4 Mose 14 - ŊMALƐ KRƆŊKRƆŊ LƐ

Maŋbii lɛ wie huhuuhu

¹ Nakai gbi lɛ Israel asafo muu lɛ bolɔ, ni maŋ lɛ fo nakai nyɔɔŋ lɛ mli fɛɛ,

² ni amɛwie huhuuhu amɛshi Mose kɛ Aaron, ni amɛkɛɛ akɛ, “Wɔgboi moŋ yɛ Ijipt shikpɔŋ lɛ nɔ, loo yɛ shiaŋa lɛ nɔ po kulɛ bɛ ehi?

³ Mɛɛba Yehowa ekpala wɔ kɛba shikpɔŋ nɛɛ nɔ koni wɔbanyɔnyɔi yɛ klante naa koni aŋɔ wɔŋamɛi kɛ wɔbifabii anom nɛɛ? Ani ehiii moŋ akɛ wɔkpale kɛya Ijipt ekoŋŋ?”

⁴ No hewɔ lɛ, amɛkɛɛkɛɛ amɛhe akɛ, “Nyɛhãa wɔwoa wɔteŋ mɔ ko onukpa koni enyiɛ wɔhiɛ, ni wɔku wɔsɛɛ kɛya Ijipt.”

⁵ Kɛkɛ ni Mose kɛ Aaron kɛ amɛhiɛ bumɔ shi yɛ Israelbii asafo ni ebabɔ gwa lɛ fɛɛ hiɛ.

⁶ Kɛkɛ ni Yoshua, Nun bi lɛ, kɛ Kaleb, Yefune bi lɛ, ni ji hii ni atsu ni amɛyasara shikpɔŋ lɛ amɛkwɛ lɛ ateŋ mɛi enyɔ lɛ, gbala amɛtadei;

⁷ ni amɛkɛɛ Israelbii asafo muu lɛ fɛɛ akɛ, “Shikpɔŋ lɛ ni wɔyakpa nɔ wɔsara wɔkwɛ lɛ, shikpɔŋ kpakpa jogbaŋŋ diɛŋtsɛ ni.

⁸ Kɛji Yehowa yɛ wɔhe tsui lɛ, no lɛ ekɛ wɔ aaayashɛ jɛi, ni eeeŋɔ nakai shikpɔŋ ni hi ni baa nii lɛ ehã wɔ.

⁹ Shi moŋ Yehowa hiɛ atua kɛkɛ ni nyɛkatsea; ni asaŋ nyɛkashea shikpɔŋ lɛ nɔ bii lɛ gbeyei, ejaakɛ amɛshɛŋ wɔwaosɛɛkpelɔ tete; amɛkɔlɔ eje amɛnɔ momo; shi wɔ lɛ, Yehowa kɛ wɔ yɛ. No hewɔ lɛ, nyɛkashea gbeyei.”

¹⁰ Asafo lɛ fɛɛ to amɛyiŋ akɛ amɛbaatswia amɛ tɛ pɛ kɛkɛ ni Yehowa anunyam la lɛ pue yɛ Kpee Buu lɛ nɔ yɛ Israelbii lɛ fɛɛ ahiɛ.

Mose sɔle yɛ Maŋbii lɛ ahewɔ

¹¹ Yehowa kɛɛ Mose akɛ, “Mɛɛ beyinɔ nɔŋŋ maŋ nɛɛ aaakwa mi kɛyashi? Mɛni shwɛɔ dɔŋŋ dani amɛaahe minɔ amɛye yɛ nibii fɛɛ ni mifee mikɛto amɛ okadii lɛ asɛɛ?

¹² Mibahã gbele hela ababote amɛteŋ koni mikɛkpãtã amɛhiɛ; shi mahã oshwiei atsɔ̃ maŋ kpeteŋkple ni he wa fe maŋ nɛɛ.”

¹³ Shi Mose kɛɛ Yehowa akɛ, “Kɛji eba lɛ nakai lɛ Ijiptbii lɛ baanu he, ejaakɛ amɛteŋ ojie maŋ nɛɛ kɛjɛ yɛ onineshiwalɛ naa,

¹⁴ ni amɛaagba nɛkɛ shikpɔŋ nɛɛ nɔ bii lɛ. Gbɔmɛi nɛɛ enu momo akɛ, bo Yehowa, okɛ wɔ yɛ, ni anaa bo faŋŋ kɛ faŋŋ kɛji atatu lɛ bashi edamɔ wɔnɔ; ni bo onyiɛɔ wɔhiɛ yɛ atatu kutuu mli.

¹⁵ No hewɔ lɛ, kɛji okpãtã maŋ nɛɛ blublu hiɛ lɛ, majimaji ni enu ogbɛi he lɛ aaakɛɛ akɛ,

¹⁶ ‘Nyɛ ni Yehowa, onyɛɛɛ okɛ omaŋbii lɛ ayashɛ shikpɔŋ lɛ ni owo shi yɛ he akɛ okɛbaahã amɛ lɛ nɔ lɛ, hewɔ ni oyaplenee amɛ yɛ shiaŋa lɛ nɔ lɛ.’

¹⁷ No hewɔ lɛ, Yehowa, ofainɛ, hã wɔna ohewalɛ lɛ, ni ohã shi ni owo lɛ aba mli tamɔ okɛɛ oto lɛ akɛ,

¹⁸ ‘Mi, Yehowa, mimli fuuu mra, ni mimɔbɔnalɛ hu fa; ni mikɛ tɔ̃mɔ kɛ efɔŋfeemɔ faa; shi kɛ̃lɛ mihãaa tɔ̃lɔ aŋɔ ehe aye, ni miwoɔ bii anyɔmɔ yɛ tsɛmɛi atɔ̃mɔi ahewɔ kɛyashiɔ yinɔ ni ji etɛ̃ kɛ yinɔ ni ji ejwɛ tete nɔ.’

¹⁹ No hewɔ lɛ, okɛ maŋ nɛɛ tɔ̃mɔ afa amɛ yɛ osuɔmɔ kpeteŋkple lɛ naa tamɔ bɔ ni okɛfa nɛkɛ maŋ nɛɛ kɛjɛ Ijipt aahu kɛbashi bianɛ lɛ.”

²⁰ Yehowa to he ehã Mose akɛ, “Mikɛfa amɛ bɔ ni obi lɛ.

²¹ Shi moŋ anɔkwale sane kome ji akɛ gbii abɔ ni mihiɛ kã nɛɛ, ni asaŋ mi, Yehowa, minunyam lɛ eyi shikpɔŋ lɛ nɔ obɔ̃ lɛ,

²² mɛi fɛɛ ni na minunyam la kaŋkaŋ lɛ kɛ nibii fɛɛ ni mifee yɛ Ijipt kɛ shiaŋa lɛ nɔ, ni nomɛi fɛɛ asɛɛ lɛ amɛka mi shii nyɔŋma sɔŋŋ, ni amɛbooo miwiemɔ toi lɛ,

²³ amɛteŋ mɔ kome nɛkɛ shɛŋ shikpɔŋ lɛ ni miwo ehe shi mito akɛ mikɛbaahã amɛtsɛmɛi lɛ nɔ. Mɛi fɛɛ ni kwa mi lɛ ateŋ mɔ kome nɛkɛ shɛŋ shikpɔŋ lɛ nɔ.

²⁴ Shi akɛni soro mumɔ ni mitsulɔ Kaleb hiɛ, ni asaŋ eye mi anɔkwa kɛwula shi hewɔ lɛ, lɛ lɛ, mikɛ lɛ baaya ayashɛ shikpɔŋ ni etee ayasara lɛ nɔ, ni jɛi aaatsɔ̃ eshwiei anɔ.

²⁵ Amalekbii lɛ kɛ Kanaanbii lɛ yɛ jɔɔ shikpɔji lɛ anɔ amrɔ nɛɛ, no hewɔ lɛ, wɔ lɛ, nyɛdɔa nyɛyi koni nyɛtsɔ̃a Ŋshɔ Tsuru lɛ he gbɛ lɛ nɔ kɛyajea ŋa lɛ nɔ.”

Yehowa gbala maŋ lɛ toi

²⁶ Yehowa kɛɛ Mose kɛ Aaron akɛ,

²⁷ “Mɛɛ beyinɔ nɔŋŋ nɛkɛ asafo fɔŋ nɛɛ baawie huhuuhu amɛshi mi kɛyashi? Huhuuhu lɛ ni Israelbii lɛ wieɔ shiɔ mi lɛ, minu fɛɛ.

²⁸ No hewɔ lɛ, kɛɛmɔ amɛ akɛ, mi Yehowa, mikɛɛ, ‘Gbii abɔ ni mihiɛ kã nɛɛ, bɔ ni nyɛwie nyɛwo mitoiŋ lɛ, nakai pɛpɛɛpɛ mibafee nyɛ.

²⁹ Nɛkɛ shiaŋa nɛɛ nɔ nɔŋŋ nyɛbaagboi yɛ. Nyɛteŋ mɛi fɛɛ ni eye kɛjɛ afii nyɔŋmai enyɔ kɛyaa, ni wie huhuuhu shi mi lɛ,

³⁰ amɛteŋ mɔ kome nɛkɛ shɛŋ shikpɔŋ lɛ ni miwo shi yɛ he akɛ mikɛbaahã nyɛ koni nyɛhi nɔ lɛ nɔ, akɛ ja Kaleb, Yefune bi lɛ, kɛ Yoshua, Nun bi lɛ.

³¹ Ni nyɛbii bibii lɛ ni nyɛkɛɛ akɛ aaaŋɔ amɛ nom lɛ, mibakpala amɛ kɛyashɛ shikpɔŋ lɛ ni nyɛkpoo lɛ nɔ, ni amɛaale jɛi.

³² Nyɛ lɛ shiaŋa nɛɛ nɔ nyɛbaagboi yɛ.

³³ Nyɛbii lɛ baatsomlo, ni amɛbaana nɔ yɛ shiaŋa nɛɛ nɔ afii nyɔŋmai ejwɛ yɛ kwamɔ ni nyɛkwa mi lɛ hewɔ, kɛyaashi beyinɔ ni nyɛteŋ naagbee mɔ lɛ baagbo.

³⁴ Gbii nyɔŋmai ejwɛ lɛ ni nyɛye nyɛkɛsara shikpɔŋ lɛ, emli gbi kome fɛɛ gbi kome baatsɔ afi ahã nyɛ, ni nyɛbaana nɔ afii nyɔŋmai ejwɛ yɛ nyɛtoigbele lɛ hewɔ koni nyɛkɛna akɛ mikwa nyɛ.

³⁵ Mi, Yehowa, minã miwie; ni anɔkwa, nakai pɛpɛɛpɛ mafee nɛkɛ asafo fɔŋ ni fee ekome wo mi nɛɛ. Nɛkɛ shiaŋa nɛɛ nɔ nyɛaagboi ni nyɛyi aaatã yɛ.’ ”

³⁶ Kɛkɛ ni hii lɛ ni Mose tsu yasara shikpɔŋ lɛ nigii, ni amɛku amɛsɛɛ amɛba ni amɛbatã shikpɔŋ lɛ he sane fɔŋ amɛkɛhã maŋ lɛ wie huhuuhu amɛshi Yehowa lɛ,

³⁷ gbele hela fɔŋ ko bashi amɛnɔ, ni amɛtswia shi amɛgboi yɛ amɛnajiaŋ yɛ Yehowa hiɛ.

³⁸ Ni eshwɛ Yoshua, Nun bi lɛ, kɛ Kaleb, Yefune bi lɛ, pɛ yɛ hii ni tee yasara shikpɔŋ lɛ nigii lɛ ateŋ ni amɛyi na wala.

Israelbii lɛ ka shikpɔŋ lɛ ŋɔ̃ɔ

³⁹ Be ni Mose jaje wiemɔi ni Yehowa kɛ lɛ wie lɛ etsɔ̃ɔ maŋ lɛ, Israelbii lɛ ye ŋkɔmɔ babaoo.

⁴⁰ Enɔ jetsɛremɔ leebi maŋkpa lɛ, Israelbii lɛ kwɔ kɛtee gɔji ashikpɔŋ lɛ nɔ kɛ̃; ni amɛkɛɛ, “Naa wɔ, wɔbaaya he ni Yehowa ewo shi yɛ he lɛ kɛ̃; ejaakɛ wɔfee esha!”

⁴¹ Shi Mose here amɛ nɔ ni ekɛɛ akɛ, “Mɛɛba nyɛtaoɔ akɛ nyɛkuɔ Yehowa wiemɔ nɔ nɛɛ? Nyɛyeŋ omanye.

⁴² Nyɛkayaa, ejaakɛ Yehowa bɛ nyɛteŋ, koni nyɛkayanyɔnyɔi yɛ nyɛhenyɛlɔi lɛ ahiɛ.

⁴³ Amalekbii lɛ kɛ Kanaanbii lɛ yɛ jɛi, ni amɛkɛ nyɛ baakpe, ni amɛbaagbegbee nyɛ, ejaakɛ gbii abɔ ni nyɛkpale yɛ Yehowa sɛɛ lɛ, Yehowa hu fiŋ nyɛsɛɛ.”

⁴⁴ Shi maŋbii lɛ shi amɛtsitsi, ni amɛkã akɛ amɛaakwɔ gɔŋ lɛ kɛya eyiteŋ, tsɛbelɛ Yehowa Kpãŋmɔ Adeka lɛ kɛ Mose fɛɛ shiii shitoohe lɛ mli kɛyaaa.

⁴⁵ Kɛkɛ ni Amalekbii lɛ kɛ Kanaanbii lɛ ni yɔɔ gɔji lɛ anɔ lɛ kpeleke shi, ni amɛbaye Israelbii lɛ anɔ, ni amɛshwie amɛ aahu kɛtee Horma tɔ̃ɔ.