3 Mose 8 - ŊMALƐ KRƆŊKRƆŊ LƐ

Awo Aaron kɛ ebii lɛ osɔfoi

¹ Yehowa kɛɛ Mose akɛ,

² “Ŋɔɔ Aaron kɛ ebihii lɛ ofata ohe, ni oŋɔ atadei lɛ kɛ mɔ mufɔɔ mu lɛ kɛ tsinanuu ni akɛshãa esha afɔle lɛ kɛ too ojwɛnii enyɔ lɛ kɛ mã akpiti kafu lɛ koni okɛ amɛ aba Kpee Buu lɛ naa.

³ Ni obua asafo muu lɛ fɛɛ naa yɛ Kpee Buu lɛ naa.”

⁴ Mose fee bɔ ni Yehowa fã lɛ lɛ, ni ehã asafo lɛ bua amɛhe naa yɛ Kpee Buu lɛ shinaa lɛ naa.

⁵ Mose kɛɛ asafo lɛ akɛ, “Nɔ ni Yehowa fã akɛ mifee lɛ, no mibafee nɛɛ.”

⁶ Mose hã Aaron kɛ ebii lɛ ba hiɛ, ni ekɛ nu ju amɛhe.

⁷ Ekɛ flaka lɛ wo Aaron, ni ekɛ mlifii nɔ lɛ fĩ emliteŋ. Ekɛ atade yuu lɛ wo Aaron. Ekɛ efod lɛ hu wo lɛ, ni ekɛ efod lɛ mlifii nɔ lɛ fĩ efod lɛ ekpɛtɛ lɛ.

⁸ Ekɛ tsitsinɔnii lɛ to nɔ, ni ekɛ Urim kɛ Tumim lɛ wo tsitsinɔnii lɛ kotoku lɛ mli.

⁹ Ekɛ yitsofii nɔ lɛ fĩ Aaron yitso, ni Mose kɛ shika fɛtɛfɛtɛ ni ji hiɛnaanii krɔŋkrɔŋ lɛ ta yitsofii nɔ lɛ hiɛnaa. Amɛfee enɛɛmɛi fɛɛ tamɔ bɔ ni Yehowa fã lɛ.

¹⁰ Agbɛnɛ Mose wo mu ni akɛfɔɔ mɔ mu lɛ. Efɔ Kpee Buu Krɔŋkrɔŋ lɛ kɛ nɔ fɛɛ nɔ ni yɔɔ mli lɛ mu koni efee fɛɛ krɔŋkrɔŋ.

¹¹ Ekɛ mu lɛ eko shwã afɔleshãa latɛ lɛ nɔ shii kpawo ekɛfɔ afɔleshãa latɛ lɛ kɛ nibii ni akɛtsuɔ nii yɛ he lɛ kɛ lalakã lɛ kɛ nɔ ni ema nɔ lɛ mu, koni efee amɛ krɔŋkrɔŋ ehã Yehowa.

¹² Mose fɔse mufɔɔ mu lɛ eko eshwie Aaron yiteŋ, ni ekɛfɔ lɛ mu koni efee lɛ krɔŋkrɔŋ.

¹³ Agbɛnɛ Mose hã Aaron bii lɛ ba hiɛ. Ewo amɛ flakai; ekɛ amɛmlifĩinii lɛ fimɔ amɛmliteŋ, ni ekɛ amɛfaii lɛ bumɔ amɛ, tamɔ bɔ ni Yehowa wo lɛ kitã lɛ.

¹⁴ Kɛkɛ ni Mose kɛ tsinanuu ni akɛshãa esha afɔle lɛ ba. Aaron kɛ ebihii lɛ kɛ amɛniji shwie esha afɔle tsinanuu lɛ yiteŋ.

¹⁵ Mose gbe tsinanuu lɛ. Ekɛ ewao tsɔ lá lɛ eko, ni ekɛkpa afɔleshãa latɛ lɛ koji lɛ ahe kɛkpe, koni ekɛtsuu he. Mose tsi lá ni eshwɛ lɛ eshwie afɔleshãa latɛ lɛ shishi. Efee enɛ ekɛtsuu afɔleshãa latɛ lɛ he, ni ejɔɔ nɔ ehã Yehowa.

¹⁶ Mose jie fɔ lɛ fɛɛ ni yɔɔ mlinii lɛ ahe lɛ kɛ loo ni tsotsoro mlɛbo lɛ he lɛ kɛ sabai enyɔ lɛ kɛ amɛhe fɔ lɛ, ni eshã yɛ afɔleshãa latɛ lɛ nɔ.

¹⁷ Shi tsinanuu lɛ diɛŋtsɛ kɛ hewolo lɛ kɛ eloo lɛ kɛ ewamɔ lɛ Mose kɛtee shitoohe lɛ sɛɛ eyashã, tamɔ bɔ ni Yehowa wo lɛ kitã lɛ.

¹⁸ Agbɛnɛ Mose kɛ too ojwɛni ni akɛshãa shãa afɔle ba. Aaron kɛ ebihii lɛ kɛ amɛniji shwie too ojwɛni lɛ yiteŋ,

¹⁹ ni Mose gbe lɛ. Etsi lá lɛ eshwie afɔleshãa latɛ lɛ he koji ejwɛ lɛ fɛɛ kɛbɔle.

^20-21 Esaa too ojwɛni lɛ, ni ekɛ nu fɔ mlinii lɛ kɛ naji lɛ ahe. Kɛkɛ ni eshã yitso lɛ kɛ fɔ lɛ kɛ too muu lɛ fɛɛ yɛ afɔleshãa latɛ lɛ nɔ, tamɔ bɔ ni Yehowa wo lɛ kitã lɛ. Shãa afɔle nɛɛ niyenii afɔle ni; eŋma lɛ sa Yehowa hiɛ.

²² Agbɛnɛ Mose kɛ too ojwɛni ni ji enyɔ ni agbeɔ akɛ afɔle kɛji aawo osɔfo lɛ ba. Aaron kɛ ebihii lɛ kɛ amɛniji shwie too ojwɛni lɛ yiteŋ,

²³ ni Mose gbe lɛ. Etsɔ lá lɛ eko esa Aaron ninejurɔ toi naa kɛ eninejurɔ gɔnti naa kɛ enanejurɔ gɔnti naa.

²⁴ Mose hã Aaron bihii lɛ hu ba. Etsɔ lá lɛ eko esa amɛninejurɔ toi naa kɛ amɛninejurɔ gɔnti naa kɛ amɛnane gɔnti naa. Kɛkɛ ni efɔse lá ni eshwɛ lɛ eshwie afɔleshãa latɛ lɛ koji ejwɛ lɛ he kɛkpe.

²⁵ Mose ŋɔ fɔ kɛ lei lɛ ni ewo fɔ lɛ kɛ fɔ fɛɛ ni ha mlinii kɛ mlɛbo lɛ ahe lɛ kɛ sabai enyɔ lɛ kɛ amɛhe fɔ lɛ kɛ sɛɛ nanejurɔ lɛ.

²⁶ Kɛkɛ ni ekɔ aboloo kome yɛ mã akpiti kafu ni akɛmaa Yehowa hiɛ lɛ mli, kɛ aboloo kome ni mu yɔɔ mli kɛ akpãanɔɔ kome, ni ekɛshwie fɔ lɛ kɛ shuɔ jurɔ lɛ nɔ.

²⁷ Mose kɛ niyenii nɛɛ fɛɛ wo Aaron kɛ ebihii lɛ adɛŋ; ni efɔ̃ kɛtee kɛba akɛ afɔle ni afɔ̃ɔ yɛ Yehowa hiɛ.

²⁸ Kɛkɛ ni Mose saa he niyenii lɛ yɛ Aaron kɛ ebihii lɛ adɛŋ, ni eshã yɛ afɔleshãa latɛ lɛ nɔ eshi shãa afɔlei ni ashãa fɛɛ emuu lɛ anɔ. Eji osɔfowoo afɔle ni akɛ la shãa ahãa Yehowa, ni ejeɔ ŋma ewoɔ lɛ.

²⁹ Mose kɔ osɔfowoo too ojwɛni lɛ tsitsi lɛ, ni ekɛshã afɔle ehã Yehowa akɛ nɔkee nɔ titri ko. Mose ŋɔ osɔfowoo too ojwɛni tsitsi lɛ akɛ egbɛfaŋnɔ, tamɔ bɔ ni Yehowa wo lɛ kitã lɛ.

³⁰ Mose ŋɔ mu ni akɛfɔɔ mɔ mu lɛ eko kɛ lá ni yɔɔ afɔleshãa latɛ lɛ nɔ lɛ eko, ni ekɛshwã Aaron kɛ etadei lɛ kɛ ebihii lɛ kɛ amɛtadei lɛ fɛɛ nɔ. Ekɛ enɛ fee Aaron kɛ etadei lɛ kɛ Aaron bihii lɛ kɛ amɛtadei lɛ fɛɛ krɔŋkrɔŋ ehã Yehowa.

³¹ Mose kɛɛ Aaron kɛ ebihii lɛ akɛ, “Nyɛkɛ loo lɛ ayaa Kpee Buu lɛ shinaa lɛ naa koni nyɛyahoa. Nyɛyea loo lɛ kɛ aboloo ni yɔ kafu ni akɛ osɔfowoo afɔlei toɔ mli lɛ mli lɛ yɛ jɛi nɔŋŋ. Nyɛyea tamɔ bɔ ni Yehowa wo kitã akɛ, ‘Aaron kɛ ebihii lɛ aye lɛ.’

³² Loo kɛ aboloo ni aaashwɛ yɛ sɛɛ lɛ, nyɛshãa.

³³ Nyɛkajea Kpee Buu lɛ mli kɛyashi gbii kpawo ni akɛfeɔ nyɛ osɔfowoo kusum lɛ aaaho; ejaakɛ gbii kpawo akɛfeɔ osɔfowoo kusum lɛ.

³⁴ Nɔ ni afee ŋmɛnɛ gbi nɛɛ lɛ, Yehowa kɛɛ afee koni akɛjie nyɛhe esha kɛya.

³⁵ Nyɛhia Kpee Buu lɛ shinaa lɛ naa nyɔɔŋnyɔɔŋ kɛ shwaneshwane gbii kpawo koni nyɛkɛfee nɔ ni Yehowa efã akɛ afee lɛ. Kɛji nyɛfeee nakai lɛ, nyɛbaagboi. Nakai ji bɔ ni Yehowa wo mi kitã.”

³⁶ No hewɔ lɛ, Aaron kɛ ebihii lɛ fee nɔ fɛɛ nɔ ni Yehowa wo Mose he kitã lɛ.