3 Mose 21 - ŊMALƐ KRƆŊKRƆŊ LƐ

Osɔfoi lɛ ahe tse krɔŋkrɔŋ

¹ Yehowa fã Mose ni ekɛɛ osɔfoi ni ji Aaron bihii lɛ akɛ, “Osɔfo ko akaya wekunyo ko kɛkɛ ni egbo yara nɔ ni ekɛwo ehe muji,

² belɛ ja enyɛ loo etsɛ loo ebinuu loo ebiyoo loo enyɛmi nuu

³ loo enyɛmi yoo, ni ji oblayoo foro ni kɛ lɛ yɔɔ lɛ, koni ekɛbule ehe.

⁴ Ekaya mɔ ko ni gbãlã hewɔ efeɔ ewekunyo yara nɔ koni ekɛwo ehe muji.

⁵ “Osɔfo ko akakpɔ eyi, ni ekaku etsɛŋ nɔ, ni asaŋ ekabãmɔ ehewolo nɔ gbɛ̃i kɛtsɔ̃ɔ akɛ eeye ŋkɔmɔ.

⁶ Osɔfo lɛ afee ehe krɔŋkrɔŋ ahã mi, ni ekawo migbɛi lɛ he muji, ejaakɛ Yehowa afɔlei ni akɛ la shãa, ni ji eNyɔŋmɔ lɛ aboloo lɛ, lɛ ekɛbahãa. No hewɔ lɛ, efee ehe krɔŋkrɔŋ.

⁷ Osɔfo ko akaŋɔ yoo ajwamãŋ ko loo yoo ni le nuu, loo yoo ni ewu eshwie lɛ, ejaakɛ miniyenii afɔle lɛ, osɔfo lɛ kɛbahãa mi; Osɔfo lɛ mɔ krɔŋkrɔŋ ni.

⁸ Nyɛbua osɔfo lɛ akɛ mɔ krɔŋkrɔŋ, ejaakɛ mi, Yehowa, ji mɔ ni mifeɔ osɔfoi lɛ krɔŋkrɔŋ lɛ.

⁹ Kɛji osɔfo ko biyoo fee ehe ajwamãŋ lɛ, ewo etsɛ he muji; ashã lɛ ni egbo.

¹⁰ “Osɔfonukpa lɛ, mɔ ni afɔse mu ni akɛfɔɔ mɔ mu lɛ ashwie eyiteŋ ni awo lɛ osɔfo, ni ewo osɔfo atadei lɛ, lɛ lɛ ekahiɛ eyitso folo, ni ekagbala etadei hu kɛtsɔ̃ɔ akɛ eeye ŋkɔmɔ.

^11-12 Afɔ lɛ mu ni ajɔɔ enɔ ahã mi; no hewɔ lɛ, ekawo mishihilɛhe krɔŋkrɔŋ lɛ he muji; ni ekashi jɛi etee eyabote shĩa ko ni gbonyo ko kɛkɛ loo etsɛ loo enyɛ tete gbonyo kã mli.

¹³ Eŋɔ oblayoo foro.

¹⁴ Ekaŋɔ yoo okulafo loo mɔ ni ewu eshwie lɛ loo mɔ ni le nuu loo yoo ajwamãŋ; shi moŋ eŋɔ oblayoo foro kɛjɛ etsɛ weku lɛ mli.

¹⁵ Efee enɛ, kɛjeee nakai lɛ eshwiei ni sa akɛ amɛfee krɔŋkrɔŋ lɛ ahe baawo muji. Mi ji Yehowa, ni mijɔɔ enɔ mifee lɛ osɔfonukpa.”

¹⁶ Yehowa fã Mose,

¹⁷ ni ekɛɛ Aaron akɛ, “Oshwiei lɛ ateŋ mɔ ko ni eje kpa akaba, yɛ amɛyinɔi fɛɛ mli, ni ekɛ niyenii afɔle lɛ bahã mi.

¹⁸ Mɔ ko ni kpa yɔɔ egbɔmɔtso he kɛ afɔle lɛ akaba; mɔ ni eshwila aloo etsɔ̃ɔ, loo eji gbɔmɔ akotia loo gbɔmɔ asaabu,

¹⁹ loo mɔ ni enane loo enine eje kpa

²⁰ loo afutsɛ, loo mɔ ni tɛ kã ehiŋmɛi nɔ, loo mɔ ni he edɔ kpla loo mɔ ni egbɛi mli wui ejwra.

²¹ Nuu fɛɛ nuu ni kpa ko yɔɔ ehe yɛ osɔfo Aaron bihii lɛ ateŋ lɛ, ekatsi ebɛŋkɛ ni ekɛ niyenii afɔle lɛ bahã mi.

²² Gbɔmɔ ni tamɔ nakai lɛ eeenyɛ eye aboloo ni ji nii ni yɔɔ krɔŋkrɔŋ kɛ nii ni yɔɔ krɔŋkrɔŋ fe fɛɛ lɛ amli lɛ eko moŋ,

²³ shi muhɔɔ krɔŋkrɔŋ lɛ he kɛkɛ ni ekaba, ni ekatsi ebɛŋkɛ afɔleshãa latɛ lɛ, ejaakɛ kpa yɛ ehe. No hewɔ lɛ, ekawo minii krɔŋkrɔŋi lɛ ahe muji, ejaakɛ mi ji Yehowa ni feɔ amɛ krɔŋkrɔŋ lɛ.”

²⁴ Belɛ enɛ ji nɔ ni Mose kɛɛ Aaron kɛ ebihii lɛ kɛ Israelbii lɛ fɛɛ lɛ.