3 Mose 4 - ŊMALƐ KRƆŊKRƆŊ LƐ

Eshai ni hiɛ kãaa he ni afee he afɔlei

¹ Yehowa kɛɛ Mose akɛ

² ekɛɛ Israelbii lɛ akɛ kɛji mɔ ko tɔ̃ akpɔi kɛ kitãi ni Yehowa ewo lɛ eko nɔ, ni efee nɔ ni ekɛɛ akɛ akafee lɛ eko be mli ni mɔ lɛ hiɛ kãaa he lɛ, nɔ ni afee nɛ:

³ Kɛji Osɔfonukpa lɛ ni tɔ̃ lɛ, ni no ehã maŋ muu lɛ fɛɛ etɔ̃ lɛ, ekɛ tsina oblanyo ni kpa ko bɛ ehe abashã ehe esha lɛ he afɔle ehã Yehowa.

⁴ Ekɛ tsinanuu lɛ aba Kpee Buu lɛ shinaa lɛ naa yɛ Yehowa hiɛ; ekɛ enine afɔ̃ tsinanuu lɛ yiteŋ ni egbe lɛ.

⁵ Kɛkɛ lɛ Osɔfonukpa lɛ aŋɔ tsinanuu lɛ lá lɛ eko kɛbote Kpee Buu lɛ mli,

⁶ ni ekɛ ewao atsɔ lá lɛ mli, koni ekɛ la lɛ eko ashwã shii kpawo yɛ Muhɔɔ Krɔŋkrɔŋ lɛ hiɛ yɛ Yehowa hiɛ.

⁷ Osɔfonukpa lɛ kɛ lá lɛ eko adiki tsofakɛŋmashãa latɛ ni yɔɔ Yehowa hiɛ yɛ Kpee Buu lɛ mli lɛ koji lɛ ahe. Enɛ sɛɛ lɛ etsi tsinanuu lɛ lá ni eshwɛ lɛ fɛɛ eshwie afɔleshãa latɛ ni yɔɔ Kpee Buu lɛ shinaa lɛ naa lɛ shishi.

⁸ Osɔfonukpa lɛ ajie fɔ fɛɛ ni yɔɔ esha afɔle tsinanuu lɛ mli, ni ji fɔ ni ha mlinii lɛ he lɛ;

⁹ ejie esabai enyɔ lɛ kɛ fɔ hu ni ha amɛhe lɛ, kɛ loo ni tsa mlɛbo lɛ he lɛ ekɛfata sabai lɛ ahe,

¹⁰ tamɔ ajieɔ nibii nɛɛ yɛ toiŋjɔlɛ afɔleshãa tsinanuu lɛ loo lɛ he lɛ, koni eshã fɛɛ yɛ shãa afɔle afɔleshãa latɛ lɛ nɔ.

¹¹ Shi tsinanuu lɛ hewolo lɛ kɛ eloo lɛ fɛɛ: eyitso kɛ enaji lɛ kɛ emlinii lɛ kɛ ewamɔ lɛ,

¹² Osɔfonukpa lɛ awo tsinanuu muu lɛ fɛɛ kɛje kpo kɛya he ko ni tse yɛ shitoohe lɛ sɛɛ, he ni atsiɔ lamlu ashwieɔ lɛ he ko, koni eyashã yɛ lai nɔ yɛ jɛi. He ni atsiɔ lamlu ashwieɔ lɛ, jɛi ashã afɔle nɛɛ yɛ.

¹³ Kɛji Israel asafo muu lɛ fɛɛ ni tɔ̃ Yehowa kitãi lɛ eko nɔ, ni amɛfee nɔ ni ekɛɛ akɛ akafee lɛ eko, be mli ni amɛhiɛ kãaa he, ni asaŋ amɛkɔɔɔ tɔ̃mɔ ni amɛtɔ̃ lɛ sɛɛ hu, ni no hewɔ lɛ, maŋ lɛ eye sɔ̃ lɛ,

¹⁴ kɛji ana ale esha tɔ̃mɔ ni atɔ̃ lɛ, maŋ muu lɛ kɛ tsina oblanyo ashã esha afɔle. Akɛ tsina oblanyo lɛ aba Kpee Buu lɛ hiɛ.

¹⁵ Maŋ onukpai lɛ kɛ amɛniji ashwie tsina lɛ yiteŋ yɛ Yehowa hiɛ, ni agbe tsina lɛ yɛ Yehowa hiɛ.

¹⁶ Osɔfonukpa lɛ aŋɔ tsinanuu lɛ lá lɛ eko kɛbote Kpee Buu lɛ mli,

¹⁷ ni ekɛ ewao atsɔ lá lɛ mli, ni ekɛ lá lɛ eko ashwã shii kpawo yɛ Muhɔɔ Krɔŋkrɔŋ lɛ hiɛ yɛ Yehowa hiɛ.

¹⁸ Ekɛ lá lɛ eko adiki tsofakɛŋma afɔleshãa latɛ ni yɔɔ Yehowa hiɛ, yɛ Kpee Buu lɛ mli, lɛ koji lɛ ahe. Enɛ sɛɛ lɛ etsi tsinanuu lɛ lá ni eshwɛ lɛ fɛɛ eshwie shãa afɔleshãa latɛ ni yɔɔ Kpee Buu lɛ shinaa lɛ naa lɛ shishi.

¹⁹ Tsinanuu lɛ fɔ lɛ ejie fɛɛ, ni eshã yɛ afɔleshãa latɛ lɛ nɔ.

²⁰ Bɔ ni efee esha afɔle tsinanuu lɛ loo lɛ, nakai pɛpɛɛpɛ efee tsinanuu nɛɛ hu loo lɛ, koni ekpãtã ehã maŋ lɛ koni akɛ amɛtɔ̃mɔ lɛ afa amɛ.

²¹ Ewo tsinanuu lɛ loo lɛ kɛje kpo kɛya shitoohe lɛ sɛɛ, ni eshã tamɔ bɔ ni eshã lɛ osɔfonukpa lɛ he esha tsina afɔle loo lɛ. Maŋ lɛ he esha afɔle ni.

²² Kɛji nɔyelɔ ko tɔ̃ Yehowa nɔ ejaakɛ efee nibii fɛɛ ni Yehowa eNyɔŋmɔ lɛ ewo he kitã akɛ akafee lɛ eko, be mli ni ehiɛ kãaa he, ni no hewɔ lɛ, eye sɔ̃ lɛ,

²³ kɛji ahã ele tɔ̃mɔ ni etɔ̃ lɛ nɔŋŋ lɛ, ekɛ too kpakpo ni kpa ko bɛ ehe aba ekɛbashã afɔle.

²⁴ Ekɛ enine aŋmɛ too kpakpo lɛ yiteŋ, ni egbe too lɛ yɛ he ni agbeɔ shãa afɔle kooloi lɛ yɛ lɛ, yɛ Yehowa hiɛ lɛ. Esha afɔle ni.

²⁵ Agbɛnɛ osɔfo lɛ kɛ ewao atsɔ esha afɔle too lɛ lá lɛ mli, ni ekɛ lá lɛ adiki shãa afɔle afɔleshãa latɛ lɛ koji lɛ ahe. Enɛ sɛɛ lɛ etsi la ni eshwɛ lɛ fɛɛ eshwie shãa afɔle afɔleshãa latɛ lɛ shishi.

²⁶ Eshã too kpakpo lɛ mli fɔ lɛ fɛɛ yɛ afɔleshãa latɛ lɛ nɔ, tamɔ bɔ ni eshã naanyobɔɔ afɔlei akooloi lɛ amli fɔ lɛ koni kɛtsɔ nɛkɛ gbɛ nɔ lɛ osɔfo lɛ akpãtã ahã lɛ yɛ etɔ̃mɔ lɛ hewɔ, ni akɛbaafa lɛ.

²⁷ Kɛji maŋbii lɛ kɛkɛ ateŋ mɔ ko tɔ̃ Yehowa nɔ ejaakɛ efee nibii fɛɛ ni Yehowa ewo he kitã akɛ akafee lɛ eko, be mli ni ehiɛ kãaa he, ni no hewɔ lɛ, eye sɔ̃ lɛ,

²⁸ kɛji ahã ele tɔ̃mɔ ni etɔ̃ lɛ nɔŋŋ lɛ, ekɛ abotia yoo ni kpa ko bɛ ehe aba ni ekɛbashã afɔle yɛ esha ni efee lɛ hewɔ.

²⁹ Ekɛ enine aŋmɛ esha afɔle too lɛ yiteŋ, ni egbe too lɛ yɛ he ni agbeɔ shãa afɔle kooloi lɛ yɛ lɛ.

³⁰ Osɔfo lɛ kɛ ewao atsɔ too lɛ lá lɛ mli, ni ekɛ lá lɛ adiki shãa afɔle afɔleshãa latɛ lɛ koji lɛ ahe. Enɛ sɛɛ lɛ etsi lá ni eshwɛ lɛ fɛɛ eshwie afɔleshãa latɛ lɛ shishi.

³¹ Ejie too lɛ mli fɔ lɛ fɛɛ tamɔ ajieɔ shidaa afɔlei akooloi amli fɔ lɛ, ni eshã fɔ lɛ yɛ afɔleshãa latɛ lɛ nɔ koni eje ŋma ewo Yehowa, koni osɔfo lɛ akpãtã ehã lɛ, ni akɛ etɔ̃mɔ lɛ baafa lɛ.

³² Kɛji mɔ ko kɛ gwantɛŋ miiba abashã esha afɔle lɛ, ekɛ gwantɛŋyoo ni kpa ko bɛ ehe aba.

³³ Ekɛ enine aŋmɛ esha afɔle kooloo lɛ yitso nɔ, ni egbe lɛ koni akɛshã esha afɔle yɛ he ni agbeɔ shãa afɔle kooloi lɛ yɛ lɛ.

³⁴ Osɔfo lɛ kɛ ewao atsɔ esha afɔle kooloo lɛ lá lɛ mli, ni ekɛ lá lɛ adiki shãa afɔle afɔleshãa latɛ lɛ koji lɛ ahe. Enɛ sɛɛ lɛ etsi lá ni eshwɛ lɛ fɛɛ eshwie afɔleshãa latɛ lɛ shishi.

³⁵ Ejie too lɛ mli fɔ lɛ fɛɛ tamɔ ajieɔ naanyobɔɔ afɔle gwantɛŋ lɛ mli fɔ lɛ koni eshã no kɛ niyenii afɔlei yɛ afɔleshãa latɛ lɛ nɔ ehã Yehowa. Ni osɔfo lɛ baakpãtã ahã lɛ, ni akɛ ehe esha lɛ baafa lɛ.