3 Mose 7 - ŊMALƐ KRƆŊKRƆŊ LƐ

Sɔ̃ afɔlei

¹ Sɔ̃ afɔle he mla nɛ. Eji afɔle ni he tse krɔŋkrɔŋ fe fɛɛ.

² Kooloo ni akɛbaashã sɔ̃ afɔle lɛ agbe lɛ yɛ he ni agbeɔ kooloo ni akɛshãa shãa afɔle lɛ yɛ lɛ nɔŋŋ. Kooloo lɛ lá lɛ afɔse ashwie afɔleshãa latɛ lɛ koji ejwɛ lɛ fɛɛ he.

³ Ajie efɔ lɛ fɛɛ, elei ni ewo fɔ lɛ, fɔ ni ha emlinii lɛ ahe lɛ kɛ

⁴ sabai enyɔ ni yɔɔ hɛ mli lɛ, kɛ fɔ ni ha amɛhe lɛ kɛ loo ni tsa mlɛbo lɛ kɛ sabai lɛ, koni akɛshã afɔle.

⁵ Osɔfo lɛ ashã fɛɛ yɛ afɔleshãa latɛ lɛ nɔ ahã Yehowa akɛ niyenii afɔle ni akɛ la shãa. Sɔ̃ afɔle ni.

⁶ Nuu fɛɛ nuu ni jɛ osɔfoi ateŋ aye eko; eye yɛ he ni yɔɔ krɔŋkrɔŋ; afɔle ni yɔɔ krɔŋkrɔŋ naakpa ni.

⁷ Esha afɔle lɛ etamɔ sɔ̃ afɔle lɛ; mla kome nɔŋŋ kã shi hã enyɔ lɛ fɛɛ: osɔfo ni shãa afɔle lɛ kɛkpãtãa lɛ, enɔ ji loo lɛ.

⁸ Kooloo ni akɛshãa shãa afɔle lɛ hewolo lɛ, osɔfo ni shãa afɔle lɛ nɔ ni.

⁹ Niyenii afɔle fɛɛ niyenii afɔle ni ashãa yɛ flɔnɔɔ mli aloo nɔ ni ashãa yɛ nishãa nɔ nɔ, loo nɔ ni ashĩɔ yɛ ŋɛsu mli lɛ, osɔfo ni shãa afɔle lɛ hãa Yehowa lɛ nɔ ni.

¹⁰ Shi niyenii afɔle fɛɛ niyenii afɔle lɛ, awo mli mu jio, afee lɛ egbiŋ jio, Aaron shwiei osɔfoi lɛ fɛɛ anɔ ni; aja lɛ pɛpɛɛpɛ, ni mɔ fɛɛ mɔ ana tamɔ bɔ ni enyɛmi na lɛ pɛ.

Naanyobɔɔ afɔlei

¹¹ Bɔ ni sa akɛ ashã naanyobɔɔ afɔlei ahã Yehowa nɛ.

¹² Kɛ afɔle lɛ shidaa afɔle ni lɛ, nibii ni akɛfata he ji keeki ni akɛ mã akpiti ni awo mli mu shã kɛ akpãanɔɔ ni akɛ mã akpiti ni akpa hiɛ mu shã kɛ keeki ni akɛ mã ni mu enumɔ mli shã.

¹³ Kɛshi naanyobɔɔ shidaa afɔlei nɛɛ anɔ lɛ ekɛ keeki ni akɛ mãsha shã hu abashã afɔle.

¹⁴ Nii ni ekɛba lɛ, ejie fɛɛ mli ekomekome ehã, ni akɛfee nɔwomɔ afɔle ahã Yehowa; Osɔfo lɛ ni tsiɔ kooloo lɛ lá lɛ eshwieɔ afɔleshãa latɛ lɛ he lɛ nɔ ni.

¹⁵ Kooloo ni akɛshãa shidaa afɔle lɛ loo lɛ, aye gbi nɔ ni agbe kooloo lɛ nɔŋŋ; akashwɛ eko ni je tsɛre nɔ.

¹⁶ Kɛji afɔle ni mɔ ko kɛba lɛ shiwoo afɔle ni, loo afɔle ni ekɛba yɛ tsuijurɔ naa ni lɛ, no lɛ ebɛ akɛ aye loo lɛ fɛɛ gbi nɔ ni agbe kooloo lɛ nɔŋŋ; shi kɛ loo lɛ eko shwɛ lɛ, aye enɔ jetsɛremɔ.

¹⁷ Shi kɛji loo ni eshwɛ lɛ eko ye gbii etɛ̃ lɛ, ashã.

¹⁸ Kɛji gbi ni ji etɛ̃ lɛ nɔ lɛ mɔ ko ye loo lɛ eko lɛ, Nyɔŋmɔ hereŋ mɔ ni kɛ afɔle lɛ ba lɛ. Enaŋ he nyɔmɔwoo yɛ Nyɔŋmɔ hiɛ. Nihii nii ji loo lɛ, ni mɔ fɛɛ mɔ ni aaaye eko lɛ, eloo musu.

¹⁹ Loo ni nɔ ko ni he tseee aaasa he lɛ, akaye, ashã. Mɔ fɛɛ mɔ ni he tse lɛ aye loo lɛ eko.

²⁰ Shi mɔ ni he tseee ni eeeye naanyobɔɔ afɔle loo ni akɛhãa Yehowa lɛ eko lɛ aaatswa enaneshi tu kɛaaje emɛi ateŋ.

²¹ Asaŋ kɛ mɔ ko aaaye naanyobɔɔ afɔle nɛɛ eko, be mli ni eta nɔ ko ni he tseee he, gbɔmɔ ni he tseee he eta jio, kooloo ni he tseee he eta jio, nɔ kroko ni jio, aaatswa enane shi tu kɛaaje emɛi ateŋ.

²² Yehowa kɛ Mose wie ni ekɛɛ,

²³ “Kɛɛmɔ Israelbii lɛ akɛ, nyɛkayea fɔ ko fɔ ko; tsina fɔ jio, gwantɛŋ fɔ jio, too abotia fɔ jio, nyɛkayea.

²⁴ Kooloo ni egbo lɛ diɛŋtsɛ edɛŋ gbele loo kooloo ni kooloo kroko etserɛ emli lɛ, aaanyɛ akɛ efɔ lɛ afee nɔ kroko; shi loo lɛ akaye. Kooloo ni akɛshã niyenii afɔle ahã Yehowa lɛ, mɔ fɛɛ mɔ ni yeɔ efɔ lɛ eko lɛ aaatswa enane shi tu kɛaaje emɛi ateŋ.

²⁵ Mɔ fɛɛ mɔ ni aaaye kooloo ni akɛshã niyenii afɔle ahã Yehowa lɛ eko lɛ aaatswa enane shi tu kɛaaje emɛi ateŋ.

²⁶ He fɛɛ he ni nyɛyɔɔ lɛ nyɛkayea lá ko lá ko, loofɔlɔ lá jio, kooloo naji ejwɛ tsɛ jio.

²⁷ Mɔ fɛɛ mɔ ni aaaku mla nɛɛ nɔ lɛ, aaatswa enaneshi tu kɛaaje emɛi ateŋ.”

²⁸ Yehowa kɛɛ Mose

²⁹ koni ekɛɛ Israelbii lɛ akɛ kɛ mɔ ko kɛ naanyobɔɔ afɔle miiba abahã Yehowa lɛ, ajie afɔle lɛ mli nɔ ni ji Yehowa nɔ krɛdɛɛ lɛ ahã lɛ.

³⁰ Ehiɛ yɛ lɛ diɛŋtsɛ edɛŋ kɛba akɛ niyenii afɔle. Akɛ kooloo lɛ fɔ lɛ kɛ etsitsi lɛ fɛɛ aba ni ekɛbahã Yehowa akɛ nikeenii titri ko hã Yehowa.

³¹ Osɔfo lɛ ashã fɔ lɛ yɛ afɔleshãa latɛ lɛ nɔ, shi tsitsi lɛ Aaron kɛ ebii osɔfoi lɛ anɔ ni.

³² Kooloo lɛ sɛɛgbɛ nanejurɔ lɛ akɛhã

³³ osɔfo ni shãa naanyobɔɔ afɔle lɛ lá lɛ kɛ fɔ lɛ ehãa Yehowa lɛ. Akɛhã osɔfo lɛ akɛ egbɛfaŋnɔ titri ko.

³⁴ Ejaakɛ kooloo lɛ tsitsi lɛ kɛ sɛɛgbɛ nanejurɔ lɛ mihe yɛ Israelbii lɛ adɛŋ mihã osɔfoi ni ji Aaron kɛ eshwiei lɛ akɛ amɛgbɛnaanɔ ni kã shi hã amɛ daa.

³⁵ Enɛ ji afɔlei ni ashãa ahãa Yehowa lɛ mli nɔ ni akɛhã Aaron kɛ ebii lɛ akɛ amɛgbɛfaŋnɔ gbi nɔ ni awoɔ amɛ osɔfo lɛ.

³⁶ Nakai gbi lɛ Yehowa fã Israelbii lɛ akɛ amɛkɛhã Aaron kɛ ebii lɛ koni efee amɛgbɛfaŋnɔ ni kã shi hã amɛ daa yɛ yinɔi fɛɛ mli.

³⁷ Enɛ ji mla ni kã shi hã shãa afɔlei lɛ kɛ ŋmãa afɔlei lɛ kɛ esha afɔlei kɛ sɔ̃ afɔlei lɛ kɛ osɔfowoo afɔlei lɛ kɛ naanyobɔɔ afɔlei lɛ.

³⁸ Enɛ he Yehowa wo Mose kitã yɛ gbi nɔ ni ewo Israelbii lɛ kitã akɛ amɛkɛ amɛfɔlei lɛ aba abahã Yehowa yɛ Sinai Gɔŋ ni yɔɔ Sinai ŋa lɛ nɔ lɛ.