3 Mose 22 - ŊMALƐ KRƆŊKRƆŊ LƐ

Krɔŋkrɔŋ nii ji afɔlei lɛ

¹ Yehowa fã Mose,

² ni ekɛɛ Aaron kɛ ebihii lɛ akɛ: “Nyɛkwɛa jogbaŋŋ yɛ nikeenii krɔŋkrɔŋi ni Israelbii lɛ tsuɔ he ni amɛjɔɔ nɔ amɛhãa mi lɛ he, koni migbɛi krɔŋkrɔŋ lɛ he guɔ akagbo. Mi ji Yehowa.

³ Kɛji oshwiei lɛ ateŋ mɔ ko ni he tseee tsi bɛŋkɛ afɔlei ni yɔɔ krɔŋkrɔŋ ni Israelbii lɛ etsuu he amɛjɔɔ nɔ amɛhã mi lɛ, abuŋ lɛ ashiŋ miwebii lɛ anɔ. Mla nɛɛ kã shi hã yinɔi fɛɛ.

⁴ “Aaron shwiei lɛ ateŋ mɔ fɛɛ mɔ ni miiye hewolo nɔ hela gbeyeigbeyei aloo ehe miiho nu akaye niyenii krɔŋkrɔŋ lɛ eko kɛyashi beyinɔ ni ehe aaatse.

⁵ Nuu fɛɛ nuu ni taa nɔ ko ni woɔ mɔ he muji he, loo nuu ni ehe nu jeɔ emli hoɔ, loo nuu ni taa waamɔnii ni woɔ mɔ he muji he, aloo etaa mɔ ko ni woɔ mɔ he muji he,

⁶ loo mɔ fɛɛ mɔ ni taa nibii nɛɛ eko he lɛ, ehe tseee kɛyashi hulu aaanyɔ shi. Ni kɛ ejuko ehe lɛ ekaye nikeenii krɔŋkrɔŋi lɛ eko.

⁷ Kɛ hulu enyɔ shi ni ehe tse lɛ, no sɛɛ dani eye nii krɔŋkrɔŋi lɛ eko, ejaakɛ nomɛi ji eŋmãa.

⁸ Ekaye kooloo ni egbo lɛ diɛŋtsɛ edɛŋ gbele loo kooloi etserɛ lɛ. Kɛji eye lɛ ebaatsɔ̃ mɔ ni he tseee; mi ji Yehowa.

⁹ “Osɔfoi fɛɛ aye mlai ni miwo nɛɛ anɔ; kɛjeee nakai lɛ amɛaatere sɔ̃, ni amɛaagboi yɛ mimlai krɔŋkrɔŋ lɛ anɔtɔ̃mɔ hewɔ; mi mifeɔ osɔfoi lɛ krɔŋkrɔŋ.

¹⁰ “Mɔkpɔŋ ko mɔkpɔŋ ko akaye nɔ krɔŋkrɔŋ lɛ eko; nakai nɔŋŋ ji gbɔ loo apaafonyo ni ebato osɔfo gbɔ.

¹¹ Shi nyɔŋ ni osɔfo lɛ he kɛ lɛ diɛŋtsɛ eshika, aye nɔ krɔŋkrɔŋ lɛ eko; ni nyɔji ni afɔ amɛ yɛ osɔfo lɛ we lɛ kɛ lɛ aye eniyenii lɛ eko.

¹² Kɛ osɔfo ko biyoo yagbã mɔ ko kɛkɛ lɛ, ekaye nii krɔŋkrɔŋi lɛ amli nɔ ni aje gbɛ ajie ato afã lɛ.

¹³ Shi kɛji osɔfo biyoo lɛ tsɔ̃ okulafo aloo ewu shwie lɛ, ni ebɛ bi, ni eku esɛɛ kɛba etsɛ we lɛ, tamɔ eyɔɔ yɛ egbekɛbiiashi lɛ, no lɛ eye etsɛ nii lɛ eko. Mɔkpɔŋ ko mɔkpɔŋ ko kɛkɛ akaye eko.

¹⁴ “Kɛji mɔ ko ni jɛɛɛ osɔfoi aweku mli leee ehe be ni eyaye nɔ krɔŋkrɔŋ lɛ eko lɛ, eto najiaŋ ni ekɛ mlijai enumɔ mli ekome ashi nɔ.

¹⁵ Osɔfoi lɛ akaŋmɛ mɔ ko kɛkɛ gbɛ ni eye niyenii krɔŋkrɔŋ ni Israelbii lɛ kɛbahãa Yehowa lɛ eko.

¹⁶ Kɛji amɛŋmɛ gbɛ lɛ amɛbaawo niyenii krɔŋkrɔŋ lɛ he muji, ni amɛaatere tɔ̃mɔ lɛ yi sɔ̃, ni aaagbala amɛtoi, ejaakɛ mi ji Yehowa ni feɔ amɛ krɔŋkrɔŋ lɛ.”

¹⁷ Yehowa fã Mose

¹⁸ koni ekɛ mlai nɛɛ ahã Aaron kɛ ebihii lɛ kɛ Israelbii lɛ fɛɛ, “Kɛji Israelnyo ko loo mɔ ko ni ebato gbɔ yɛ Israel shikpɔŋ lɛ nɔ kɛ shãa afɔle miiba abahã Yehowa, shiwoo ni jio, tsuijurɔ naa nii jio, kooloo lɛ afee kooloo ni kpa ko bɛ ehe.

¹⁹ Bɔ ni afee ni esa Yehowa hiɛ ni ehe lɛ; kooloo lɛ afee tsina loo gwantɛŋ loo abotia nuu ni kpa ko bɛ ehe.

²⁰ Kɛ nyɛkɛ kooloo ni kpa yɔɔ ehe ba lɛ, esaŋ Yehowa hiɛ, ni eheŋ.

²¹ Kɛji mɔ ko kɛ naanyobɔɔ afɔle tamɔ akɛ tsina loo too, loo afɔle ni ewo he shi eto, loo afɔle ni eeshã yɛ tsuijurɔ naa lɛ, miiba abahã Yehowa lɛ, esaaa akɛ kpa ko ahi kooloo lɛ he; esa akɛ efee kooloo ni eye emuu koni esa Yehowa hiɛ.

²² Nyɛkɛ kooloo ni eshwila aloo ehe ko eku, loo ehenii shɛɛɛ, loo fala ni hoɔ nu yɛ ehe, loo kpla loo ajitɔ eshwie ehe loo nɔ ko ewo yɛ ehewolo nɔ akaba akɛ nyɛkɛbaahã Yehowa koni akɛshã afɔle ahã lɛ yɛ afɔleshãa latɛ lɛ nɔ.

²³ Kɛji afɔle ni nyɛkɛba lɛ tsuijurɔ naa nyɛkɛba lɛ, no lɛ nyɛaanyɛ nyɛkɛ kooloo ni enine loo enane bɛ pɛpɛɛpɛ ashã afɔle lɛ. Shi kɛ afɔle ni nyɛwo he shi nyɛto nyɛshãa lɛ, no lɛ kooloo lɛ esaŋ Yehowa hiɛ ni eheŋ.

²⁴ Nyɛkɛ kooloo ni ajwara aloo ashimɔ aloo atserɛ aloo afolɔ egbɛi akashã afɔle nyɛhã Yehowa. Ni nyɛkafea nakai yɛ nyɛshikpɔŋ lɛ nɔ.

²⁵ “Nyɛkahea kooloi nɛɛ eko yɛ maŋsɛɛnyo dɛŋ ni nyɛkɛbahã Yehowa akɛ niyenii afɔle, ejaakɛ adebɔɔ mli kpa ko yɛ maŋsɛɛ kooloi nɛɛ ahe. Eji kpa ni eka amɛhe, ni amɛsaŋ Yehowa hiɛ.

^26-27 “Kɛji afɔ tsina loo gwantɛŋ loo abotiabi lɛ, akajie lɛ yɛ enyɛ he kɛyashi gbii kpawo. Kɛjɛ gbi ni ji kpaanyɔ lɛ nɔ kɛyaa lɛ, esa hã niyenii afɔle shãa hã Yehowa.

²⁸ Nyɛkagbea tsina loo gwantɛŋ loo abotia kɛ ebi fɛɛ gbi kome.

²⁹ Kɛji nyɛmiishã shidaa afɔle nyɛhã Yehowa lɛ, nyɛyea ehe mlai lɛ anɔ, koni afɔle lɛ asa ehiɛ.

³⁰ Nyɛyea loo lɛ fɛɛ gbi lɛ nɔŋŋ; nyɛkashwɛa eko ni je tsɛre nɔ.”

³¹ Yehowa kɛɛ, “Nyɛhiɛ ahiãa mikpɔi lɛ anɔ ni nyɛyea nɔ; mi ji Yehowa.

³² Nyɛkahãa migbɛi krɔŋkrɔŋ lɛ he guɔ miigbo. Esa akɛ Israelbii fɛɛ abu mi akɛ mɔ krɔŋkrɔŋ; mi ji Yehowa, ni mi mifeɔ nyɛ krɔŋkrɔŋ.

³³ Mijie nyɛ kɛjɛ Ijipt shikpɔŋ lɛ nɔ koni matsɔ nyɛNyɔŋmɔ; mi ji Yehowa.”