3 Mose 25 - ŊMALƐ KRƆŊKRƆŊ LƐ

Afi ni ji kpawo lɛ nɔ kusum

¹ Yehowa kɛɛ Mose yɛ Sinai Gɔŋ lɛ nɔ akɛ

² ekɛɛ Israelbii lɛ akɛ, “Kɛji nyɛyashɛ shikpɔŋ ni mikɛhãa nyɛ lɛ nɔ lɛ, nyɛhãa shikpɔŋ lɛ akãa shi efolo afi koni ekɛjɔɔ ehe akɛ woo kɛhã Yehowa.

³ Nyɛhua shikpɔŋ lɛ nɔ nyɛdua nyɛŋmɔshi nii afii ekpaa, ni nyɛkpɔlɔa nyɛwaintsei ahe, ni nyɛkpaa amɛyibii afii ekpaa hu;

⁴ shi afi ni ji kpawo lɛ nɔ lɛ, aŋmɛɛ shikpɔŋ lɛ he koni ejɔɔ ehe kpoo, akɛ woo kɛhã Yehowa. Akadu nii yɛ ŋmɔshi, ni akakpɔlɔ waintsei ahe hu.

⁵ Ŋmɔshinii ni lɛ diɛŋtsɛ eeekwɛ̃ lɛ, akakpa ato; ni yibii ni waintsei ni akpɔlɔko amɛhe lɛ aaawo lɛ hu, akakpa ato. Nakai afi lɛ eji hejɔɔmɔ afi hã shikpɔŋ lɛ.

⁶ Shi shikpɔŋ lɛ hejɔɔmɔ be nɛɛ mli niyenii ni baakwɛ̃ lɛ diɛŋtsɛ lɛ, ebaashɛ nyɛ kɛ nyɛnyɔji hii kɛ yei kɛ nyɛpaafoi kɛ gbɔi ni kɛ nyɛ yɔɔ fɛɛ,

⁷ kɛ nyɛshĩa kooloi kɛ ŋaŋ kooloi fɛɛ ni yɔɔ nyɛshikpɔŋ lɛ nɔ yeli aahu. Niyenii fɛɛ ni shikpɔŋ lɛ baaba lɛ aye.”

Nikpɔ̃mɔ afi lɛ

⁸ “Nyɛkanea shikpɔŋ lɛ hejɔɔmɔ afi nɛɛ toi kpawo, no ji afii kpawo kpawo toi kpawo. Enɛ feɔ afii nyɔŋmai ejwɛ kɛ nɛɛhu.

⁹ Afi nɛɛ nɔ nyɔŋ ni ji kpawo lɛ nɔ gbi ni ji nyɔŋma lɛ, no ji Nikpɔ̃mɔ Gbi lɛ. Akpã tɛtɛrɛmantɛrɛ kɛfo shikpɔŋ tso muu lɛ fɛɛ nɔ yɛ Nikpɔ̃mɔ Gbi nɛɛ nɔ.

¹⁰ Nyɛfea afi ni ji afi nyɔŋmai enumɔ lɛ krɔŋkrɔŋ. Ashiɛ heyeli yɛ shikpɔŋ lɛ nɔ ahã enɔ bii fɛɛ. Etsɔ̃ nyamɔ afi ehã nyɛ; mɔ fɛɛ mɔ nɔ ko ni ahɔ̃ɔ lɛ, mɔ lɛ loo eshwie ko aku sɛɛ ayaŋɔ nii lɛ; ni mɔ fɛɛ mɔ hu ni ahɔ̃ɔ lɛ akɛ nyɔŋ lɛ aku esɛɛ eya ewekumɛi aŋɔɔ ekoŋŋ.

¹¹ Nɛkɛ afi ni ji nyɔŋmai enumɔ nɛɛ atsɔ nyamɔ afi ahã nyɛ. Nyɛkadua nii yɛ enɔ; ni nyɛkakpaa niyenii ni shikpɔŋ lɛ diɛŋtsɛ baaba ahã nyɛ lɛ nyɛtoa; asaŋ nyɛkakpaa nyɛwaintsei ni akpɔlɔɔɔ amɛhe lɛ anɔ yibii lɛ hu.

¹² Nyamɔ afi ni, ni nyɛyea lɛ akɛ afi krɔŋkrɔŋ. Nibaanii ni shikpɔŋ lɛ diɛŋtsɛ baaba ahã nyɛ lɛ, no nyɛyea.

¹³ “Nɛkɛ nyamɔ afi nɛɛ mli lɛ nyɛteŋ mɔ fɛɛ mɔ nɔ fɛɛ nɔ ni kulɛ ehɔ̃ɔ lɛ, eya ni eyaŋɔ enii ekoŋŋ.

¹⁴ No hewɔ lɛ, kɛji ohɔ̃ɔ shikpɔŋ ko ohã onyɛmi Israelnyo, aloo ohe shikpɔŋ ko yɛ edɛŋ lɛ, nyɛteŋ mɔ ko mɔ ko akamɔ enyɛmi lɛ loo eshishiu enyɛmi lɛ.

¹⁵ Adamɔ afii abɔ ni abaanyɛ ahu shikpɔŋ lɛ ni akpa enɔ nibaanii lɛ dani wɔsɛɛ Nikpɔ̃mɔ Afi lɛ ashɛ nɔ awo shikpɔŋ lɛ he jara.

¹⁶ Kɛji afii lɛ fa lɛ, no lɛ shikpɔŋ lɛ jara lɛ awa; ni kɛji afii lɛ faaa lɛ, no lɛ ejara lɛ aba shi, ejaakɛ afii lɛ amli nibaanii ni shikpɔŋ lɛ baawo lɛ ji nɔ ni ahɔ̃ɔ lɛ.

¹⁷ No hewɔ lɛ, nyɛteŋ mɔ ko mɔ ko akashishiu enyɛmi; shi nyɛshea nyɛNyɔŋmɔ lɛ gbeyei. Mi ji Yehowa, nyɛNyɔŋmɔ lɛ.”

Afi ni ji kpawo lɛ mli saji

¹⁸ “Nyɛyea mikpɔi kɛ mimlai lɛ anɔ; nyɛbaa nyɛjeŋ ekpakpa, ni nyɛaahi shi yɛ shikpɔŋ lɛ nɔ shweshweeshwe.

¹⁹ Shikpɔŋ lɛ aaaba eniyenii, ni nyɛaaye nyɛtɔrɔ; ni nyɛaahi nɔ shweshweeshwe.

²⁰ “Eko lɛ nyɛaakɛɛ akɛ, ‘Afi ni ji kpawo lɛ nɔ lɛ, kɛji wɔduŋ nii, ni wɔkpãŋ ŋmɔshinii wɔtoŋ yɛ mli lɛ, no lɛ mɛni wɔɔye mɔ?’

²¹ Naa, mibajɔɔ afi ni ji ekpaa lɛ bɔ ni ebaaba afii etɛ̃ sɔŋŋ niyenii shi kome.

²² Belɛ afi ni ji kpaanyɔ lɛ nɔ be mli ni nyɛdu nii lɛ, nyɛbaaye blema niyenii ni nyɛkpa nyɛto lɛ kɛyaashi afi ni ji nɛɛhu lɛ nɔ, ni nyɛaakpa enɔ nii ni nyɛdu lɛ.

Nikpɔ̃mɔ lɛ

²³ “Akafo shikpɔŋ yibaa ni ahɔ̃ɔ lɛ owura kosɛɛ, ejaakɛ shikpɔŋ lɛ mi minɔ ni; ni nyɛ lɛ miwe kɛ mishĩa mli gbɔi kɛkɛ ji nyɛ.

²⁴ “Nyɛŋmɛa shikpɔŋ kpɔ̃mɔ hegbɛ yɛ shikpɔŋ tso muu ni nyɛyaaŋɔ lɛ nɔ he fɛɛ he.

²⁵ Kɛji efi onyɛmi Israelnyo, ni no hewɔ lɛ, eehɔ̃ɔ egboshinii ko lɛ, ewekunyo ni bɛŋkɛ lɛ kpaakpa lɛ yɛ hegbɛ akɛ ebakpɔ̃ɔ nɔ ni enyɛmi lɛ hɔ̃ɔ lɛ.

²⁶ Shi kɛji mɔ lɛ bɛ mɔ ko ni aaayakpɔ̃ nii lɛ ni ehɔ̃ɔ lɛ amrɔmrɔ nɔŋŋ, shi fee sɛɛ lɛ ena edɛŋ bɔ ni shɛɔ nii ni ehɔɔ lɛ kpɔ̃mɔ lɛ,

²⁷ no lɛ akane afii abɔ ni nii lɛ eye, kɛjɛ be ni ahɔ̃ɔ lɛ naa, koni mɔ ni hɔ̃ɔ nii lɛ awo afii abɔ ni eshwɛ dani wɔsɛɛ Nikpɔ̃mɔ Afi lɛ shɛɔ lɛ nyɔmɔ; kɛkɛ lɛ eku sɛɛ eŋɔ enii lɛ.

²⁸ Shi kɛji mɔ ni hɔ̃ɔ nii lɛ nyɛɛɛ eyakpɔ̃ nii lɛ lɛ diɛŋtsɛ lɛ, no lɛ nɔ ni ehɔ̃ɔ lɛ ahi mɔ ni he nii lɛ dɛŋ kɛyashi Nikpɔ̃mɔ Afi lɛ, ni Nikpɔ̃mɔ Afi lɛ mli lɛ nihelɔ lɛ aŋmɛɛ nii lɛ he, koni nɔtsɛ lɛ aŋɔ enii lɛ ekoŋŋ.

²⁹ “Kɛji mɔ ko hɔ̃ɔ eshĩa ni yɔɔ maŋ ni atswa gbogbo awo he mli lɛ, eyɛ hegbɛ kɛjɛ beyinɔ ni ehɔ̃ɔ shĩa lɛ kɛyashi enɔ afi naakplɔ ni ekpɔ̃ɔ shĩa lɛ.

³⁰ Shi kɛji akpɔ̃ɔɔ shĩa nɛɛ kɛyashi afi muu ho lɛ, no lɛ shĩa nɛɛ ni yɔɔ maŋ ni atswa gbogbo awo he lɛ etsɔ̃ mɔ ni he shĩa lɛ kɛ eshwiei agboshinii kɛmiiya naanɔ. Kɛji shɛ Nikpɔ̃mɔ Afi lɛ tete lɛ, ekaŋmɛɛ he ehã mɔ ni hɔ̃ɔ lɛ.

³¹ Shi tsui ni yɔɔ akrowai ni atswako gbogbo awoko amɛhe amli lɛ, abu amɛ tamɔ ŋmɔji ni yɔɔ shikpɔŋ lɛ nɔ lɛ. Abaanyɛ akpɔ̃ amɛ be fɛɛ be; ni Nikpɔ̃mɔ Afi lɛ nɔ lɛ aŋmɛɛ amɛhe ahã tsutsu nɔtsɛmɛi lɛ.

³² Shi yɛ Levibii amaji ni ahã amɛ akɛ amɛgbɛfaŋnɔ lɛ amli shĩai lɛ agbɛfaŋ lɛ, Levibii lɛ yɛ hegbɛ akɛ amɛkpɔ̃ɔ eko fɛɛ eko ni ahɔ̃ɔ be fɛɛ be.

³³ Kɛji Levinyo ko kpɔ̃ɔɔ shĩa ko ni ehɔ̃ɔ kɛyashi Nikpɔ̃mɔ Afi lɛ nɔ lɛ, no lɛ aŋmɛɛ shĩa ni ahɔ̃ɔ yɛ Levibii amaŋ lɛ mli lɛ he ahã lɛ, ejaakɛ shĩai ni yɔɔ Levibii amaji lɛ amli lɛ, nomɛi ji Levibii lɛ agbɛfaŋnii ni amɛyɔɔ yɛ Israelbii lɛ ateŋ.

³⁴ Shi amɛmaji lɛ ahe shikpɔji lɛ akahɔ̃ɔ eko kɔkɔɔkɔ, ejaakɛ amɛgbɛfaŋnɔ ni kɛmiiya naanɔ.”

Shika ni akɛfaa ohiafoi

³⁵ “Kɛji onyɛmi Israelnyo ni yɔɔ omasɛi ye ohia bɔ ni enyɛɛɛ ehe ekwɛ dɔŋŋ lɛ, omɔ mli ohã lɛ ni okwɛ lɛ; okɛ lɛ ahi shi akɛ gbɔ ni ebadɔmɔ bo.

³⁶ Kaahe lɛ nɔ ko he kpa, ni kaaŋmɛ nyɔmɔ ko ni ewoɔ bo nɔ; shi oshe oNyɔŋmɔ lɛ gbeyei; ni oŋmɛ onyɛmi Israelnyo lɛ gbɛ koni ehi omasɛi.

³⁷ Kaahe lɛ oshika ni okɛfa lɛ lɛ he kpa; ni oniyenii ni ohãa lɛ lɛ hu kaaŋmɛ ejara nɔ.

³⁸ Mi ji Yehowa, nyɛNyɔŋmɔ lɛ, mɔ ni jie nyɛ kɛje Ijipt shikpɔŋ lɛ nɔ koni maŋɔ Kanaan shikpɔŋ lɛ mahã nyɛ, ni matsɔ̃ nyɛNyɔŋmɔ lɛ.”

Nyɔji aheyeli

³⁹ “Kɛji onyɛmi Israelnyo ni yɔɔ omasɛi ye ohia bɔ ni no hã ehɔ̃ɔ ehe ehã bo lɛ, okaye lɛ nyɔŋ,

⁴⁰ shi moŋ etsɔ̃ tamɔ apaafonyo loo gbɔ ni ebadɔmɔ bo. Esɔmɔ bo kɛyashi Nikpɔ̃mɔ Afi lɛ nɔ.

⁴¹ Kɛji eshɛ nakai afi lɛ nɔ lɛ, lɛ kɛ ebii kɛ hɔi fɛɛ ashi oŋɔɔ, ni amɛku amɛsɛɛ kɛya amɛwekumɛi ateŋ kɛ eseshibii anɔ mli ekoŋŋ.

⁴² Ejaakɛ Israelbii lɛ mitsuji ni mijie amɛ kɛje Ijipt shikpɔŋ lɛ nɔ ji amɛ; no hewɔ lɛ, ebɛ akɛ ahɔ̃ɔ amɛteŋ mɔ ko akɛ nyɔŋ.

⁴³ Okaye amɛnɔ kɛ yiwalɛ; shi oshe oNyɔŋmɔ lɛ gbeyei.

⁴⁴ Kɛji nyɛmiitao wehii kɛ weyei, nyɔji hii kɛ nyɔji yei lɛ, nyɛyahea amɛ yɛ majimaji ni bɔle nyɛ lɛ amli.

⁴⁵ Nyɛbaanyɛ hu ni nyɛhe nyɔji kɛjɛ gbɔi ni yɔɔ nyɛteŋ lɛ abii ni afɔ yɛ nyɛshikpɔŋ lɛ nɔ lɛ ateŋ koni amɛtsɔ̃mɔ nyɛgboshinii;

⁴⁶ ni nyɛaanyɛ nyɛshi amɛ nyɛhã nyɛbii akɛ amɛgboshinii. Amɛ lɛ nyɛaanyɛ nyɛye amɛ nyɔŋ, shi nyɛnyɛmimɛi Israel fɔmɔbii lɛ, amɛ lɛ, akaye amɛteŋ mɔ ko nɔ kɛ yiwalɛ.

⁴⁷ “Kɛji gbɔ ko loo mɔkpɔŋ ko ni yɔɔ nyɛteŋ tsɔ̃ niiatsɛ; shi onyɛmi Israelnyo ni yɔɔ emasɛi lɛ ye ohia bɔ ni no hã ehɔ̃ɔ ehe ehã gbɔ loo mɔkpɔŋ lɛ loo gbɔ lɛ wekunyo ko lɛ,

⁴⁸ gbɔmɔ nɛɛ hehɔ̃ɔmɔ lɛ sɛɛ lɛ, hegbɛ yɛ lolo akɛ akpɔ̃ɔ lɛ. Esa akɛ enyɛmi nuu ko,

⁴⁹ loo etsɛkwɛ̃ loo etsɛ loo enyɛ nyɛmibi loo ewekunyo ni bɛŋkɛ lɛ kpaakpa aya ayakpɔ̃ lɛ, loo kɛji lɛ diɛŋtsɛ ena nɔ ko lɛ, ekpɔ̃ ehe.

⁵⁰ Ekɛ mɔ ni he lɛ lɛ abu akɔntaa kɛjɛ afi nɔ ni ehɔ̃ɔ ehe ehã lɛ lɛ, kɛyashi Nikpɔ̃mɔ Afi lɛ nɔ; ni eyinii lɛ abu yɛ afii lɛ ayikulɛ naa. Be ni eye yɛ mɔ ni ehe lɛ lɛ ŋɔɔ lɛ, abu lɛ akɛ apaayeli be.

⁵¹ Kɛji eshwɛ afii pii dani eshɛɔ Nikpɔ̃mɔ Afi lɛ nɔ lɛ, no lɛ eyi shika ni ekɛbaakpɔ̃ ehe lɛ ada.

⁵² Kɛji eshwɛ afii fioo ko kɛkɛ dani eshɛɔ Nikpɔ̃mɔ Afi lɛ po, mɔ ni he lɛ kɛ lɛ abu akɔntaa, koni akwɛ afii abɔ ni eshwɛ lɛ sɔ̃ɔmɔ lɛ, kɛna shika fioo ni sa akɛ ewo kɛkpɔ̃ ehe lɛ.

⁵³ Mɔ ni he lɛ lɛ abu lɛ tamɔ apaafonyo ni miitsu afi nii yɛ ekɛ lɛ shihilɛ mli. Enuŋtsɔ lɛ akaye enɔ kɛ yiwalɛ.

⁵⁴ Kɛji gbɔmɔ nɛɛ naaa mɔ ko atsɔ̃ gbɛi nɛɛ eko nɔ ni ebakpɔ̃ lɛ lɛ, no lɛ Nikpɔ̃mɔ Afi lɛ nɔ lɛ aŋmɛɛ ehe ni eye ehe, lɛ kɛ ebii ni kɛ lɛ yɔɔ fɛɛ.

⁵⁵ Ejaakɛ Israelbii lɛ mitsuji ni; amɛ ji mitsuji ni mijie yɛ Ijipt shikpɔŋ lɛ nɔ lɛ. Mi ji Yehowa, nyɛNyɔŋmɔ lɛ.”