3 Mose 24 - ŊMALƐ KRƆŊKRƆŊ LƐ

Kanei lɛ anɔkwɛmɔ

¹ Yehowa kɛɛ Mose akɛ,

² “Fã Israelbii akɛ amɛbahã bo mutso mu krɔŋŋ ni akɛ mutso ni ashimɔ fee koni akɛ mu lɛ asu Kpee Buu lɛ mli kane lɛ, bɔ ni afee ni ahã kane lɛ ama nɔ be fɛɛ be.

³ Aaron akwɛ koni kane lɛ atso, kɛjɛ gbɛkɛ aahu kɛyashi daa jetsɛremɔ leebi, yɛ Yehowa hiɛ be fɛɛ be yɛ muhɔɔ ni fo Kpãŋmɔ Adeka lɛ hiɛ lɛ kpo nɔ gbɛ yɛ Kpee Buu lɛ mli. Enɛ afee naanɔ akpɔ ahã nyɛshwiei.

⁴ Aaron baakura kanei lɛ yɛ shika ŋmiiŋmi kanetsei lɛ anɔ, ni ebaakwɛ koni amɛtso yɛ Yehowa hiɛ be fɛɛ be.

Aboloo ni akɛhãa Nyɔŋmɔ lɛ

⁵ “Okɛ ŋmãa mamu ashã aboloo akwaabɔi nyɔŋma kɛ enyɔ, aboloo akwaabɔ kome aye ŋmãa mamu kilo kome.

⁶ Too aboloo lɛ srɛnɛɛ kui enyɔ yɛ shika ŋmiiŋmi okplɔ̃ lɛ nɔ. Aboloo ekpaa aye afã biɛ, ni aboloo ekpaa hu aye biɛ.

⁷ Okɛ krɔbɔo krɔŋŋ afata aboloo ku kome fɛɛ ku kome he, koni no afee kaimɔ nɔ ni akɛbahã akɛ afɔle ni ashã ahã Yehowa.

⁸ Daa Hejɔɔmɔ gbi lɛ, Aaron ato aboloo nɛɛ eshwie okplɔ̃ lɛ nɔ, bɔ ni mitsɔ̃ɔ nɛɛ pɛpɛɛpɛ yɛ Yehowa hiɛ. Naanɔ kpãŋmɔ ni kã shi hã Israelbii nɛ.

⁹ Aboloi lɛ atsɔ̃ Aaron kɛ eshwiei agbɛfaŋnɔ; ni amɛye nii nɛɛ yɛ he ko ni yɔɔ krɔŋkrɔŋ ejaakɛ niyenii afɔle ni abashã akɛhã Yehowa mli nii ni yɔɔ krɔŋkrɔŋ jogbaŋŋ diɛŋtsɛ ni.”

Toigbalamɔ ni ja gbɛ nɔkwɛmɔnɔ

¹⁰ Be ko lɛ Israelyoo ko binuu ni ekɛ Ijiptnyo ko fɔ lɛ kɛ Israelnyo ko yabe yɛ maŋ, yɛ Israelbii lɛ ateŋ.

¹¹ Israelyoo nɛɛ gbɛi ji Shelomit, ni etsɛ ji Dibri ni jɛ Dan akutso lɛ mli lɛ. Bei lɛ mli lɛ oblanyo lɛ bɔ musu elomɔ Nyɔŋmɔ. No hewɔ lɛ, amɔ lɛ kɛbahã Mose.

¹² Atsi oblanyo lɛ naa kɛyashi Yehowa aaatsɔ̃ɔ nɔ ni afee lɛ.

¹³ Fee sɛɛ lɛ Yehowa kɛɛ Mose akɛ,

¹⁴ “Mɔ mɔ ni lomɔ lɛ kɛje shitoohe lɛ mli kɛya esɛɛ. Mɛi fɛɛ ni nu akɛ elomɔ lɛ kɛ amɛniji abashwie eyiteŋ, koni no sɛɛ lɛ maŋtso muu lɛ atswia lɛ tɛ ni egbo.

¹⁵ Enɛ sɛɛ lɛ okɛɛ Israelbii lɛ akɛ, ‘Mɔ fɛɛ mɔ ni baalomɔ eNyɔŋmɔ lɛ lɛ, emusu baabua lɛ diɛŋtsɛ eyiteŋ;

¹⁶ mɔ ni baalomɔ Yehowa lɛ, gbe kɛ̃ aaagbe lɛ. Gbɔ ni jio, maŋnyo ni jio, kɛji ena elomɔ Yehowa lɛ, maŋtso muu lɛ fɛɛ atswia lɛ tɛ ni egbo.’

¹⁷ “Mɔ ni aaagbe gbɔmɔ lɛ, lɛ hu agbe lɛ;

¹⁸ ni mɔ ni aaagbe mɔ kroko kooloo lɛ, eto kooloo lɛ najiaŋ kɛ kooloo nɔŋŋ; akɛ kooloo ato kooloo najiaŋ.

¹⁹ “Kɛji mɔ ko pila enaanyo gbɔmɔ lɛ, lɛ hu apila lɛ nakai nɔŋŋ bɔ ni epila enaanyo lɛ koni akɛtse.

²⁰ Kɛji eku enaanyo lɛ gbɔmɔtso lɛ mli wu lɛ, aku lɛ hu ewu akɛtse; kɛji hiŋmɛi ni lɛ, akɛ ehiŋmɛi atse, ni kɛji nyanyɔŋ ni lɛ, akɛ lɛ hu enyanyɔŋ atse. Bɔ ni epila mɔ lɛ ehã lɛ, nakai pɛpɛɛpɛ nɔŋŋ apila lɛ hu kɛtse.

²¹ Mɔ ni aaagbe mɔ ko kooloo ko lɛ, eto mɔ lɛ kooloo lɛ najiaŋ; shi mɔ ni aaagbe gbɔmɔ lɛ gbe agbe lɛ.

²² Mla koome nɛɛ akã shi ahã nyɛ fɛɛ, gbɔ kɛ maŋnyo fɛɛ, ejaakɛ mi ji Yehowa, nyɛNyɔŋmɔ lɛ.”

²³ Be ni Mose kɛ Israelbii lɛ ewie egbe naa lɛ, maŋbii lɛ mɔ oblanyo lɛ ni lomɔ lɛ kɛje amɛshitoohe lɛ mli kɛtee esɛɛ, ni ayatswia lɛ tɛ yɛ jɛi ni egbo. Belɛ kɛtsɔ̃ nɛkɛ gbɛ nɔ lɛ Israelbii lɛ fee nɔ ni Yehowa fã Mose akɛ afee lɛ.