3 Mose 5 - ŊMALƐ KRƆŊKRƆŊ LƐ

Saji amli ni esha afɔle he ehia yɛ

¹ Kɛji atsɛ mɔ ko odase yɛ sane ko he, ni emua enaa, ni ewieee, tsɛbelɛ ena aloo ele sane lɛ he nɔ ko lɛ, no lɛ efee esha, ni eye sɔ̃.

² Kɛji mɔ ko ta nɔ ko ni he tseee he, ŋa mli kooloo ni he tseee ko gbonyo ni jio, shĩa kooloo ni he tseee ko gbonyo ni jio, kooloo ni wamɔɔ ni he tseee ko gbonyo ni jio, kɛ ehiɛ kãaa he ni eta he tete lɛ, akɛni ebule ehe hewɔ lɛ, eye sɔ̃.

³ Aloo kɛji eta nɔ ko ni he tseee yɛ nɔ fɛɛ nɔ kɛkɛ ni he tseee ni buleɔ gbɔmɔ he, ni eleee, shi kɛ fee sɛɛ ni ebale lɛ, eye sɔ̃.

⁴ Kɛji mɔ ko eyakwɛɛɛ jogbaŋŋ ni ekã kitã akɛ eeefee efɔŋ loo ekpakpa ko tamɔ bɔ ni mɛi kãa kitã ni amɛjwɛŋŋ he lɛ, kɛ fee sɛɛ ni ebale lɛ, nɔ fɛɛ nɔ ni ji lɛ eyeɔ sɔ̃ yɛ mli.

⁵ Kɛji mɔ ko ye sɔ̃ yɛ nii nɛɛ eko he lɛ, no lɛ ejaje esha ni efee lɛ

⁶ ni ekɛ esɔ̃ afɔle abahã Yehowa yɛ esha ni efee lɛ hewɔ. Ekɛ gwantɛŋ loo too abotia yoo aba, koni osɔfo lɛ akpãtã ahã lɛ yɛ esha ni efee lɛ hewɔ.

⁷ Shi kɛji enyɛɛɛ too ehe lɛ, no lɛ ekɛ kosɛɛ okpoi enyɔ loo okpobii enyɔ aba ebahã Yehowa akɛ sɔ̃ afɔle yɛ esha ni efee lɛ hewɔ; okpo kome akɛ esha afɔle kɛ ekome hu akɛ shãa afɔle.

⁸ Ekɛ afɔlei enyɔ lɛ aba osɔfo lɛ ŋɔɔ. Ekɛ nɔ ni ji esha afɔle lɛ aba tsutsu. Etsɔ̃mɔ loofɔlɔ lɛ yitso yɛ ekuɛ nɔ, shi ekatse kɛje nɔ.

⁹ Etsɔ esha afɔle lɛ lá lɛ eko eshwã afɔleshãa latɛ lɛ he. Lá ni baashwɛ lɛ etsi eshwie afɔleshãa latɛ lɛ shishi. Afɔle ni akɛjieɔ esha kɛyaa ji no.

¹⁰ Loofɔlɔ ni ji enyɔ lɛ ekɛfee shãa afɔle yɛ gbɛnaa ni ato lɛ naa; koni osɔfo lɛ akpãtã ahã lɛ yɛ esha ni efee lɛ hewɔ koni akɛfa lɛ.

¹¹ Shi kɛji enyɛɛɛ kosɛɛ okpoi enyɔ loo okpobii enyɔ ehã lɛ, no lɛ ekɛ mã kilo kome aba akɛ esha afɔle yɛ esha ni efee lɛ hewɔ. Ekɛ mu akawo mli, ni ekɛ ohɛ hu akafɔ̃ nɔ, ejaakɛ esha afɔle ni.

¹² Ekɛba osɔfo lɛ ŋɔɔ. Osɔfo lɛ atĩ ekɔkɔ obɔ̃ ekɛfee afɔle lɛ mli eko ni akɛkaiɔ Yehowa yɛ afɔle muu lɛ fɛɛ he, koni eshã yɛ afɔleshãa latɛ ni ashãa ŋmãa afɔlei yɛ nɔ ahãa Yehowa lɛ nɔ. Esha afɔle ni.

¹³ Osɔfo lɛ afee nɛkɛ koni ekɛkpãtã ehã mɔ ni efee esha lɛ, ni akɛ esha ni efee yɛ enɛɛmɛi eko gbɛfaŋ lɛ aaafa lɛ. Afɔle lɛ nɔ ni eshwɛ lɛ, osɔfo lɛ nɔ ni, tamɔ bɔ ni eyɔɔ yɛ ŋmãa afɔle gbɛfaŋ lɛ.

Afɔlei ni akɛtoɔ mlai krɔŋkrɔŋi lɛ anajiaŋ

¹⁴ Yehowa kɛ Mose wie ni ekɛɛ lɛ akɛ,

¹⁵ “Kɛji oniai krɔŋkrɔŋi ni atsuɔ ahãa Yehowa lɛ mɔ ko hãaa egbɛfaŋnɔ, ni no ehã eye sɔ̃ ni eleee lɛ, no lɛ esɔ̃ afɔle ni ekɛbaahã Yehowa nɛ: etoi lɛ ateŋ too ojwɛni ni he bɛ kpa ko. Too lɛ jara adamɔ he krɔŋkrɔŋ lɛ shika jara nɔ, ni akɛfee sɔ̃ afɔle.

¹⁶ Mɔ ni efee esha yɛ onia krɔŋkrɔŋ ko gbɛfaŋ lɛ ato onia ni ehãaa lɛ najiaŋ, ni ekɛ mlijaa enumɔ mli ekome afata he. Ekɛhã osɔfo lɛ. Osɔfo lɛ kɛ too ojwɛni lɛ akpãtã akɛ sɔ̃ afɔle ahã lɛ, koni akɛ esha ni efee lɛ afa lɛ.

¹⁷ “Kɛji mɔ ko fee esha, ni efee nii ni Yehowa ewo he kitã akɛ akafee lɛ eko, tsɛbelɛ ehiɛ kãaa he moŋ nɛ, shi eye sɔ̃, ni aaagbala etoii.

¹⁸ Emɔ too ojwɛni ni kpa ko bɛ ehe yɛ etoi lɛ ateŋ. Abu naa, ni ejara afee sɔ̃ afɔle jara, koni ekɛbahã osɔfo lɛ. Osɔfo lɛ akpãtã ahã lɛ yɛ esha ni efee ni eleee lɛ hewɔ, ni akɛbaafa lɛ.

¹⁹ Sɔ̃ afɔle ji enɛ; ejaakɛ eye sɔ̃ yɛ Yehowa hiɛ.”