

¹⁹ shikpɔŋ lɛ nɔ nibaanii ni nyɛaana nyɛye lɛ, nyɛkɛ eko ashãa afɔle nyɛhãa mi, Yehowa.

²⁰ Nyɛkɛ nyɛkpokploku mã lɛ eko ashãa aboloo nyɛhãa mi akɛ nɔwomɔ afɔle. Bɔ ni nyɛshãa ŋmãagbeemɔhe lɛ he afɔle lɛ, nakai nyɛshã enɛ hu.

²¹ Nyɛbaashã kpokploku mã aboloo afɔle nɛɛ nyɛkɛhã Yehowa yɛ nyɛyinɔi fɛɛ mli.

²² “Kɛji nyɛtɔ̃ ni nyɛyeee kitãi nɛɛ ni Yehowa ewo Mose lɛ fɛɛ anɔ,

²³ kitãi fɛɛ ni Yehowa tsɔ̃ Mose nɔ ewo nyɛ, kɛjɛ gbi nɔ ni Yehowa wo nakai mlai lɛ, kɛyashi nyɛyinɔi ayinɔi blublu anɔ lɛ,

²⁴ ni atɔ̃ tɔ̃mɔ ko, yɛ leee ni asafo lɛ leee hewɔ lɛ, no lɛ asafo muu lɛ fɛɛ ahiɛ amɛdɛŋ tsina oblanyo kome koni amɛkɛshã shãa afɔle amɛkɛhã mi, akɛ afɔle ni jeɔ ŋma woɔ mi, Yehowa. Akɛ niyenii kɛ dãa afɔle hu bɔ ni afo akɛ kusum lɛ afata he. Too kpakpo kome hu afata he koni akɛshã esha lɛ hefaikpamɔ afɔle.

²⁵ Osɔfo lɛ akpãtã ahã Israel asafo muu lɛ fɛɛ, ni akɛ tɔ̃mɔ lɛ aaafa amɛ, ejaakɛ amɛhiɛ kãaa he, ni asaŋ, tɔ̃mɔ lɛ hewɔ ni amɛhiɛ amɛdɛŋ shãa afɔle kɛ niyenii afɔle ni akɛhãa Yehowa lɛ.

²⁶ Akɛ tɔ̃mɔ lɛ aaafa Israel asafo muu lɛ fɛɛ kɛ gbɔi ni ebato amɛ lɛ hu ejaakɛ mɔ fɛɛ mɔ shi nɔ ni atɔ̃ lɛ.

²⁷ “Kɛji mɔ ko fee esha ni ehiɛ kãaa he lɛ, no lɛ ekɛ abotiayoo ni eye afi aba koni akɛshã esha lɛ hefaikpamɔ afɔle.

²⁸ Osɔfo lɛ akpãtã yɛ Yehowa hiɛ ehã mɔ ni efee esha lɛ ni akɛaafa lɛ.

²⁹ Mla kome akã shi ahã mɔ fɛɛ mɔ ni jeee kwa ekwa efee esha lɛ, Israel fɔmɔbi ni jio, mɔkpɔŋ ni ebato gbɔ yɛ nyɛteŋ ni jio.

³⁰ “Shi mɔ fɛɛ mɔ ni ehiɛ kã he ni efee nɔ fɔŋ ko lɛ, Israel fɔmɔbi ni jio, gbɔ ni jio, ebɔ musu ejaakɛ ekwɛ Yehowa hiɛ, ni no hewɔ lɛ, nakai mɔ lɛ gbe agbe lɛ;

³¹ ejaakɛ ebuuu Yehowa wiemɔ, ni etɔ̃ ekitã nɔ. Bɔ fɛɛ bɔ ni fee lɛ agbe lɛ koni emusu atere lɛ.”

Nuu ko tɔ̃ hejɔɔmɔ gbi mla nɔ

³² Be ko be mli ni Israelbii lɛ yɔɔ shiaŋa lɛ nɔ lolo lɛ, ayana nuu ko ni etee eelɛ lai yɛ hejɔɔmɔ gbi lɛ nɔ.

³³ Mɛi ni yana nuu lɛ kpala lɛ kɛba Mose kɛ Aaron kɛ maŋ muu lɛ fɛɛ hiɛ.

³⁴ Awo nuu lɛ tsuŋ ejaakɛ nakai be mli lɛ anako nɔ pɔtɛɛ ni sa akɛ afee lɛ.

³⁵ Kɛkɛ ni Yehowa kɛɛ Mose akɛ, “Agbe nuu lɛ. Akɛ lɛ aje kpo kɛya shitoohe lɛ sɛɛ koni maŋ muu lɛ fɛɛ atswia lɛ tɛi ni agbe lɛ.”

³⁶ No hewɔ lɛ, maŋ muu lɛ fɛɛ kpala nuu lɛ kɛtee shitoohe lɛ sɛɛ, ni amɛyatswia lɛ tɛi, ni agbe lɛ tamɔ bɔ ni Yehowa fã Mose akɛ afee lɛ.

Atade naa ahwanya he mlai

³⁷ Yehowa kɛɛ Mose akɛ,

³⁸ “Kɛɛmɔ Israelbii lɛ akɛ amɛfee ahwanyai amɛwo amɛtadei akoji anaa, ni akɛ kpãa bluu amɔ̃mɔ̃ amɛ. Yinɔi fɛɛ anɔ bii afee nakai.

³⁹ Ahwanyai nɛɛ atsɔ̃ kaimɔnii; ni be fɛɛ be ni hiŋmɛi aaagba nɔ lɛ ehã nyɛkai Yehowa kitãi lɛ fɛɛ koni nyɛye nɔ, bɔ ni afee ni nyɛkanyiɛ nyɛtsui kɛ nyɛhiŋmɛi akɔnɔ nibii lɛ asɛɛ, nibii asɛɛ ni nyɛyadiɔ ni nyɛkɛkwaa Yehowa lɛ.

⁴⁰ Ahwanyai lɛ baakai nyɛ mikitãi lɛ koni nyɛye nɔ, koni nyɛtsɔ̃mɔ mɛi krɔŋkrɔŋi nyɛhã mi, nyɛNyɔŋmɔ lɛ.

⁴¹ Mi ji Yehowa, nyɛNyɔŋmɔ lɛ, mɔ ni kpɔ̃ nyɛ kɛje Ijipt shikpɔŋ lɛ nɔ koni matsɔ̃ nyɛNyɔŋmɔ lɛ. Mi ji Yehowa, nyɛ Nyɔŋmɔ lɛ.”