3 Mose 6 - ŊMALƐ KRƆŊKRƆŊ LƐ

¹ Yehowa kɛ Mose wie ni ekɛɛ,

² “Kɛji mɔ ko fee Nyɔŋmɔ shishi esha yɛ tso ni etso yɛ nɔ ko ni enyɛmi Israelnyo kɛhã lɛ shitoo aloo ekɛto lɛ awaba, aloo eju enyɛmi lɛ nɔ ko, aloo etswa lɛ ojo,

³ aloo ena nɔ ko ni elaaje ni ekã amale kitã akɛ enako lɛ, mɔ fɛɛ mɔ ni aaafee nibii nɛɛ ateŋ eko ni gbɔmɛi fɔɔ feemɔ lɛ, efee esha.

⁴ Kɛ mɔ ko fee esha ni eye sɔ̃ lɛ, eto nɔ ni eju lɛ, loo nii ni ekɛ amimyeli shɔ̃ lɛ, loo nɔ ni akɛto lɛ awaba ni etso akɛ akɛ nɔ ko hãko lɛ, loo nii ni laaje ni eshiu nɔ lɛ,

⁵ loo nɔ ko ni ekã he amale kitã lɛ, najiaŋ.

⁶ Esɔ̃ afɔle ni ekɛbaahã osɔfo lɛ ni akɛhã Yehowa lɛ nɛ: etoi lɛ ateŋ too ojwɛni ni kpa ko bɛ ehe; ejara afee bɔ ni bo oootsɔ̃ɔ.

⁷ Osɔfo lɛ akpãtã ahã lɛ yɛ Yehowa hiɛ, ni akɛ nɔ fɛɛ nɔ ni efee lɛ aaafa lɛ.”

Afɔlei ni ashãa amɛ emuu

⁸ Yehowa kɛ Mose wie ni ekɛɛ,

⁹ “Fã Aaron kɛ ebii lɛ akɛ shãa afɔle he mla nɛ. Shãa afɔle lɛ ahi afɔleshãa latɛ lɛ nɔ nyɔɔŋnyɔɔŋ fɛɛ, ni la ahi shishi kɛyashi leebi.

¹⁰ Osɔfo lɛ awo eklala flaka kɛ eklala tswakotoi lɛ koni eloo lamlu lɛ; shi la lɛ ni akɛshã shãa afɔle lɛ, eshi yɛ afɔleshãa latɛ lɛ nɔ, ni ekɛshwie afɔleshãa latɛ lɛ masɛi he ko.

¹¹ Kɛkɛ lɛ osɔfo lɛ ajie etadei lɛ koni ewo ekroko. Ekɛ lamlu lɛ aje kpo kɛya nsra lɛ sɛɛ ni ekɛyashwie he ko ni tse.

¹² La lɛ ni yɔɔ afɔleshãa latɛ lɛ nɔ lɛ akã he atso daa; akahã egbo gbi ko gbi ko. Daa leebi lɛ osɔfo lɛ kɛ lai ashwie afɔleshãa latɛ lɛ nɔ. Eto shãa afɔle lɛ gbɛjianɔ eshwie nɔ ni eshã toiŋjɔlɛ afɔlei ahe fɔi lɛ yɛ nɔ.

¹³ La atso daa yɛ afɔleshãa latɛ lɛ nɔ; akahã egbo gbi ko gbi ko.”

Ŋmãa afɔlei

¹⁴ Ŋmãa afɔle lɛ he mla nɛ: “Aaron bihii osɔfoi lɛ kɛ ŋmãa afɔle lɛ aba abahã Yehowa yɛ afɔleshãa latɛ lɛ hiɛ.

¹⁵ Kɛkɛ lɛ amɛteŋ mɔ kome aŋɔ mã lɛ kɛ emli mu lɛ kɛ ohɛ ni yɔɔ ŋmãa afɔle lɛ nɔ lɛ ekɔkɔ kome ni eshã yɛ afɔleshãa latɛ lɛ nɔ. Eji okadi kɛkɛ ni tsɔ̃ɔ akɛ akɛ ŋmãa afɔle lɛ fɛɛ ehã Yehowa. Afɔle nɛɛ ŋma lɛ sa Yehowa hiɛ.

¹⁶ Afɔle lɛ nɔ ni shwɛɔ lɛ Aaron kɛ ebihii lɛ aye. Afee lɛ mã akpiti keeki, ni aye yɛ he ni tse krɔŋkrɔŋ, no ji yɛ Yehowa Kpee Buu lɛ kpo lɛ nɔ.

¹⁷ Aboloo akpiti nɛɛ ji osɔfoi lɛ agbɛfaŋnɔ ni mihã amɛ yɛ ŋmãa afɔlei ni ashãa ahãa mi lɛ mli. Nɔ krɔŋkrɔŋ naakpa ni, tamɔ esha afɔle kɛ sɔ̃ afɔle lɛ.

¹⁸ Bei fɛɛ, yɛ yinɔi fɛɛ ni baaba lɛ mli lɛ, nuu fɛɛ nuu ni jɛ Aaron shwiei lɛ ateŋ lɛ aye akɛ egbɛfaŋnɔ yɛ ŋmãa afɔlei ni ashãa ahãa Yehowa lɛ mli. Mɔ fɛɛ mɔ ni taa he lɛ aaatsɔ̃ krɔŋkrɔŋ.”

¹⁹ Yehowa kɛ Mose wie ni ekɛɛ,

²⁰ “Gbi nɔ ni afɔɔ Aaron loo eshwie ko mu akɛ osɔfo lɛ, ekɛ ŋmãa mamu kilo kome aba abahã Yehowa tamɔ daa ŋmãa afɔle lɛ nɔŋŋ. Akɛ fã aba leebi, ni akɛfã hu aba gbɛkɛ.

²¹ Akɛ mu ashi yɛ ŋɛsu mli. Kɛ ebe lɛ, akumɔ mli dukuduku ni akɛba akɛ ŋmãa afɔle ni eŋma sa Yehowa hiɛ.

²² Aaron bihii lɛ ateŋ mɔ ni afɔ lɛ mu ni baaye esɛɛ akɛ osɔfonukpa lɛ afee enɛ ahã Yehowa akɛ akpɔ ni kã shi kɛmiiya naanɔ. Ashã afɔle muu lɛ fɛɛ.

²³ Ŋmãa afɔle ni osɔfo lɛ shãa lɛ akaye eko; ashã emuu lɛ fɛɛ.”

Esha afɔlei

²⁴ Yehowa fã Mose

²⁵ koni ekɛɛ Aaron kɛ ebii lɛ bɔ ni ashã esha afɔlei lɛ ahã. He ni agbeɔ kooloi ni akɛshãa shãa afɔlei lɛ yɛ lɛ, jɛi nɔŋŋ agbe kooloo ni akɛshãa esha afɔle lɛ yɛ ahã Yehowa. Eji afɔle ni yɔɔ krɔŋkrɔŋ naakpa.

²⁶ Osɔfo ni gbeɔ kooloo lɛ kɛshãa esha afɔle lɛ aye loo lɛ. Eye yɛ he ni tse krɔŋkrɔŋ; no ji yɛ Yehowa Kpee Buu lɛ kpo lɛ nɔ.

²⁷ Mɔ fɛɛ mɔ loo nɔ fɛɛ nɔ ni taa loo lɛ he lɛ aaatsɔ̃ krɔŋkrɔŋ. Kɛ kooloo lɛ lá lɛ eko tsɛ̃ŋe shwie atade he lɛ, afɔ atade loo nɔ lɛ ni lá lɛ tsɛ̃ŋe shwie he lɛ he yɛ he ni tse krɔŋkrɔŋ.

²⁸ Sũ gbɛ ni ahoo loo lɛ eko yɛ mli lɛ, ajwara; shi kɛ akɔɔble loo dadesɛŋ mli ahoo yɛ lɛ, asha mli ni akɛ nu ajale mli.

²⁹ Nuu fɛɛ nuu ni jɛ osɔfoi ateŋ aye loo lɛ eko; eji nɔ ko ni he tse krɔŋkrɔŋ naakpa.

³⁰ Shi esha afɔle fɛɛ esha afɔle ni akɛ kooloo lɛ lá lɛ eko aaaba Kpe Buu lɛ mli ni akɛaakpãtã yɛ he krɔŋkrɔŋ lɛ yɛ esha ko hewɔ lɛ, akaye; ashã kɛ la.